ilakkiyainfo

ilakkiyainfo

நீயா நானா? விக்கினேஸ்வரனுடன் மோதும் சிறிதரன் – மத்தியா மாகாணமா அதிகாரப்போட்டி! – கருணாகரன் (கட்டுரை)

நீயா நானா? விக்கினேஸ்வரனுடன் மோதும் சிறிதரன் – மத்தியா மாகாணமா அதிகாரப்போட்டி! – கருணாகரன் (கட்டுரை)
November 08
15:44 2017

கிளிநொச்சி – அக்கராயன் கரும்புத்தோட்டக்காணிப் பிரச்சினைக்கும் மாகாணசபையின் அதிகாரத்துக்கும் இடைக்கால அறிக்கை அல்லது அரசியலமைப்புத் திருத்தம் ஆகியவற்றுக்கிடையிலும் என்ன ஒற்றுமை? என்று நீங்கள் கேட்கலாம்.

எல்லாவற்றிலுமே அரசியல் கலந்து விட்டால், எல்லாம் ஒன்றோடு ஒன்று சம்மந்தப்பட்டே தீரும். அதிலும் மாகாண அதிகாரங்களை “மத்தி” மீறுகிறது. மாகாணசபையை “மத்தி” மதித்து நடக்கவில்லை என்று சொல்லிக் கொண்டிருக்கும் தமிழ் அரசியல்வாதிகளே எல்லை மீறி, கொள்கை மீறி நடந்தால்…?

அரசியல் பழிவாங்கல், அரசியல் அத்துமீறல், அதிகார துஸ்பிரயோகம் என்பதெல்லாம் சிங்கள ஆதிக்க அரசியலில் மட்டுமல்ல, நம்முடைய உள்வீட்டுக்குள்ளும் நடக்கின்ற சங்கதிகளாகி விட்டன. எல்லைமீறி, ஒழுங்குமீறி நடக்கின்ற பிரச்சினைகள் இன்று ஏராளம். இந்த விவகாரமும் அப்படியான ஒன்றுதான். படியுங்கள் மீதிக் கதையை.

முதற்கதை

———————

அக்கராயனில் ஒரு கரும்புத்தோட்டமும் சர்க்கரை உற்பத்தி ஆலையும் இருந்தது. இதை அன்று இளைஞர்களாக இருந்த 20 பேர் இணைந்து 1964 இல் உருவாக்கினார்கள்.

இதற்காக அப்பொழுது 40 ஆண்டுகாலக் குத்தகை அடிப்படையில் 204 ஏக்கர் நிலம் அரசாங்கத்திடமிருந்து பெறப்பட்டது. “பொருள் உற்பத்தி, மக்களுக்கு வேலை வாய்ப்பை வழங்குவது” என்ற அடிப்படையிலேயே அரசாங்கம் இந்தக் காணியை வழங்கியிருந்தது. ஏறக்குறைய இதே காலப்பகுதியில்தான் ஸ்கந்தபுரம் பகுதியின் குடியேற்றமும் நடந்தது.

இந்தக் காணிக்குரிய நீர் அக்கராயன் குளத்திலிருந்தே பாசனமாக வழங்கப்பட்டது. காடாகப் பெற்றுக்கொள்ளப்பட்ட நிலத்தைப் பல லட்சம் ரூபாய் கடன் வாங்கிச் செலவழித்து கரும்புத் தோட்டமாகவும் சர்க்கரைத் தொழிற்சாலையாகவும் மாற்றினார்கள் 20 பேரும்.

Kilinochchi Sugar Manufacturers (Pvt) Ltd என்ற பெயரில் ஆரம்பிக்கப்பட்ட இந்தத் தொழிற்சாலையில் 100 தொடக்கம் 120 பேர்வரையில் வேலை செய்தனர். பயிர்வளர்ப்புச் சீசனில் இந்த எண்ணிக்கை கூடும். வடக்கிலிருந்த ஒரே சீனித்தொழிற்சாலை இதுவாகவே இருந்தது.

அப்பொழுது பாடசாலைச் சுற்றுலாக்களில் சென்று பார்த்தவர்களுக்கும் கிளிநொச்சியில் இருந்தவர்களுக்கும் இந்தத் தொழிற்சாலையைப் பற்றிய நினைவுகள் வரக்கூடும்.

ஏறக்குறைய 15 ஆண்டுகளுக்கு மேலாகச் சிறப்பாக இயங்கி நாடு முழுவதிலும் சீனி, சர்க்கரை வினியோகத்தைச் செய்து வந்தது Kilinochchi Sugar Manufacturers (Pvt) Ltd என்ற இந்தத் தொழிற்சாலை.

அது வடக்கில் ஏராளமான தொழிற்சாலைகள் சிறப்பாக இயங்கிய காலம். மில்க்வைற், லாலா சோப் போன்ற சவர்க்காரக் கம்பனிகள், சுப்பிரமணியம் சோடா, ஆர்.வி.ஜி.பீடி, அலுமினியத் தொழிற்சாலை, கண்ணாடித் தொழிற்சாலை, கைத்தறி, மின்தறி ஆலைகள், ஆணிப் பக்ரரறி என்று ஏராளம் தொழில் மையங்கள் இயங்கிக் கொண்டிருந்த சூழல்.

சனங்களுக்கும் வேலைவாய்ப்புகள் தாராளமாகக் கிடைத்தன. ஆனால், இப்படி இயங்கிய தொழிற்சாலைகளுக்கெல்லாம் வந்தது நெருக்கடி. இனப்பிரச்சினை யுத்தமாக மாறத்தொடங்கியதால், இந்தத் தொழிற்சாலைகளை இயக்குவதில் பலவிதமான பிரச்சினைகள் உருவாகின.

அக்கராயன் கரும்புத் தொழிற்சாலைக்கும் வந்தது பேரிடி. 1986, 87 களில் இலங்கை, இந்தியப் படைகள் கரும்புத்தோட்டத்தையும் தொழிற்சாலையையும் நெருக்கடிக்குள்ளாக்கின.

1987 இல் இந்தியப் படைகள் இந்தக் காணியில் ஒரு பகுதியை ஆக்கிரமித்தது. இதனால் தொழிற்சாலையைத் தொடர்ந்தும் இயக்குவதில் பெரும் சிரமங்களைச் சந்தித்தது நிர்வாகம்.

தொடர்ந்தும் படைகளோடும் பிரச்சினைகளோடும் மல்லுக் கட்டிக் கொண்டிருக்க முடியாது என்ற பங்காளர்களில் சிலர் தமது பங்கினை ஏனையவர்களிடம் ஒப்படைத்து விட்டு, விலகிப் போய் விட்டார்கள்.

லட்சியவாதிகளுக்கு இடர்கள் பெரிதாகப்படுவதில்லை என்பது உலக வழமை. அவர்கள் சவால்களை எதிர்கொள்வதை ஒரு சவாலாகவே எடுத்துக் கொண்டு செயற்படுவார்கள்.

அப்படியான சிலர் மட்டும் தொடர்ந்தும் கரும்புத் தோட்டத்தையும் பல்வேறு நெருக்கடிகளின் மத்தியிலும் சீனித்தொழிற்சாலையையும் இயக்கி வந்தனர்.

அதுவும் சாத்தியக்குறைவு என்ற நிலை ஏற்பட்டவுடன், மிஞ்சியிருந்தவர்களில் மேலும் சிலர் விலகிச் சென்று விட்டனர். இறுதியாக மிஞ்சியவர் திரு. கோபாலசிங்கம் என்பவர் மட்டுமே. அவரே இறுதிவரையில் நின்று தாக்குப் பிடித்தார்.

ஆனால், வன்னியில் ஏற்படுத்தப்பட்ட பொருளாதாரத் தடை போன்ற காரணங்களால், பிறகு அது கரும்புத்தோட்டம் என்ற பேரில் குறிப்பிடப்பட்டாலும் நடைமுறையில் விவசாயப் பண்ணையாகவே மாறியது. தென்னை நாற்றுகளை உருவாக்கம் செய்தல், நெற்பயிர்ச்செய்கை, விலங்கு வேளாண்மை போன்றவற்றை அடிப்படையாகக் கொண்ட பண்ணையாகியது.

இந்த விவசாயப்பண்ணையை கிளிநொச்சி இடப்பெயர்வு, யாழ்ப்பாண இடப்பெயர்வு போன்றவற்றினால் அக்கராயன், ஸ்கந்தபுரம் போன்ற இடங்களுக்குச் சென்று குடியிருந்தவர்களுக்குத் தெரியும்.

இந்தப் பண்ணையில் அப்போதும் 60 பேருக்கு மேற்பட்டவர்கள் வேலை செய்தனர். இடம்பெயர்ந்து வேலை வாய்ப்பின்றி இருந்தவர்களுக்கும் இருப்பதற்கு இடமில்லாமல் இருந்தவர்களுக்கும் வாய்ப்புகளை வழங்கி வந்தது இந்தப் பண்ணை.

விடுதலைப்புலிகள் இந்தப் பண்ணையை மாதிரிப் பண்ணையாகக் கொண்டு, தாங்களும் சில பண்ணைகளை உருவாக்கியிருந்தனர். அத்துடன் இந்தப் பண்ணைக்கு வேண்டிய உதவிகளைச் செய்து ஊக்குவிக்க வேண்டும் என்ற எண்ணத்தையும் கொண்டிருந்தார்கள்.

இப்படி இயங்கிய பண்ணை, வன்னியில் நடந்த இறுதி யுத்தம் நடந்த 2008 இல் தற்காலிகமாகக் கைவிடப்பட வேண்டியதாயிற்று. பண்ணையை விட்டு வெளியேற முடியாத நிலையிலும் வேறு வழியின்றிப் பண்ணையை விட்டு இடம்பெயர்ந்து முள்ளிவாய்க்கால்வரை சென்றார் கோபாலசிங்கம். அதிர்ஷ்டவசமாகத் தப்பிப் பிழைத்த கோபாலசிங்கம் மீண்டும் அக்கராயனுக்கு வந்தபோது, பண்ணையில் படையினரின் கட்டுப்பாட்டிலிருந்தது. இது எதிர்பார்க்கப்பட்டதுதான். என்றாலும் அனுமதிக்க முடியாதல்லவா.

சவால்களையே எதிர்கொண்ட மனம் சுலபமாக ஓய்வதில்லை என்பார்கள். எனவே, தன்னிடமிருந்த ஆவணங்களையெல்லாம் எடுத்துக்கொண்டு, உரிய அதிகாரிகள், உயர்மட்டத்தலைவர்கள், மாகாணமுதலமைச்சர், தேசிய பாதுகாப்பு அமைச்சு எனப்பல இடங்களுக்கும் சென்று விவரங்களைச் சொல்லி, மீளவும் காணியைப் பெற்றுக் கொண்டார் திரு. கோபாலசிங்கம்.

ஆனால், காணியின் குத்தகைக் காலமான 40 ஆண்டுகளும் முடிந்து விட்டது. இதனால், தன்னுடைய மூலதனச் செலவு, உழைப்பு, தொடர்ச்சியான வேலைத்திட்டம் ஆகியவற்றைக் குறிப்பிட்டு, மேலும் விண்ணப்பம் செய்தார் கோபாலசிங்கம்.

ஆனால், இப்பொழுது Kilinochchi Sugar Manufacturers (Pvt) Ltd என்பதற்குப் பதிலாக Nothern Agro Multi Farm (Pvt( Ltd என்ற பெயரிலே, புதிய திட்டங்களோடு புதிய விண்ணப்பம் இருந்தது.

திரு கோபாலசிங்கம் எண்பது வயதை எட்டி முதுமையடைந்து விட்டதால், அதற்குப் பதிலாக புதிய செயற்பாட்டணி ஒன்று இந்தத் திட்டத்தை முன்வைத்து காணியைக் குத்தகைக்குக் கோரியிருந்தது.

இந்தச் செயற்பாட்டணி போரினால் பாதிக்கப்பட்ட பிரதேசத்தில் உற்பத்தியை மேற்கொள்ளுதல், வேலையற்றிருப்போருக்கான வேலை வாய்ப்பை வழங்குதல் என்ற அடிப்படையில் செயற்படுவதற்குத் திட்டமிட்டிருந்தது.

இதற்கான விண்ணப்பம் கரைச்சிப் பிரதேச செயலர், கிளிநொச்சி மாவட்ட அரசாங்க அதிபர், மாகாணக் காணி ஆணையாளர், மாகாணமுதலமைச்சர் என அனைவருக்கும் வழங்கப்பட்டது.

இதனைப் பரிசீலித்த மாகாண முதலமைச்சர் விக்கினேஸ்வரன், உள்ளுர் உற்பத்திப் பெருக்கம், உள்ளுர் முதலீட்டாளர்களை ஊக்குவித்தல், வேலையற்ற மக்களுக்கு வேலை வாய்ப்பை வழங்குதல் என்ற அடிப்படையில் குறித்த காணியை உரிய செயற்பாட்டணிக்கு வழங்குமாறு மாகாணக் காணி ஆணையாளருக்கும் கிளிநொச்சி மாவட்டச் செயலருக்கும் கடிதங்களை அனுப்பியிருந்தார்.

இதனையடுத்து இந்த விடயம் குறித்து கிளிநொச்சி மாவட்ட ஒருங்கிணைப்புக் குழுக்கூட்டத்திலும் இணைத்தலைவர் என்ற வகையில் குறிப்பிட்டு ஆணையிட்டிருந்தார். இதற்கான ஆதரவை அமைச்சர் விஜயகலா மகேஸ்வரன், அங்கயன் இராமநாதன் போன்றவர்களும் வழங்கியிருந்தனர்.

இதன்படி Nothern Agro Multi Farm (Pvt( Ltd என்ற நிறுவனத்தினர் குறித்த காணியில் பண்ணைத்திட்டத்தை ஆரம்பித்தனர். கரும்புச் செய்கையைத் தொடர்ந்தும் மேற்கொள்வதற்கு Nothern Agro Multi Farm (Pvt( Ltd நிறுவனம் விரும்பியபோதும் அதற்கான அனுமதியைத் தற்காலிகமாக வடமாகாணத்தில் இடைநிறுத்தியிருப்பதாக வடமாகாணசபை தெரிவித்ததால், அதை மீளாய்வு செய்யும் வரையில் பண்ணைத் திட்டத்தை நடைமுறைப்படுத்தத் தொடங்கியது Nothern Agro Multi Farm (Pvt( Ltd. முதற்கட்டமாக 45 மாடுகள் பண்ணை வளர்ப்புத்திட்டத்தில் இணைக்கப்பட்டன.

அத்துடன் நெற்பயிர்ச்செய்கையும் மேற்கொள்ளப்பட்டது. முதற்கட்டப் பணிகளில் சுமார் 20 பேர் வரையில் வேலைவாய்ப்பைப் பெற்றனர். பாலுற்பத்தி ஆரம்பிக்கப்பட்டது.

இதற்கிடையில் இந்தக் காணியை பிரதேசத்தின் விவசாய அமைப்புகள் தமது அமைப்பின் வளர்ச்சிக்காகப் பயிர்ச்செய்கைக்குத் தற்காலிகமாகக் குத்தகைக்கு தருமாறு கோரின.

இதன்படி அவற்றுக்குக் குறுகிய கால அடிப்படையில் ஒரு தொகுதி காணிகள் வழங்கப்பட்டன. இதற்கான சிபாரிசை மாவட்டச் செயலர் வழங்கியிருந்தார். ஆனால், Nothern Agro Multi Farm (Pvt( Ltd தனது வேலைத்திட்டத்தை விரிவாக்கும்பொழுது இந்தக் காணிகள், Nothern Agro Multi Farm (Pvt( Ltd தின் பொறுப்பிற்குச் செல்லும்.

ஆகவே அதுவரையில் மீதிக் காணியில் Nothern Agro Multi Farm (Pvt( Ltd தன்னுடைய நடவடிக்கைகளை மேற்கொண்டு வந்தது. இந்தப் பண்ணைத்திட்டத்தில் 15 பேர் தற்போது நிரந்தரமாக வேலை செய்து வருகின்றனர்.

எதிர்காலத்தில் இது முழு அளவில் விரிவாக்கம் செய்யப்படும்போது சுமார் 300 பேருக்கான வேலை வாய்ப்பு வழங்கப்படும் என மதிப்பிடப்பட்டுள்ளது. ஆனால், இங்கேதான் பிரச்சினை உருவாகத் தொடங்கியது.

sri-ma1-e1440796941675 நீயா நானா? விக்கினேஸ்வரனுடன் மோதும் சிறிதரன் - மத்தியா மாகாணமா அதிகாரப்போட்டி! - கருணாகரன் (கட்டுரை) நீயா நானா? விக்கினேஸ்வரனுடன் மோதும் சிறிதரன் - மத்தியா மாகாணமா அதிகாரப்போட்டி! - கருணாகரன் (கட்டுரை) sri ma1 e1440796941675இரண்டாம் கதை

——————————-

முதலமைச்சரின் தீர்மானத்தின்படி Nothern Agro Multi Farm (Pvt( Ltd க்குக் கரும்புத் தோட்டக் காணியை வழங்க முடியாது என்ற அதிரடி முடிவை எடுத்தார் பாராளுமன்ற உறுப்பினர் சிவஞானம் சிறிதரன்.

அதாவது மாகாண முதலமைச்சரின் நிர்வாக ரீதியான அறிவித்தலையும் கொள்கைத்தீர்மானத்தையும் மேவி, இந்த அறிவிப்பைச் செய்தார் சிறிதரன். இதனால் அதிகாரிகள் குழம்பிப்போய் விட்டனர்.

Nothern Agro Multi Farm (Pvt( Ltd நிறுவனமும் தனது அடுத்த கட்டப் பணிகளை விரிவாக்கம் செய்ய முடியாமல் தடுக்கப்பட்டுள்ளது. தமக்கான வேலைவாய்ப்புகள் கிடைக்கும் என்ற நம்பிக்கையோடிருந்த பிரதேச மக்கள் ஏமாற்றத்துக்குள்ளாகியுள்ளனர்.

இப்பொழுது முதலமைச்சரின் அறிவுறுத்தலைக் கேட்பதா? பாராளுமன்ற உறுப்பினரின் கட்டளையை நடைமுறைப்படுத்துவதா (அதாவது மத்தியின் பேச்சைக் கேட்பதா அல்லது மாகாணத்தின் பேச்சைக் கேட்பதா) என்று தெரியாத நிலையில் கிளிநொச்சியிலுள்ள நிர்வாக அதிகாரிகள் தடுமாறிக் கொண்டிருக்கிறார்கள்.

இதைப்போன்று கடந்த சில மாதங்களுக்கு முன்பு, வடமாகாணக் கல்வி அமைச்சராக திரு. த. குருகுலராஜா இருந்த காலத்தில், கிளிநொச்சி மாவட்டப் பாடசாலைகளிலும் கல்வி வலயத்திலும் சிறிதரன் பல அரசியல் தலையீடுகளைச் செய்திருந்தார். இதனை அவரே, அவரை அறியாமல் சில சந்தர்ப்பங்களில் வெளிப்படுத்திய ஆதாரங்கள் கடந்த காலத்தில் வெளியாகிச் சர்ச்சைகளை உண்டாக்கியிருந்தன.

மாகாணசபையின் விவகாரங்களில் தேவையற்ற அரசியல் தலையீட்டையும் குழப்பங்களையும் உண்டாக்கும் செயற்பாட்டைச் சிறிதரன் தொடர்ச்சியாகவே செய்து வருகிறார் என்பது பலருடைய கருத்து. இதற்கு மேலும் சில உதாரணங்கள்.

1. வடமாகாண நிதி ஒதுக்கீட்டிலும் ஏற்பாட்டிலும் மேற்கொள்ளப்பட்ட தட்டுவன்கொட்டிப் பாலத்தை மாகாணசபைக்கே தெரியாமல், அவசர அவசரமாகச் சென்று திறந்து வைத்தமை. (இதில் எட்டுப்பேர்வரையில்தான் கலந்து கொண்டனர் என்பது குறிப்பிடத்தக்கது).

2. இதைப்போன்று கடந்த சில மாதங்களுக்கு முன்பு கிளிநொச்சி மாவட்டக் கூட்டுறவாளர்கள் கூட்டுறவு தினத்தை நடத்துவதற்கு முற்பட்டவேளை, அதிலும் தான் முதன்மைப்பிரதிநிதியாகக் கலந்து கொள்ள வேண்டும் என்ற வற்புறுத்தலைச் செய்திருந்தமை. அத்துடன், வடமாகாணக் கூட்டுறவு அமைச்சர் திருமதி அனந்தி சசிதரனை ஓரங்கட்டப்படுவதற்குரிய நெருக்கடிகளும் உருவாக்கப்பட்டன. எனினும் அதையும் மீறி அனந்தி சசிதரன் அந்த நிகழ்ச்சியில் ஒரு சவாலாகவே கலந்து கொண்டிருந்தார்.

3. அடுத்த சம்பவம், இராமநாதபுரம் மகாவித்தியாலயத்தின் வைரவிழாவின்போது வடமாகாண கல்வி அமைச்சரைப் புறந்தள்ளி விட்டு, மாகாண நிர்வாகத்தின் அறிவுறுத்தலை மீறி விழாவை நடத்துவதற்குத் தூண்டியமை.

4. இப்பொழுது இதேவழியில் ஏற்கனவே ஏற்பாடு செய்யப்பட்டு நடைபெற்றுவரும் ஊற்றுப்புலம் பாலத்தைத் திறந்து வைப்பதற்கான அத்துமீறிய முயற்சியிலும் ஈடுபட்டு வருகிறார்.

இவைபோன்று பல சம்பவங்கள்.

ஆனால், தன்னுடைய நடவடிக்கைகளை இந்த விடயத்தில் ஒழுங்கு முறைப்படி செய்திருக்கிறார் முதலமைச்சர். அவர், வடமாகாணக் காணி ஆணையாளர், மாவட்டச் செயலர், பிரதேச செயலர் ஆகியோருக்கு தன்னுடைய தீர்மானங்களை நடைமுறைப்படுத்துமாறு கடிதங்கள் எழுதியிருக்கிறார். – எழுத்து மூல ஆவணங்களை வழங்கியிருக்கிறார். முதலில் நடவடிக்கைக்கான கடிதம், பின்னர் மீள நினைவு படுத்தற் கடிதங்கள் எனப் பல கடிதங்கள்.

ஆனால், இந்தக் கடிதங்களுக்கான நடவடிக்கைகள் எடுக்கப்படாமல் சிறிதரனால் வாய்மொழி மூலம் தடுக்கப்பட்டுள்ளன. கவனிக்கவும் முதலமைச்சரின் ஆணைகள் எழுத்து மூலமானவை. சிறிதரனின் கட்டுப்பாடுகளும் ஆணைகளும் வாய்மொழி மூலமானவை.

இதைக்குறித்து குறித்த அதிகாரிகளில் ஒருவரிடம் கேட்டேன், “முதலமைச்சரின் அறிவுறுத்தலை மீறுகிறீர்களே. இது சட்டரீதியாகவும் நிர்வாக ரீதியாகவும் சரியானதா?” என்று.

இதற்கு அவர் சொன்னார், “இதிலே சரி பிழை என்பதற்கு அப்பால், மாகாணசபை இன்னும் ஒரு வருடத்துக்குள் கலைக்கப்பட்டு விடும். அப்போது விக்கினேஸ்வரன் முதலமைச்சராக இருக்க மாட்டார். ஆனால், பாராளுமன்றம் கலைக்கப்படுவதற்கு இன்னும் மூன்று ஆண்டுகளுக்கு மேல இருக்கு. அந்த மூன்று ஆண்டுகளும் நாங்கள் தாக்குப்பிடிக்க வேணுமே… இப்ப சொல்லுங்கோ, நாங்கள் யாருடைய சொல்லைக் கேட்கிறதெண்டு…” என.

இங்கே நீதியான, நியாயமான, சரியான வேலைகளைச் செய்வதையும் விட தங்களுடைய தலைகளை – நிலைகளைக் காப்பாற்றிக்கொள்வதற்கே பொறுப்பான அதிகாரிகள் முயற்சிக்கிறார்கள். அந்தளவுக்கு அதிகார மிரட்டல் தலையெடுத்துள்ளது.

இதேவேளை கரைச்சிப் பிரதேச ஒருங்கிணைப்புக் குழுக்கூட்டத்தில் முதலமைச்சர் விக்கினேஸ்வரன் கலந்து கொள்ளாத ஒரு சந்தர்ப்பத்தைப் பயன்படுத்தி, குறித்த காணியை மக்களுக்குப் பிரித்துக் கொடுக்க வேண்டும் என்ற தீர்மானத்தை எடுத்தார் சிறிதரன்.

இந்தச் சந்தர்ப்பத்தில் அந்தக் கூட்டத்தில் பங்கேற்றிருந்த இன்னொரு தலைவரான விஜயகலா மகேஸ்வரன் இதை மறுத்து, முதலமைச்சரின் தீர்மானத்துக்கே இதை விடுவோம் என்று கூறியிருந்தார்.

ஆனாலும் தான் எடுத்த தீர்மானத்தையே நடைமுறைப்படுத்துவதற்கு முயற்சித்துக் கொண்டிருக்கிறார் சிறிதரன். இதனால் இந்தப் பிரச்சினை பல சிக்கல்களை உருவாக்கியுள்ளது.

இந்த நிலைமை நீடித்தால் இந்த விவகாரத்தில் மத்திய அரசாங்கம் தலையிடுவதற்கான வாய்ப்புகளே அதிகமாக உண்டு. இப்போதுள்ள நிலைமையும் அதை நோக்கியே சென்று கொண்டிருக்கிறது.

இந்தப் பிரச்சினை நீடிக்கும்போது, இது மத்திய காணி ஆணையாளருடைய அனுமதியைப் பெற்றே நடவடிக்கை எடுக்கப்பட வேண்டிய அளவுக்கு மாறப்போகிறது. குளத்தைக் கலக்கிப் பருந்துக்கு விருந்தளித்த நிலையை உருவாக்கிக் கொண்டிருக்கிறார் சிறிதரன் எனப் பலரும் கண்டிக்கின்றனர்.

விக்கினேஸ்வரனுடன் தனிப்பட்ட ரீதியில் ஏற்பட்டுள்ள முரண்பாட்டை பொதுப்பிரச்சினையில் சாதிக்கிறார் சிறிதரன் என்பது இவர்களுடைய அபிப்பிராயம்.

குறிப்பாக மாகாண அதிகாரத்தை மத்திய அரசிடம் தாரை வார்த்துக் கொடுப்பதற்கு சிறிதரனின் நடவடிக்கைகள் அமைகின்றன. இது எதிர்காலத்தில் மிகப் பாரதூரமான விளைவுகளுக்கான முன்னுதாரணமாக அமைந்து விடும் என்று இவர்கள் எச்சரிக்கிறார்கள்.

மத்திய அரசின் தலையீட்டை எதிர்க்க வேண்டிய சூழலில் அதை வலிந்து ஏற்படுத்த முனைவது அரசியல் ரீதியாகப் பாரதூரமான விளைவாகும். மாகாணத்தின் அதிகாரத்தைப் பலப்படுத்தி, அதை நடைமுறைக்குக் கொண்டு வருவதே சிறப்பு.

இதற்காகப் பெரும் போராட்டங்களை நடத்திக் கொண்டிருக்கும் ஒரு இனத்தின் அடிப்படையைத் தனிப்பட்ட கோபதாபங்கள், தனியான அரசியல் நலன்களுக்காகப் பயன்படுத்துவது தவறானதாகும். இதற்குக் கூட்டமைப்பின் தலைமைப்பீடமோ, தமிழரசுக் கட்சியோ மக்கள் அமைப்புகளோ இடமளிக்கக்கூடாது என்று கூறப்படுகிறது. உண்மையும் அதுதான்.

இந்த விவகாரத்தை சிறிதரன் தன்னுடைய தனிப்பட்ட அரசியல் நலனுக்காக இரண்டு வகையில் பயன்படுத்த விளைகிறார். ஒன்று விக்கினேஸ்வரை எதிர்ப்பதற்காக.

கரும்புத்தோட்டக்காணியை Nothern Agro Multi Farm (Pvt( Ltd வழங்குவதைத் தடுத்து நிறுத்தி, மாகாணமுதலமைச்சரின் அதிகாரத்தை விடத் தானே முதன்மையானவர் என்று காட்ட முற்படுவது. இதன்மூலம் விக்கினேஸ்வரனை மதிப்பிறக்கம் செய்து அவரைப் பழிவாங்குவது.

மற்றது இந்தக் காணியை தன்னுடைய ஆதரவாளர்களுக்குப் பகிர்ந்தளிப்பதன் மூலம் அவர்களின் மூலமாகத் தனக்குரிய ஆதரவைப் பெருக்கிக் கொள்வதற்காக.

இதற்காக கரும்புத்தோட்டக் காணியை அத்துமீறிக் கைப்பற்றும் நடவடிக்கைகளும் சிறிதரன் எம்பியினால் தூண்டிவிடப்பட்டன. இதையிட்டு ஒரு எச்சரிக்கை அறிவிப்பை முதலமைச்சர் அக்கராயன் பிரதேச பொலிஸ் பொறுப்பதிகாரிக்கு கடிதம் மூலமாகத் தெரிவித்திருந்ததால் அந்த முயற்சிகள் கைவிடப்பட்டன.

இதனையடுத்து இந்தக் காணியை போராளிகளாக இருந்தவர்களுக்குப் பகிர்ந்தளிக்க வேண்டும் என்ற கோரிக்கையுடன் அக்கராயன் பிரதேசத்திலிருந்து ஒரு பஸ்வண்டியில் 60 பேர் வரையிலானவர்கள் கிளிநொச்சி நகரத்துக்குக் கொண்டு வரப்பட்டு ஒரு போராட்டம் கடந்த 04.10.2017 இல் நடத்தப்பட்டது.

இதை வழிநடத்தியவர்கள் அக்கராயன் பிரதேசத்தின் தமிழரசுக் கட்சி இணைப்பாளரும் முன்னாள் பிரதேச சபை உறுப்பினரும் மற்றும் சில ஆதரவாளர்களுமாகும்.

இதற்கு ஆதரவாக Nothern Agro Multi Farm (Pvt( Ltd என்ற தனியார் நிறுவனத்தினருக்கு (இவர்கள் தனவந்தர்கள் எனக் குறிப்பிட்டு) காணியை வழங்க முடியாது என மாகாணசபை உறுப்பினர் சு. பசுபதிப்பிள்ளை மாகாணசபையில் குறிப்பிட்டிருந்தார்.

இதில் வேடிக்கைக்குரிய சங்கதி என்னவென்றால், சில மாதங்களுக்கு முன்பு வரை, முதலமைச்சர் விக்கினேஸ்வரனை ஒரு பயன்பாட்டுப்பொருளாகப் பாவித்தவர்கள் இதே சிறிதரன் அணியினர்.

கிளிநொச்சியில் நடக்கின்ற நிகழ்வுகள் அனைத்துக்கும் விக்கினேஸ்வரனை அழைத்துக் கொண்டாடினார்கள். அப்பொழுது சுமந்திரன் அணியினர் பொருட்படுத்தப்படவில்லை.

வடமாகாணசபையில் தமிழரசுக்கட்சியினருக்கும் விக்கினேஸ்வரனுக்குமிடையில் ஏற்பட்ட முரண்பாடுகளுக்குப் பிறகு, சிறிதரன் சுமந்திரனின் கால்களில் வீழ்ந்து விட்டார். இதற்காக – சுமந்திரனுக்காக – விக்கினேஸ்வரனுடன் வலியச் சண்டையிட்டுக்கொண்டிருக்கிறார். இதன் விளைவுகளே மேற்படி அத்துமீறல்கள்.

இவ்வாறு சர்ச்சைகளில் சிக்கியுள்ள இந்த விவகாரம் தற்போது மத்திய அரசின் காணி ஆணையாளரின் தலையீட்டுக்கே வழியை ஏற்படுத்தியுள்ளது.

இப்போதுள்ள காணிச் சட்டத்தின்படி காணிகள் எதையும் குத்தகைக்கு வழங்குவதாயின் மத்திய அரசின் ஒப்புதலுடன், மத்திய காணி ஆணையாளரின் மூலமே அதை வழங்க முடியும். ஆனால், இதை பிரதேச செயலர்களின் மூலம் நடைமுறைப்படுத்தி வருகிறது மத்திய காணி ஆணையாளர் அலுவலகம். இந்தக் காணி விவகாரம் இந்தக் குத்தகையைப் புதிதாக வழங்குவதல்ல. இதை நீடிப்புச் செய்வதேயாகும்.

இதேவேளை காணியற்ற போராளிகளுக்குக் காணி வழங்குவதற்கு இந்தக் காணி வேண்டும் என்று கூறப்படுவதையும் பொருத்தமான – நியாயமான காரணமாகக் கொள்ள முடியாது.

இதையும் விடக் குடியிருப்புக்கும் பயிர்ச்செய்கைக்கும் பொருத்தமான காணிகள் பலவற்றை இதே சிறிதரன் வெளிநாடுகளில் வாழ்கின்ற தனவந்தவர்களுக்குக் கொடுப்பதற்கு பிரதேச செயலர்களை அறிவுறுத்தி அவை வழங்கப்பட்டுள்ளன.

உதாரணமாகக் கிளிநொச்சி நகரத்துக்கு அண்மையாக உள்ள திருவையாறுப் பகுதியில் 14 ஏக்கர் நிலம் அவ்வாறு வழங்கப்பட்டதில் ஒன்றாகும். (விரைவில் இதைப்பற்றிய முழுமையான அறிக்கை வெளியாகும்).

முதலமைச்சரின் நடவடிக்கைகள் தவறு என்றால் அதை உரிய முறையில் அவரிடம் சிறிதரன் சுட்டிக்காட்டியிருக்கலாம். அல்லது இதை கட்சியின் உயர் மட்டத்துக்கு எடுத்துச் சென்றிருக்க முடியும்.

அல்லது மாகாணசபை உறுப்பினர்களை அழைத்து அவர்களுக்கு விளக்கமளித்து, விக்கினேஸ்வரனுக்கு உள் அழுத்தங்களைக் கொடுத்திருக்கலாம். இதுதான் பொருத்தமான – பாதுகாப்பான நடைமுறை. அப்படி எதுவுமே செய்யப்படவில்லை.

ஆகவே மாகாண நிர்வாகத்தில் தலையீடுகளையும் குழப்பங்களையும் உண்டாக்குவதில் சிங்கள ஆதிக்க அரசாங்கம் மட்டும் ஈடுபடவில்லை.

நம்முடைய ஆட்களே – உள்வீட்டாரே ஈடுபடுகிறார்கள். “அதிகாரப்போட்டி” என்றால் அதில் அண்ணன் தம்பி கிடையாது என்று சும்மாவா சொன்னார்கள்.

“அரசியலில் இதெல்லாம் சகஜமப்பா” என்று இதையும் சொல்லி விட்டுச் சென்று விடலாமா? அல்லது உண்மைகளைக் கண்டறிந்து அதைப்பற்றிய கேள்விகளை எழுப்ப வேண்டுமா?

இது உண்மைக்காகவும் நீதிக்காகவும் போராட வேண்டிய காலம். நாம் போராடிக் கொண்டிருக்கும் மக்கள். பெரும் போராட்டங்களுக்கும் தியாகங்களுக்கும் உரித்தானவர்கள். உண்மையும் நேர்மையும் கௌரவமுமே எங்கள் வாழ்க்கையின் அடையாளங்கள். அதிகாரத்தை இழப்பதா அதைப் பெறுவதா என்பதை முடிவு செய்ய வேண்டியவர்களாக நாமிருக்கிறோம்.

ஆகவே போராடிப் பெற்ற அதிகாரங்களை, இந்த மாதிரி வெற்று வேட்டுகளின் அதிகாரப் போட்டியில் பலியிடுவதற்கு யாரும் அனுமதிக்க முடியாது. இது நீதிக்காகக் குரலை உயர்த்த வேண்டிய காலம். இந்தப் பொறுப்பு எல்லோருக்குமுரியது.

00 (05.11.2017) யாழ்ப்பாணத்திலிருந்து வெளியாகும் “தீபம்” இதழில் வெளியான கட்டுரை)

- கருணாகரன்

Related Articles

0 Comments

No Comments Yet!

There are no comments at the moment, do you want to add one?

Write a comment

Write a Comment

Your email address will not be published.
Required fields are marked *

*

ilakkiyainfo Tweets

Facebook Like Box

Contact Us

news@ilakkiyainfo.com

Email Subscription

தினமும் பதிவுகளை மின்னஞ்சல் மூலம் பெற்றிட

Enter your email address:

Delivered by FeedBurner

December 2017
M T W T F S S
« Nov    
 123
45678910
11121314151617
18192021222324
25262728293031

Latest Comments

இவர்கள் எல்லா யாழ் பாணிகளை போல் பிரபாகனிசத்தை பின் பற்றுபவர்கள் , மாவீரர் தினம் [...]

டிரம்ப் செய்துள்ள ஒரே நல்ல விடையம் இது தான். [...]

chechi your dance is superb... Tamil News Bulletin [...]

எனது வாக்கும் கோத்தபாய ராஜபக்‌ஷ க்கே , இந்த நாட்டிடை நிர்வகிக்க இவர் தான் சரியான ஆள் , அந்த [...]

ஜெயா ஒரு தேவடியா என்று நான் பல முறை கருத்து தெரிவித்து உள்ளேன் , ஒரு [...]

இலங்கை பத்திரிகைகள்

English News