உலகின் மிகப்பெரிய பிரேமாக ‘துபாய் பிரேம்’ தெரிவு செய்யப்பட்டு கின்னஸ் சாதனை பட்டியலில் இடம் பிடித்துள்ளது .
துபாய் ஜபீல் பூங்கா அருகே செவ்வக வடிவிலான பிரமாண்ட புகைப்பட சட்டம்போல ‘துபாய் பிரேம்’ என்ற கட்டுமானம் அமைந்துள்ளது . இது 492 அடி உயரமும், 305 அடி அகலமும் கொண்டதாக உருவாக்கப்பட்டுள்ளது.
தொலைவில் இருந்து பார்த்தால் ஒரு புகைப்பட சட்டத்திற்குள் துபாய் நகரம் இருப்பது போல் தெரியும். இது இரும்பு தளவாடங்கள் மற்றும் கொங்கிரீட் போன்றவற்றால் முப்பரிமாண பிரதியெடுக்கும் முறையில் வடிவமைக்கப்பட்டுள்ளது. மேற்புறத்தில் தங்கநிற உலோக தகடுகளால் வேலைப்பாடுகள் செய்யப்பட்டுள்ளன.
இதன் உட்புறம் மற்றும் மேற்புறம் மூடப்பட்டு குளிரூட்டப்பட்ட கண்ணாடிகளால் சூழப்பட்ட நடைமேடையும், இருபுறங்களில் ‘லிப்ட்’ வசதியும் செய்யப்பட்டுள்ளது .
இதன் உச்சியில் நின்று 360 டிகிரி கோணத்தில் துபாய் நகரின் அழகை ரசிக்க முடியும். இந்த துபாய் பிரேம் கடந்த ஆண்டு ஜனவரி மாதம் 1ஆம் திகதி திறக்கப்பட்டது.
இதை ஒரே நேரத்தில் 200 பேர் பார்வையிடலாம். ‘துபாய் பிரேம்’ கட்டுமானம் போல் பிரமாண்டமான பிரேம் உலகில் வேறு எந்த இடங்களிலும் உருவாக்கப்படவில்லை. எனவே உலகின் மிகப்பெரிய பிரேமாக ‘துபாய் பிரேம்’ தெரிவு செய்யப்பட்டு கின்னஸ் சாதனை பட்டியலில் இடம் பிடித்துள்ளது.
இது தொடர்பில் நடைபெற்ற நிகழ்வில் கின்னஸ் நிறுவன அதிகாரி தலால் ஒமரால் துபாய் மாநகராட்சி பொது இயக்குநர் தாவூத் அல் ஹாஜிரியிடம் கின்னஸ் சான்றிதழ் வழங்கிவைக்கப்பட்டது.
