குருநாகல் அலவ்வ ராகுல மகா வித்தியாலயத்தில் க.பொ.த உயர்தரத் தேர்வு எழுதச் சென்ற 19 வயது மாணவி, தவறுதலாக கொழும்பு–மட்டக்களப்பு எக்ஸ்பிரஸ் ரயிலில் ஏறியதால் பெரும் குழப்ப நிலை ஏற்பட்டது.
அலவ்வ ரயில் நிலையத்தில் ரயில் நின்று செல்லாததால் அதிர்ச்சியடைந்த மாணவி அழுத நிலையில் இருக்கும்போது, ரயிலில் பயணித்த விரிவுரையாளர் சுரஞ்சித் ரத்னபால அவளை சமாதானப்படுத்தி உதவ முனைந்தார்.
உடனடியாக ரயில்வே கட்டுப்பாட்டு அறையுடன் தொடர்பு கொண்டு தகவல் தெரிவித்த அவர், மனிதாபிமானத்துடன் செயல்பட்ட அதிகாரி சஜித் விக்ரமசிங்கவின் ஒருங்கிணைப்பில், பொல்கஹவெல ரயில் நிலையத்தில் கண்டி–கொழும்பு ரயில் சிறப்பாக நிறுத்தப்பட்டு மாணவி அதில் மாற்றி ஏற்றப்பட்டார்.
அதனைத் தொடர்ந்து, ரயில்வே பாதுகாப்பு அதிகாரி நிமல் ரூபசிங்க மேற்கொண்ட ஏற்பாட்டில் முச்சக்கர வண்டி மூலம் மாணவி சரியான நேரத்தில் பரீட்சை நிலையத்தை சென்றடைந்தார்.
சினிமாவை நினைவூட்டும் இந்த மனிதாபிமான செயல், ரயில்வே அதிகாரிகள், பயணிகள், பொதுமக்களின் ஒற்றுமையை வெளிப்படுத்தும் ஒரு நெகிழ்ச்சியான நிகழ்வாக சமூக வலைதளங்களில் பரவலாகப் பாராட்டப்படுகிறது.
