தீவிர மழை காரணமாக நாட்டின் பல நதிகள் மற்றும் ஓயாக்களின் நீர்மட்டம் வேகமாக உயர்ந்து வருவதால், பெரிய அளவிலான வெள்ள நிலைமை உருவாகக்கூடிய அபாயம் உள்ளதாக நீர்ப்பாசனத் திணைக்களம் அவசர எச்சரிக்கை விடுத்துள்ளது.
தெதுரு ஓயா படுகையில் உள்ள வாரியபொல, நிக்கவெரட்டிய, மஹவ, கொபெய்கனே, பிங்கிரிய, பள்ளம, சிலாபம், ஆராச்சிக்கட்டுவ மற்றும் ரசநாயக்கபுரம் போன்ற தாழ்நிலப் பகுதிகளில் வெள்ளம் மேலும் தீவிரமடையக்கூடும் என குறிப்பிடப்பட்டுள்ளது.
மேலும், கும்பக்கன ஓயா மற்றும் நில்வளா கங்கை படுகைகளிலும் நீர்மட்டம் உயர்வதால் மொனராகலை, புத்தலம் உள்ளிட்ட பல கிராமங்களில் பெரும் வெள்ள அபாயம் தொடர்கிறது. நக்கல, ஒக்கம்பிட்டிய, காமினிபுரம் போன்ற பகுதிகள் அதிக ஆபத்துக்குள்ளாக உள்ளன.
அத்துடன், களனி கங்கை மற்றும் மகாவலி கங்கை படுகைகளுக்கும் அருகிலுள்ள யட்டிநுவர, கங்கவட்ட கோரளை, ருவான்வெல்ல, கண்டி–கன்னோருவ வீதி உள்ளிட்ட பகுதிகளில் சிறிய அளவிலான முதல் நடுத்தர அளவிலான வெள்ளம் ஏற்படும் சாத்தியம் உள்ளது.
மகா ஓயா மற்றும் கலா ஓயா படுகைகளில் நீர்மட்டம் தொடர்ச்சியாக உயர்வதால் அலவ்வ, திவுலபிட்டிய, மீரிகம, பன்னல, வென்னப்புவ, நீர்கொழும்பு, கட்டான, நாரம்மல, தங்கொட்டுவ, ராஜாங்கனை, நொச்சியாகம மற்றும் வனாத்தவில்லுவ பகுதிகளுக்கும் உடனடி அபாய எச்சரிக்கை விடுக்கப்பட்டுள்ளது.
இதனிடையே, கொழும்பு – கண்டி பிரதான வீதியின் பஹல கடுகன்னாவ பிரிவில் ஏற்பட்ட மண்சரிவின் காரணமாக அந்த வீதி தற்காலிகமாக மூடப்பட்டுள்ளது.
பொதுமக்கள் மிகுந்த விழிப்புடன் இருக்கவும், அதிகாரிகளின் அறிவுறுத்தல்களைப் பின்பற்றவும் நீர்ப்பாசனத் திணைக்களம் அறிவுறுத்தியுள்ளது.