ஜப்பானின் வடகிழக்கு பிராந்தியத்தை இன்று (12) காலை சக்திவாய்ந்த நிலநடுக்கம் ஒன்று அதிர்ச்சியடைய செய்தது. ரிக்டர் அளவுகோலில் 6.7 என பதிவான இந்த நிலநடுக்கம், அமோரி (Aomori) மாகாணத்தின் கடற்கரைக்கு அருகே, அந்நாட்டு நேரப்படி காலை 11:44 மணியளவில் ஏற்பட்டுள்ளது.
ஜப்பானிய வானிலை ஆய்வு மையம் தெரிவித்ததாவது, நிலநடுக்கத்தின் மையம் சுமார் 20 கிலோமீட்டர் ஆழத்தில் இருந்ததாகவும், இது கடலடியில் ஏற்பட்ட அதிர்வாக அமைந்துள்ளதாகவும் கூறியுள்ளது.
சுனாமி எச்சரிக்கை அறிவிப்பு
நிலநடுக்கத்துக்கு பின், ஜப்பானிய அதிகாரிகள் சுனாமி எச்சரிக்கையை உடனடியாக வெளியிட்டுள்ளனர். கடலில் 1 மீட்டர் (39 அங்குலம்) வரை உயரமான அலைகள் உருவாகக்கூடும் என்பதால், கடற்கரை பகுதிகளில் வாழும் மக்கள் அனைவரும் பாதுகாப்பான இடங்களுக்கு நகருமாறு அறிவுறுத்தப்பட்டுள்ளனர்.
அதிகாரிகள் மக்கள் தேவையற்ற பயம் கொள்ள வேண்டாம் என்றாலும், தேவையான முன் எச்சரிக்கை நடவடிக்கைகளை அவசியம் மேற்கொள்ள வேண்டும் என்றும் கூறியுள்ளனர்.
அதே பகுதியில் தொடர்ச்சியான நில அதிர்வுகள்
இதற்கு இரண்டு நாட்களுக்கு முன், கடந்த திங்கட்கிழமையும் அதே பிராந்தியத்தில் 7.5 ரிக்டர் அளவில் சக்திவாய்ந்த நிலநடுக்கம் ஏற்பட்டிருந்தது. அந்நிகழ்வின் பின்னணியில், ஹொக்கைடோ (Hokkaido) முதல் சிபா (Chiba) வரை நீளமான கிழக்கு ஜப்பான் பகுதிகள் அதிக ஆபத்து வாய்ந்த பிராந்தியங்களாக எச்சரிக்கப்பட்டது.
அந்நாட்கள் முழுவதும் தொடர்ச்சியாக நிலநடுக்க அச்சுறுத்தல் இருப்பதாகவும், மக்கள் எச்சரிக்கையுடன் இருக்க வேண்டும் என்றும் அரசு அதிகாரிகள் மீண்டும் வலியுறுத்தினர்.
சேதம் எவ்வளவு?
தற்போதைய நிலவரப்படி மனித உயிரிழப்பு அல்லது பெரிய அளவிலான கட்டமைப்பு சேதம் எதுவும் பதிவாகவில்லை. எனினும், ஜப்பானிய மீட்பு குழுக்கள் மற்றும் வானிலை துறை இடையறாது கண்காணித்து வருகிறது.