ஐக்கிய அரபு அமீரகத்தின் பல முக்கிய நகரங்கள் கனமழை மற்றும் திடீர் வெள்ளத்தால் பாதிக்கப்பட்டுள்ள நிலையில், விமான போக்குவரத்து கடுமையாக பாதிக்கப்பட்டுள்ளது. இதனைத் தொடர்ந்து அமீரக விமான நிலைய அதிகாரிகள் டசின் கணக்கான விமானங்களை ரத்து செய்ததோடு, பல விமான சேவைகள் நீண்ட நேரம் தாமதப்படுத்தப்பட்டுள்ளன.
வெள்ளத்தில் மூழ்கிய நகரங்கள்
துபாயின் எமிரேட்ஸ் விமான நிறுவனம் மட்டும் வெள்ளிக்கிழமை 13 விமானங்களை ரத்து செய்துள்ளது. இரவு முழுவதும் பெய்த கனமழை காரணமாக, அண்டை மாகாணமான ஷார்ஜா விமான நிலையத்திலும் விமான சேவைகள் தாமதம் மற்றும் ரத்துகள் அறிவிக்கப்பட்டன.
வெள்ளிக்கிழமை அதிகாலையில் ஷார்ஜா மாகாணத்தின் பிரதான சாலைகள் முற்றிலும் வெள்ளத்தில் மூழ்கின. பல பகுதிகளில் மக்கள் வெறுங்கால்களால் வெள்ள நீரில் நடந்து செல்லும் நிலை காணப்பட்டது.
முன்னைய அனுபவம் மீண்டும்
இதற்கு முன் 2024 ஏப்ரல் மாதத்திலும் ஐக்கிய அமீரகத்தில் இதேபோன்ற கனமழை பெய்தது. அப்போது துபாயின் முக்கிய சர்வதேச விமான நிலையத்தில் 2,000-க்கும் மேற்பட்ட விமான சேவைகள் ரத்து செய்யப்பட்டு, விமானப் போக்குவரத்து பல நாட்கள் முடங்கியது என்பது குறிப்பிடத்தக்கது.
வீடுகளுக்குள் இருக்க அறிவுறுத்தல்
இந்நிலையில், புயலுடன் கூடிய கனமழை நெருங்குவதாக எச்சரிக்கை விடுக்கப்பட்டதைத் தொடர்ந்து, முற்றிலும் அவசியமான சூழ்நிலை தவிர வீடுகளுக்குள் இருப்பதையே குடியிருப்பாளர்கள் பின்பற்ற வேண்டும் என துபாய் காவல்துறை வலியுறுத்தியது.
நீர் அகற்றும் பணிகள் தீவிரம்
துபாய் நகரின் பல பகுதிகளில் அடைபட்ட சாலைகள் மற்றும் தெருக்களில் தேங்கிய நீரை அகற்றும் பணியில் நீர் இறைக்கும் லாரிகள் தீவிரமாக ஈடுபடுத்தப்பட்டுள்ளன. தேசிய வானிலை ஆய்வு மையம், வியாழன் முதல் வெள்ளி வரை துபாய், அபுதாபி உள்ளிட்ட பகுதிகளில் கனமழை பெய்யக்கூடும் என முன்னரே எச்சரித்திருந்தது.
வளைகுடா நாடுகளிலும் தாக்கம்
ஐக்கிய அமீரகத்தைப் போலவே கத்தார் உள்ளிட்ட பிற வளைகுடா நாடுகளிலும் கனமழை பதிவாகியுள்ளது. கடந்த 76 ஆண்டுகளாக மழை தொடர்பான பதிவுகள் வைக்கப்பட்டு வரும் நிலையில், கடந்த ஆண்டு அமீரகத்தில் பெய்த கனமழை மிக மோசமானதாக கருதப்படுகிறது. அப்போது துபாய் பல நாட்கள் செயலிழந்ததுடன், மழை தொடர்பான சம்பவங்களில் குறைந்தது நான்கு பேர் உயிரிழந்ததாகவும் தகவல்கள் வெளியாகியிருந்தன.
தற்போதைய கனமழை நிலவரம் தொடர்பாக அதிகாரிகள் தொடர்ந்து கண்காணித்து வருகின்றனர்; மக்கள் பாதுகாப்பு அறிவுறுத்தல்களை கடைபிடிக்குமாறு வலியுறுத்தப்பட்டுள்ளனர்.