முன்னாள் ஜனாதிபதி மகிந்த ராஜபக்ச தற்போது கொழும்பில் வாடகை வீட்டில் தங்கி வருகிறார் என அரசியல் வட்டாரங்களில் இருந்து தகவல்கள் வெளியாகியுள்ளன.
அதன்படி, அவர் நுகேகொட பகுதியில், தனது நெருங்கிய நண்பருக்குச் சொந்தமான வீட்டில் வாடகை அடிப்படையில் வசித்து வருவதாக தெரிவிக்கப்படுகிறது.
அதிகாரப்பூர்வ இல்ல வசதி இரத்து
முன்னாள் ஜனாதிபதிகளுக்கு வழங்கப்பட்டு வந்த அரசின் அதிகாரப்பூர்வ இல்ல வசதி சமீபத்தில் இரத்து செய்யப்பட்டது. இதன் தொடர்ச்சியாக, விஜயராம மாவத்தையில் அமைந்துள்ள அதிகாரப்பூர்வ இல்லத்தில் வசித்து வந்த மகிந்த ராஜபக்ச, கடந்த செப்டம்பர் 11ஆம் திகதி அந்த இல்லத்தை விட்டு வெளியேறினார்.
தங்கல்லை இல்லம் – பின்னர் நுகேகொட மாற்றம்
அதன்பின்னர், அவர் சில காலம் தங்கல்லை – காரலியவில பகுதியில் உள்ள தனது தனிப்பட்ட வீட்டில் தங்கியிருந்ததாகவும்,
கடந்த வாரம் மீண்டும் கொழும்பு நுகேகொட பகுதியில் உள்ள வாடகை வீட்டிற்கு இடம்பெயர்ந்துள்ளதாகவும் தெரிவிக்கப்படுகிறது.
காரணம் என்ன?
அரசியல் நடவடிக்கைகளை எளிதாக மேற்கொள்ளவும்,
மருத்துவ வசதிகளை விரைவாகப் பெறவும் வசதியாக இருக்க வேண்டும் என்ற காரணத்தினாலேயே,
கொழும்பு நகருக்கு அருகிலுள்ள இந்த வீட்டில் தங்க முடிவு எடுத்துள்ளதாக தகவல்கள் தெரிவிக்கின்றன.
இந்த வீடு, மகிந்த ராஜபக்ச அவர்களின் நெருங்கிய நண்பருக்குச் சொந்தமானது என்றும்,
வாடகை அடிப்படையில் பயன்படுத்தப்பட்டு வருகிறது என்றும் கூறப்படுகிறது.