விருஷபா திரை விமர்சனம்

மோகன்லால், ராகினி திவேதி நடிப்பில் மலையாளம் – தெலுங்கு மொழிகளில் உருவாகியுள்ள திரைப்படம் விருஷபா. இந்த படத்தை கன்னட இயக்குநர் நந்தா கிஷோர் இயக்கியுள்ளார். புராணம், மறுபிறவி, சாபம் என்ற அம்சங்களை மையமாக வைத்து உருவாக்கப்பட்டுள்ள இந்த படத்தின் திரை விமர்சனத்தை இங்கே பார்க்கலாம்.

கதைக்களம்

திரிலிங்க சாம்ராஜ்ஜியத்தின் அரசனான விஜயேந்திர விருஷபா (மோகன்லால்) ஒரு புனிதமான ஸ்படிக லிங்கத்தை பாதுகாத்து வருகிறார். அதை கொள்ளையடிக்க வரும் கும்பலுடன் அவர் போராடும் போது, தவறுதலாக ஒரு அம்பு குழந்தையின் கழுத்தில் பாய்ந்து அந்த குழந்தை உயிரிழக்கிறது.

இதனால் அந்த குழந்தையின் தாய், அரசன் விருஷபாவிற்கு ஒரு சாபம் விடுகிறார். நூற்றாண்டுகள் கடந்து, தற்போதைய காலத்தில் மும்பையில் பெரிய தொழிலதிபராக வாழ்ந்து வருகிறார் ஆதி தேவ் வர்மா (மோகன்லால்). அவருக்கு அடிக்கடி அரசன் விருஷபாவை பற்றிய கனவுகள் வருகின்றன.

ஆதி தேவ் வர்மாவின் மகன், தந்தையின் மனக்குழப்பத்திற்கு காரணம் என்ன என்பதை அறிந்து, அந்த பிரச்சனையை தீர்க்க முயற்சிக்கிறார். அரசன் விருஷபாவுக்கும், தொழிலதிபர் ஆதிக்கும் என்ன தொடர்பு? அந்த சாபம் நிறைவேறியதா? என்பதே மீதிக்கதை.

படம் பற்றிய அலசல்

முன் ஜென்ம சாபம் அடுத்த ஜென்மத்தில் தொடரும் கதைக்களம், ராஜமௌலியின் மகதீரா படத்தை நினைவுபடுத்துகிறது. ஆனால் அதே அளவிலான உணர்ச்சியோ, திரைக்கதை வலுவோ இதில் இல்லை.

மோகன்லால், அரசனாகவும் தொழிலதிபராகவும் இரு வேறு கேரக்டர்களில் நடித்துள்ளார். அவரது நடிப்பு மற்றும் ஆக்ஷன் காட்சிகள் படத்தின் முக்கிய பலமாக இருக்கின்றன. குறிப்பாக இடைவேளைக்கு முன் வரும் சண்டைக் காட்சி சிறப்பாக அமைந்துள்ளது.

அவரது மகனாக நடித்துள்ள சமர்ஜித் லங்கேஷ் ஆக்ஷன் காட்சிகளில் நன்றாக செயல்பட்டாலும், தந்தை–மகன் உறவில் தேவையான உணர்ச்சி ஆழம் இல்லை.

படத்தின் மிகப்பெரிய குறை என்னவென்றால், இது எந்த மொழிப்படம் என்பதே புரியாத மேக்கிங். காட்சிகள் தெலுங்கு மசாலா படங்களைப் போல் அமைந்துள்ளன; வசனங்கள் மலையாளத்தில் இருக்கின்றன; ஆனால் உச்சரிப்புகள் இயல்பாக இல்லை. மலையாள படம் என்று உணர வைப்பது மோகன்லால் மட்டுமே.

கேமரா வேலை, மேக்கிங், எடிட்டிங் எல்லாமே இந்தி டிவி சீரியல் பாணியில் இருப்பதால், படம் முழுக்க ஒரு செயற்கை உணர்வு ஏற்படுகிறது. காட்சிகள் திடீரென ஜம்ப் ஆகுவது, டப்பிங் சின்க் சரியில்லாதது போன்றவை பார்வையாளரை சோர்வடையச் செய்கின்றன.

நாயகி நயன் சாரிகா கேரக்டர் மிகவும் மேற்பரப்பாக எழுதப்பட்டுள்ளது. ஒரு காட்சியில் காதலை மறுக்கும் அவர், அடுத்த காட்சியிலேயே காதலிப்பது எந்த உணர்ச்சி காரணமும் இல்லாமல் நடைபெறுகிறது.

பண்டைய கால காட்சிகளில் பயன்படுத்தப்பட்ட கிராஃபிக்ஸ் தரமற்றதாக இருப்பதும், படத்தின் நம்பகத்தன்மையை குறைக்கிறது.

இசை

சாம் C.S. வழங்கிய பின்னணி இசை சில காட்சிகளில் உதவினாலும், முழு படமும் இசையால் நிரம்பியிருப்பது சீரியல் உணர்வை மேலும் அதிகரிக்கிறது.

முடிவு

மொத்தத்தில், விருஷபா என்பது பெரிய நட்சத்திரத்தை வைத்து எடுக்கப்பட்டாலும், திரைக்கதை, லாஜிக், மேக்கிங் ஆகியவற்றில் பெரிதும் சொதப்பிய படம். 2025 ஆம் ஆண்டின் மிகப்பெரிய ஏமாற்றங்களில் ஒன்றாகவே இது பார்க்கப்படுகிறது.

க்ளாப்ஸ்

• மோகன்லால் நடிப்பு

• சில ஆக்ஷன் காட்சிகள்

• பின்னணி இசை (சில இடங்களில்)

பல்ப்ஸ்

• கடுமையான லாஜிக் மீறல்கள்

• குழப்பமான மொழி & டப்பிங்

• சீரியல் போல மேக்கிங்

• உணர்ச்சியற்ற திரைக்கதை

ரேட்டிங்: 1.75 / 5

மொத்தத்தில்:
“விருஷபா” – மோகன்லால் ரசிகர்களுக்கே சோதனையாக அமைந்த படம்.