கடந்த டிசம்பர் 14-ஆம் திகதி சிட்னியின் போண்டாய் கடற்கரைப் பகுதியில் (Bondi Beach) ஹனுக்கா பண்டிகையின் போது நடத்தப்பட்ட துப்பாக்கிச் சூட்டில் 15 பேர் கொல்லப்பட்டனர். இந்தத் தாக்குதல் ஏற்படுத்திய சுவடுகள் இன்னும் மறையாத நிலையில், சிட்னி நகரம் “அமைதி மற்றும் ஒற்றுமை” என்ற தொனிப்பொருளில் புத்தாண்டைக் கொண்டாடியுள்ளது.
இந்த ஆண்டின் விசேட அம்சங்கள்:
-
அமைதியின் சின்னம்: உலகப்புகழ் பெற்ற சிட்னி ஹார்பர் பாலம் (Sydney Harbour Bridge) அமைதியை வலியுறுத்தும் வகையில் முழுவதும் வெண்மை நிற ஒளியால் அலங்கரிக்கப்பட்டிருந்தது.
-
யூத சமூகத்திற்கு ஆதரவு: தாக்குதலுக்குள்ளான யூத மக்களுக்கு ஒருமைப்பாட்டைத் தெரிவிக்கும் வகையில், பாலத்தின் தூண்களில் யூத மதச் சின்னமான ‘மெனோரா’ (Menorah) ஒளிப்படம் திரையிடப்பட்டது.
-
உச்சக்கட்ட பாதுகாப்பு: நகர் முழுவதும் 2,500-க்கும் மேற்பட்ட பொலிஸார் குவிக்கப்பட்டிருந்தனர். முன்னெப்போதும் இல்லாத வகையில் அதீத சக்திவாய்ந்த துப்பாக்கிகளை ஏந்திய பொலிஸார், ஒப்பேரா ஹவுஸ் உள்ளிட்ட மக்கள் கூடும் இடங்களில் தீவிர கண்காணிப்பில் ஈடுபட்டனர்.
-
மௌன அஞ்சலி: கொண்டாட்டங்களுக்கு மத்தியில், இரவு 11:00 மணியளவில் அனைத்து இசை நிகழ்வுகளும் நிறுத்தப்பட்டு, தாக்குதலில் பலியானவர்களுக்காக ஒரு நிமிடம் மௌன அஞ்சலி செலுத்தப்பட்டது.
சோகங்கள் ஒருபுறம் இருந்தாலும், அச்சுறுத்தல்களுக்கு அஞ்சாமல் ஒற்றுமையுடன் புத்தாண்டை எதிர்கொள்ளும் செய்தியைச் சிட்னி உலகுக்குச் சொல்லியுள்ளது.