ரயில் தண்டவாளத்தில் விபத்தில் சிக்கிய லொறி

கடலோர ரயில் போக்குவரத்துக்கு பெரும் பாதிப்பு

கடலோர ரயில் மார்க்கத்தில் அம்பலாங்கொடை – கரித்தகந்தை பகுதியில், 52 ½ மைல் தூண் அருகே லொறி ஒன்று தண்டவாளத்தில் வழுக்கிச் சென்று விபத்துக்குள்ளானதாக அம்பலாங்கொடை பொலிஸ் தெரிவித்துள்ளது.

இந்த விபத்து காரணமாக குறித்த ரயில் மார்க்கத்தில் ரயில் போக்குவரத்துகள் கடுமையாக பாதிக்கப்பட்டுள்ளன. தண்டவாளத்தில் லொறி சிக்கியுள்ளதன் காரணமாக, சுமார் 5 அலுவலக ரயில்கள் தாமதமாக இயக்கப்படுகின்றன எனவும் தெரிவிக்கப்பட்டுள்ளது.

சம்பவம் குறித்து தகவல் கிடைத்தவுடன், ரயில்வே திணைக்கள அதிகாரிகளும் பொலிஸாரும் சம்பவ இடத்திற்கு விரைந்து சென்று, தண்டவாளத்தில் சரிந்துள்ள லொறியை அகற்றும் பணிகளை மேற்கொண்டு வருகின்றனர்.

லொறியை முழுமையாக அகற்றி, ரயில் மார்க்கத்தை விரைவில் வழமைக்கு கொண்டு வர தேவையான நடவடிக்கைகள் தீவிரமாக முன்னெடுக்கப்பட்டு வருகின்றன என்றும் அதிகாரிகள் தெரிவித்துள்ளனர்.