அக்கா த்ரிஷா.. மதுரையைக் கலக்கும் போஸ்டர்கள்.. அந்த வசனத்தை கவனிக்கனுமே!

சென்னை: தமிழ் சினிமா மற்றும் தென்னிந்திய சினிமாவின் முன்னணி நடிகைகளில் ஒருவரான திரிஷாவை மையமாக வைத்து மதுரையில் ஒட்டப்பட்டுள்ள புதிய போஸ்டர்கள் தற்போது சமூக வலைதளங்களில் வைரலாகி வருகின்றன. "மதுரை மாவட்டம் திரிஷா நற்பணி மன்றம்" என்ற பெயரில் ஒட்டப்பட்டுள்ள இந்த போஸ்டர்களில், "தமிழக வீரமங்கை வேலுநாச்சியார் வழியில்" என்ற வாசகம் இடம்பெற்றிருப்பது பலரது கவனத்தையும் ஈர்த்துள்ளது

மதுரை பேருந்து நிலையம், மீனாட்சி அம்மன் கோயில் சுற்றுவட்டாரம் உள்ளிட்ட மக்கள் அதிகம் கூடும் பகுதிகளில் இந்த போஸ்டர்கள் ஒட்டப்பட்டுள்ளதாக கூறப்படுகிறது. போஸ்டரில் திரிஷாவின் புகைப்படத்துடன் ரசிகர் மன்ற நிர்வாகிகளின் படங்களும் இடம்பெற்றுள்ளன. மேலும், "தமிழக அரசு அங்கீகரிக்கப்பட்ட நற்பணி மன்றம்" என்ற வாசகமும் இடம் பெற்றிருப்பதால், சமூக வலைதளங்களில் இதுகுறித்து பல்வேறு விவாதங்கள் எழுந்துள்ளன.

கடந்த சில ஆண்டுகளாக திரிஷாவைச் சுற்றி அரசியல் களத்தில் அவ்வப்போது பல்வேறு யூகங்கள் வெளியாகி வருகின்றன. குறிப்பாக, அரசியல் நிகழ்வுகளில் அவர் பங்குபெற்ற தருணங்கள் ரசிகர்களிடையே அதிகம் பேசப்பட்டன. அதேநேரத்தில், இதுவரை அரசியலில் களமிறங்குவது தொடர்பாக நடிகை திரிஷா எந்தவித அதிகாரப்பூர்வ அறிவிப்பையும் வெளியிடவில்லை

இந்த போஸ்டர்கள் வெளியாகியிருக்கும் நிலையில், வரவிருக்கும் இடைத்தேர்தல் அரசியல் சூழலுடன் இதை தொடர்புபடுத்தியும் சமூக வலைதளங்களில் சிலர் கருத்துகளை பகிர்ந்து வருகின்றனர். திரிஷா அரசியலுக்கு வருகிறாரா, அல்லது இது ரசிகர்களின் உற்சாகமான முயற்சியா என்ற கேள்வியும் எழுந்துள்ளது. ஆனால், இதுகுறித்து உறுதியான தகவல் எதுவும் வெளியாகாததால், இவை அனைத்தும் தற்போது யூகங்களாகவே பார்க்கப்படுகின்றன.