அமைதி ஒப்பந்தத்தை ஈரான் நிராகரிப்பதால் மீண்டும் பதற்றம்!

ஈரான் மற்றும் அமெரிக்கா இடையேயான மோதல் முடிவுக்கு வரும் என்று எதிர்பார்க்கப்பட்ட நிலையில், தற்போது புதிய பதற்றம் ஏற்பட்டுள்ளது.

அமெரிக்க அதிபர் டொனால்ட் ட்ரம்ப் நிர்வாகம் அமைதி ஒப்பந்தம் கோரி பலமுறை தொடர்பு கொண்டாலும், ஈரான் அதை நிராகரித்து வருகிறது. இந்த நிலையில், இஸ்ரேல் தரப்பு ட்ரம்ப் மீது கடுமையான அழுத்தம் கொடுத்து வருவதாக தகவல்கள் வெளியாகியுள்ளன.

அமெரிக்கா மற்றும் ஈரான் இடையே மூன்று மாதங்களாக நீடித்த மோதலுக்கு தற்காலிக தீர்வு காணும் வகையில் 60 நாட்கள் போர்நிறுத்த ஒப்பந்தம் ஒன்று எட்டப்பட்டுள்ளதாக ப்ளூம்பெர்க் செய்தி நிறுவனம் தெரிவித்துள்ளது. ஈரானின் அணு ஆயுதத் திட்டம் தொடர்பான பேச்சுவார்த்தைகள் மேற்கொள்ளவும் இந்த ஒப்பந்தத்தில் இடம்பெற்றுள்ளன. இந்த முன்னேற்றம் உலகப் பொருளாதாரத்துக்கு நிம்மதியை அளித்துள்ளது.

ஆனால், இந்த ஒப்பந்தம் இன்னும் இறுதி செய்யப்படவில்லை என்பது குறிப்பிடத்தக்கது. இதற்கிடையில் இஸ்ரேல் மாற்றுத் திட்டத்தை முன்வைத்து அமைதி ஒப்பந்தத்தை ரத்து செய்ய டிரம்ப்பை தூண்டி வருகிறது.

ஈரான் தரப்பில் இருந்து வரும் தகவலின்படி, ட்ரம்ப் நிர்வாகம் ஒப்பந்தம் கோரி தினமும் பல்வேறு வழிகள் மூலம் தொடர்பு கொண்டு வருகிறது. ஆனால், ஈரான் தனது நிபந்தனைகள் முழுமையாக ஏற்கும் வரை எந்த பதிலும் அளிக்காது என்ற உறுதியான நிலைப்பாட்டில் உள்ளது. ஈரான் பாராளுமன்ற தலைவர் கலிபாப் உடன் நெருக்கமான வட்டாரங்கள், “ஈரான் ட்ரம்ப் நிர்வாகத்தின் மீது எந்த நம்பிக்கையும் வைக்கவில்லை” என்று தெரிவித்துள்ளன.

மேலும், நிதிச் சந்தைகள் மூடும் வரை காத்திருந்து ட்ரம்ப் ஒப்பந்தத்தை ரத்து செய்து தாக்குதலை மீண்டும் தொடங்கலாம் என்ற அச்சமும் ஈரான் தரப்பில் நிலவுகிறது.


இஸ்ரேல் தரப்பு, ஈரானின் பதிலடியால் வளைகுடா பகுதியில் ஏற்படும் பொருளாதார பாதிப்புகளைப் பொருட்படுத்தாமல் தாக்குதலைத் தொடர வேண்டும் என்ற நிலைப்பாட்டில் உள்ளது.


அடுத்த சில நாட்களில் இந்தப் பிரச்னைக்கு தீர்வு காணப்படுமா அல்லது மீண்டும் மோதல் தீவிரமடையுமா என்பதை உலகம் உன்னிப்புடன் கவனித்து வருகிறது.

இது இவ்விதமிருக்க ஈரான் மீது அமெரிக்க இராணுவம் மீண்டும் தாக்குதல் நடத்தியது உறுதியாகி உள்ளது. தற்காப்புக்காக ஈரானின் ட்ரோன்களை சுட்டு வீழ்த்தியதாக அமெரிக்க இராணுவ அதிகாரிகள் தெரிவித்துள்ளனர்.

கடந்த சில நாட்களுக்கு முன்பு தெற்கு ஈரானில் உள்ள ஈரானின் ஏவுகணை தளம் மீது அமெரிக்கா தாக்குதல் நடத்தியது. இது போர்நிறுத்த அத்துமீறல் என ஈரான் குற்றச்சாட்டு வைத்தது.