உயரும் பெட்ரோல் விலை: நெருக்கடியில் ட்ரம்ப் நிர்வாகம்!

ஈரான் உடனான போர் நீடித்து வருவதால் ஏற்பட்டுள்ள பொருளாதார மற்றும் அரசியல் பாதிப்புகளைக் கட்டுப்படுத்த ஜனாதிபதி ட்ரம்ப் தலைமையிலான வெள்ளை மாளிகை தீவிர முயற்சிகளை எடுத்து வருகிறது. குறிப்பாக, போர் காரணமாக 50% வரை உயர்ந்துள்ள எரிபொருள் விலையைக் குறைக்க, மத்திய பெற்றோல் வரியைத் தற்காலிகமாக நிறுத்தி வைக்கும் திட்டத்திற்கு ஜனாதிபதி ட்ரம்ப் தனது ஆதரவை வழங்கியுள்ளார். இதன் மூலம் ஒரு கேலன் பெட்ரோலுக்கு 18 சென்ட் வரை விலை குறைய வாய்ப்புள்ளது.

முக்கியப் பாதிப்புகள்:

• விலை உயர்வு: அமெரிக்காவில் ஒரு கேலன் பெட்ரோலின் சராசரி விலை 4.50 டொலராக உள்ளது. சில மாகாணங்களில் இது 5 டொலரைக் கடந்துவிட்டது.

• பணவீக்கம்: ஏப்ரல் மாதத்தில் நுகர்வோர் பணவீக்கம் 3.8 சதவீதமாக உயர்ந்துள்ளது, இது கடந்த 3 ஆண்டுகளில் இல்லாத உச்சமாகும்.

• அரசியல் பின்னடைவு: எரிபொருள் விலை உயர்வால் ட்ரம்ப்பின் பொருளாதாரச் செயல்பாடுகளுக்கான அங்கீகாரம் 30 சதவீதமாகக் குறைந்துள்ளது. இது வரவிருக்கும் இடைத்தேர்தலில் குடியரசுக் கட்சிக்கு பெரும் சவாலாக அமையும் என அஞ்சப்படுகிறது.

உலகளாவிய எரிசக்தி சந்தையில் ஏற்பட்டுள்ள இந்தத் தட்டுப்பாட்டைச் சமாளிக்க, அமெரிக்காவின் சொந்த எண்ணெய் மற்றும் எரிவாயு உற்பத்தியை அதிகரிப்பதே நிரந்தரத் தீர்வாக இருக்கும் என வெள்ளை மாளிகை செய்தித் தொடர்பாளர் டெய்லர் ரோஜர்ஸ் தெரிவித்துள்ளார்.