செம்மணி விவகாரம்...! பொறியில் சிக்குவார்களா கடந்த ஆட்சியாளர்கள் ..?

சி.சி.என்



முன்னாள் ஜனாதிபதிகளுக்கு எதிராக இப்போதும் விசாரணைகள் இடம்பெற்று வந்தாலும் அவர்களை கைது செய்வதற்கான வலுவான ஆதாரங்களை அநுர அரசாங்கம் திரட்டி வருகின்றது. அவ்வாறு கைது செய்யப்பட்டாலும் அவர்கள் செய்ததை நியாயப்படுத்த தென்னிலங்கையில் பேரினவாத சக்திகள் தாராளமாக இருக்கின்றன. எனவே இவர்களுக்கு உள்ளூரில் தண்டனை வாங்கிக் கொடுப்பதோ அல்லது அபராதங்கள் விதிப்பதோ போதாது என்பதால் சர்வதேச ரீதியாக இவர்களை ஓரங்கட்டும் முயற்சிகளிலும் அவர்களுக்கு சில நாடுகளுக்குச் செல்வதற்கு தடை விதிக்கப்படும் அளவுக்கு காய்களை நகர்த்த வேண்டும் என்றும் அநுர அரசாங்கம் சிந்திப்பது போன்று தெரிகின்றது. 

அதில் மூன்று  தெரிவுகள் மாத்திரமே இப்போதைக்கு அநுர அரசு வசம் உள்ளன. 

1) போர்க்குற்றங்கள்

2) ஈஸ்டர் குண்டுத் தாக்குதல்

3) காணாமல் போனோர் விவகாரம்

முதலாவது விடயத்தை கிண்டிக் கிளறுவதற்கு  நடப்பு  அரசாங்கம் முயற்சிக்காது. அது இராணுவ வீரர்கள் மற்றும் கடும்போக்கு சிங்கள பெளத்த மக்களோடு தொடர்புடைய விவகாரம். அது பூமரங்காக திரும்பி தம்மையே தாக்கும் என்பது அநுர அரசாங்கத்துக்குத் தெரியும். போர்க்குற்ற சம்பவங்களை  கடந்து சென்ற ஆட்சியாளர்கள் வரிசையில் தேசிய மக்கள் சக்தியும் நிச்சயம் இடம்பிடிக்கும் எனலாம். 

ஈஸ்டர் குண்டுத் தாக்குதல் குறித்த விசாரணைகளில் பல புதிய உண்மைகள் வெளிவந்து கொண்டிருக்கின்றன. உயிர்த்த ஞாயிறு பயங்கரவாத குண்டுத்தாக்குதல் தொடர்பில் முன்னெடுக்கப்பட்டு வரும் விசாரணைகளுக்கமைய தான் கைது செய்வதைத் தடுக்கும் உத்தரவை பிறப்பிக்குமாறு கோரி முன்னாள் ஜனாதிபதி கோட்டாபய ராஜபக்‌ஷ  தாக்கல் செய்த எழுத்தானை மனு மீதான மேலதிக விசாரணை எதிர்வரும் ஆகஸ்ட் 3ஆம் திகதி வரை ஒத்திவைக்கப்பட்டுள்ளது. மேன்முறையீட்டு நீதிமன்றத்தில் கடந்த 23 ஆம் திகதி  மனு பரிசீலனைக்கு எடுத்துக்கொள்ளப்பட்டபோது மனுதாரரான முன்னாள் ஜனாதிபதி கோட்டாபய ராஜபக்‌ஷ மன்றில் முன்னிலையாகியிருந்தமை குறிப்பிடத்தக்கது.  


ஆனால் சந்திரிகாவுக்குப் பிறகு இந்த விவகாரத்தை கண்டு கொள்ளாது அசட்டையாக கடந்து   மகிந்த, மைத்ரி, கோட்டாபய, ரணில் ஆகியோரையும் இந்த பட்டியலில் சேர்க்கலாம். அதற்கு இந்த அரசாங்கம் முயற்சி செய்கின்றதோ தெரியாது.  செம்மணி மனித புதைகுழியின் மூன்றாம் கட்ட  அகழ்வு   பணிகளை 56 நாட்கள் முன்னெடுக்க நீதிமன்றம் அனுமதி வழங்கியமை குறிப்பிடத்தக்கது.    முதலாம் இரண்டாம் மற்றும் மூன்றாம் கட்டம் என இதுவரையில் 96 நாட்கள் அகழ்வு பணிகள் முன்னெடுக்கப்பட்ட நிலையில் , 471 என்பு கூடுகள் அடையாளம் காணப்பட்டுள்ள நிலையில் 455 என்பு கூடுகள் முற்றாக அகழ்ந்து எடுக்கப்பட்டுள்ளன.


புதைக்கப்பட்டுள்ள உறவுகளுக்கு நீதி கோரி, யாழ்ப்பாண மறைமாவட்ட நீதி சமாதான ஆணைக்குழுவின் ஏற்பாட்டில் முன்னெடுக்கப்பட்ட அமைதிப் போராட்டம் கடந்த வியாழக்கிழமை (30) செம்மணி பகுதியில் நடைபெற்றது. ஆணைக்குழுவின் தலைவர் அருட்தந்தை அந்தோனிப்பிள்ளை அகஸ்டின் அவர்களின் ஒழுங்கமைப்பில், அரியாலை புனித யூதா ததேயு திருச்சுரூபம் முன்பாக ஆரம்பமான பேரணி, செம்மணி சந்தியைச் சென்றடைந்தது.

பேரணியின் நிறைவில், ஐக்கிய நாடுகள் மனித உரிமைகள் உயர் ஆணையாளரிடம் கையளிக்கப்படவுள்ள அவசர வேண்டுகோள் அறிக்கையை அருட்தந்தை அந்தோனிப்பிள்ளை அகஸ்டின் வாசித்தார். அவ்வறிக்கையில், 2026ஆம் ஆண்டு ஆடி மாதம் 21ஆம் திகதி வரையில் சிறுவர்கள் மற்றும் சிசுக்களின் எச்சங்கள் உட்பட 454 மனித என்புத் தொகுதிகள் மீட்கப்பட்டுள்ள நிலையில், உண்மை மற்றும் பொறுப்புக்கூறலை உறுதிப்படுத்த சுயாதீன சர்வதேச விசாரணை முன்னெடுக்கப்பட வேண்டும் எனக் கோரப்பட்டுள்ளது.


பொது மக்கள், உறவுகளை இழந்தவர்கள் மாத்திரமல்லாது தற்போது சிவில் மற்றும் ஆன்மிக அமைப்புகளை சேர்ந்தவர்களும் செம்மணி  விவகாரத்துக்கு நீதி வேண்டும் என களமிறங்கியுள்ளனர். மட்டுமின்றி இந்த விவகாரத்தில் நீதி நிலைநாட்டப்பட வேண்டும் என கோரிக்கை முன் வைக்கும் தமிழ்த் தரப்பானது சர்வதேச விசாரணைகளை வலியுறுத்தி வருகின்றமை முக்கிய விடயம். 

செம்மணி விவகாரம் கடந்த காலங்களில் இடம்பெற்ற மிக மோசமானதொரு மனித பேரவலமாக உருப்பெருவதற்கான சாத்தியங்கள் உள்ளன. இதை சர்வதேச மயப்படுத்தினால் இறுதியில் இந்த விவகாரம் போர்க்குற்றங்கள் வரிசையில் இடம்பிடிப்பதற்கான சாத்தியங்கள் உள்ளதையும் மறுக்க முடியாது. ஆனால் அரசாங்கம் இதை எவ்வளவு தூரம் கொண்டு செல்லும் என்பது குறித்து உறுதியாக கூற முடியாதுள்ளது. இதை மனிதாபிமான ரீதியில் அணுக அரசாங்கம் முயற்சி செய்கின்றதா அல்லது இதன் பின்னணியில் வேறு நிகழ்ச்சி நிரல்கள் உள்ளனவா என்பதை பொறுத்திருந்து பார்த்தல் வேண்டும். 

எனினும் இந்த விவகாரத்தில் கடந்த ஆட்சியாளர்களான சந்திரிகா, மகிந்த, மைத்ரி, கோட்டாபய , ரணில் ஆகியோர் மீது விமர்சனங்கள் எழுந்துள்ளதையும் மறுக்க முடியாது.