நாத்தண்டிய–மாதம்பே வீதியில் கோர விபத்து: 23 வயது இளைஞர் சம்பவ இடத்திலேயே உயிரிழப்பு

புத்தளம் மாவட்டம் நாத்தண்டிய–மாதம்பே பிரதான வீதியில் குடாவெவ பகுதியில் இடம்பெற்ற கோர சாலை விபத்தில் 23 வயது இளைஞர் ஒருவர் உயிரிழந்துள்ளார் என இலங்கை பொலிஸ் தெரிவித்துள்ளது.

இந்த விபத்து கடந்த 24 ஆம் தேதி இரவு சுமார் 7 மணியளவில் இடம்பெற்றதாக தெரிவிக்கப்படுகிறது. உயிரிழந்தவர் குடாவெவ பகுதியைச் சேர்ந்த தரிந்து ஹஷான் என்ற 23 வயது இளைஞர் ஆவார்.

விபத்து தொடர்பான தகவலின்படி, நாத்தண்டிய பகுதியில் இருந்து மாதம்பே நோக்கி அரிசி ஏற்றிச் சென்ற லொறியும், எதிர்திசையில் வந்த இளைஞர் ஓட்டிய மோட்டார் சைக்கிளும் நேருக்கு நேர் மோதியதில் இந்த விபத்து ஏற்பட்டுள்ளது.

அதிக வேகமாக பயணித்த மோட்டார் சைக்கிளை இளைஞர் கட்டுப்படுத்த முடியாமல் லொறியின் முன்பகுதியில் மோதியதாக ஆரம்பக்கட்ட விசாரணையில் தெரியவந்துள்ளது.

விபத்தின் போது மோட்டார் சைக்கிள் ஓட்டுநர் சம்பவ இடத்திலேயே உயிரிழந்துள்ளார். மோட்டார் சைக்கிளுக்கும் கடுமையான சேதம் ஏற்பட்டுள்ளது.

இந்த விபத்துடன் தொடர்புடைய லொறி சாரதி கைது செய்யப்பட்டுள்ளதுடன், மாரவில பொலிஸார் மேலதிக விசாரணைகளை மேற்கொண்டு வருகின்றனர்.