பாதுகாப்பற்ற உணவினால் 15 லட்சம் பேர் உயிரிழப்பு: உலக சுகாதார நிறுவனம்

உலக சுகாதார நிறுவனம் (WHO) வெளியிட்டுள்ள புதிய மதிப்பீடுகளின்படி, பாதுகாப்பற்ற உணவினால் உலகளவில் ஒவ்வொரு ஆண்டும் சுமார் 86.6 கோடி (866 மில்லியன்) மக்கள் பாதிக்கப்படுவதோடு, 15 லட்சம் பேர் உயிரிழக்கின்றனர். இந்த பாதிப்பில் சிறு குழந்தைகளே பெரும் பங்கைக் கொண்டுள்ளனர்.

ஐந்து வயதிற்குட்பட்ட குழந்தைகள், பெரியவர்களை விட பாதுகாப்பற்ற உணவினால் நோய்வாய்ப்படுவதற்கான வாய்ப்பு மூன்று மடங்கு அதிகம் என்று உலக சுகாதார நிறுவனம் தெரிவித்துள்ளது. உலக மக்கள் தொகையில் சிறு குழந்தைகள் 9 சதவீதமே இருக்கும் போதிலும், உணவு மூலம் பரவும் நோய்களால் பாதிக்கப்படுபவர்களில் மூன்றில் ஒரு பங்கினர் அவர்களே ஆவர். குறிப்பாக, இந்த வயதினருக்கு ஏற்படும் வயிற்றுப்போக்கு போன்ற நோய்கள் உயிருக்கு ஆபத்தானவையாக முடிகின்றன.

உணவில் உள்ள மெத்தில்மெர்குரி (Methylmercury) மற்றும் ஈயம் (Lead) போன்ற இரசாயனக் கலவைகளின் தாக்கம், குழந்தைகளின் மூளை வளர்ச்சியைப் கடுமையாகப் பாதிப்பதோடு, வாழ்நாள் முழுவதுக்குமான நரம்பியல் மற்றும் வளர்ச்சி சார்ந்த குறைபாடுகளுக்கு வழிவகுக்கும் என்றும் உலக சுகாதார நிறுவனம் சுட்டிக்காட்டியுள்ளது.

கடந்த 2000 ஆம் ஆண்டிலிருந்து குறிப்பிடத்தக்க முன்னேற்றங்கள் ஏற்பட்ட போதிலும், உணவு மூலம் பரவும் நோய்கள் தொடர்ந்து ஒரு முக்கிய பொது சுகாதார சவாலாகவே விளங்குவதாக அந்த அறிக்கை கூறுகிறது. உலகளவில் இந்த நோய்களின் ஒட்டுமொத்த பாதிப்பு குறைந்துள்ள போதிலும், பிராந்திய ரீதியாக பெரும் வேறுபாடுகள் காணப்படுகின்றன. குறிப்பாக, ஆப்பிரிக்கா மற்றும் தென்கிழக்கு ஆசியா ஆகிய பிராந்தியங்களிலேயே மிக அதிகளவிலான பாதிப்புகள் பதிவாகியுள்ளன.

2021 ஆம் ஆண்டில் ஏற்பட்ட பெரும்பாலான உணவுவழி நோய்களுக்கு பாக்டீரியா, வைரஸ்கள் மற்றும் ஒட்டுண்ணிகள் போன்ற உயிரியல் ஆபத்துகளே காரணமாக அமைந்தன. இவை உலகளவில் சுமார் 86 கோடி பாதிப்புகளை ஏற்படுத்தின. இருப்பினும், இரசாயனக் கலவைகளால் ஏற்பட்ட இறப்புகளின் எண்ணிக்கை விகிதாசார அடிப்படையில் மிக அதிகமாக இருந்தது.

2021 இல் அசுத்தமான உணவினால் ஏற்பட்ட ஒட்டுமொத்த இறப்புகளில் 73 சதவீதத்திற்கு இரசாயன ஆபத்துகளே காரணம் என்று உலக சுகாதார நிறுவனம் மதிப்பிட்டுள்ளது. இதில் கனிம ஆர்சனிக் (Inorganic arsenic) 42 சதவீத இறப்புகளுக்கும், ஈயம் 31 சதவீத இறப்புகளுக்கும் காரணமாக அமைந்துள்ளன. இவை பெரும்பாலும் இருதய நோய்கள் மற்றும் புற்றுநோயை ஏற்படுத்துவதன் மூலமே இந்த உயிரிழப்புகளை உண்டாக்குகின்றன.

உணவு மூலம் பரவும் நோய்கள், ஆரோக்கியப் பாதிப்புகளுக்கு அப்பாற்பட்டு கடுமையான பொருளாதார சுமையையும் ஏற்படுத்துகின்றன. பாதுகாப்பற்ற உணவினால் ஏற்படும் நோய்கள் காரணமாக, 2021 ஆம் ஆண்டில் வேலைக்குச் செல்ல முடியாத நிலை ஏற்பட்டு, அதனால் சுமார் 310 பில்லியன் அமெரிக்க டாலர் மதிப்பிலான உற்பத்தித்திறன் இழப்பு ஏற்பட்டுள்ளதாக இந்த ஆய்வு மதிப்பிட்டுள்ளது. நாடுகளுக்கு இடையிலான வாழ்க்கைச் செலவு வேறுபாடுகளுக்கு ஏற்ப இதனை மாற்றியமைக்கும் போது, இந்த பொருளாதார இழப்பு சுமார் 647 பில்லியன் அமெரிக்க டாலர்களாக உயர்கிறது.

உலக சுகாதார நிறுவனத்தின் தலைமை இயக்குநர் டெட்ரோஸ் அதானோம் கெப்ரேயேசஸ் (Tedros Adhanom Ghebreyesus) கூறுகையில், "இந்த புதிய கண்டுபிடிப்புகள் பாதுகாப்பற்ற உணவினால் ஏற்படும் உலகளாவிய தாக்கத்தை மிகத் தெளிவாகப் படம் பிடித்துக் காட்டுகின்றன" என்றார்.

மேலும் அவர், “உணவுப் பாதுகாப்பு என்பது ஒரு கற்பனையான விஷயம் அல்ல; அது ஒவ்வொரு வேளை உணவையும், ஒவ்வொரு குடும்பத்தையும், ஒவ்வொரு நாளையும் தொட்டுச் செல்லும் ஒரு விஷயமாகும். பாதுகாப்பற்ற உணவு என்பது எப்போதும் ஒரு முக்கிய பொது சுகாதார கவலையாகவே இருந்து வந்துள்ளது. ஆனால், இதுவரை அதன் அதிர்ச்சியூட்டும் மனித மற்றும் பொருளாதார இழப்புகள் குறித்த ஒட்டுமொத்தப் படம் நம்மிடம் இல்லாமல் இருந்தது” என்றும் குறிப்பிட்டார்.

நாடுகள் இப்போது முதன்முறையாக விரிவான தேசியத் தரவுகளைப் பெற்றுள்ளன என்றும், இதன் மூலம் அரசாங்கங்கள் உணவுவழி நோய்களின் பாதிப்பு அதிகமுள்ள பகுதிகளைக் கண்டறிந்து, பொது சுகாதாரத்தை சிறப்பாகப் பாதுகாப்பதற்கான முன்னுரிமை நடவடிக்கைகளை மேற்கொள்ள முடியும் என்றும் அவர் மேலும் தெரிவித்தார்.

சுத்தமான நீர், சுகாதாரம் மற்றும் தூய்மைக்கான வாய்ப்புகளை மேம்படுத்துதல், பாஸ்சுரைசேஷன் (Pasteurization) போன்ற பாதுகாப்பான உணவு கையாளுதல் முறைகளைப் பின்பற்றுதல் மற்றும் பாதிக்கப்படக்கூடிய மக்களுக்குச் சிறந்த சுகாதார சேவைகளை வழங்குதல் ஆகியவற்றின் மூலம் உணவு மூலம் பரவும் பல நோய்களையும் இறப்புகளையும் தடுக்க முடியும் என்று உலக சுகாதார நிறுவனம் தெரிவித்துள்ளது.