புத்தளத்தில் பிறந்த 19 நாள் குழந்தையை விற்க முயற்சி: 6 பேர் கைது, பொலிஸார் அதிரடி நடவடிக்கை

புத்தளம் மாவட்டத்தில் பிறந்து 19 நாட்களே ஆன குழந்தையை விற்பனை செய்ய முயன்றதாக சந்தேகிக்கப்படும் 6 பேர் கைது செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது. இந்த நடவடிக்கையை இலங்கை பொலிஸ் புத்தளம் குற்றப் புலனாய்வுப் பிரிவு மேற்கொண்டுள்ளது.

நேற்று ஆனமடுவ – ஆடிகம பகுதியில் நடைபெற்ற சுற்றிவளைப்பு நடவடிக்கையில், குழந்தையை ஒரு இலட்சம் ரூபாய்க்கு விற்க முயன்றதாக கூறப்படும் கும்பல் கைது செய்யப்பட்டுள்ளது.

கைது செய்யப்பட்டவர்களில் குழந்தையின் தாய், அவரது மூத்த சகோதரன், அந்த சகோதரனின் மனைவி, குழந்தையை வாங்க முயன்ற தம்பதியினர் மற்றும் வாகன சாரதி ஆகியோர் அடங்குவதாக பொலிஸார் தெரிவித்துள்ளனர்.

மேலும், குழந்தையை எடுத்துச் செல்ல பயன்படுத்தப்பட்டதாக கூறப்படும் வாகனமும் பொலிஸாரால் கைப்பற்றப்பட்டுள்ளது.

விசாரணைகளில், இந்த குழந்தை விற்பனை நடவடிக்கைக்கு இடைத்தரகராக ஒரு வைத்தியர் செயல்பட்டிருக்கலாம் என சந்தேகிக்கப்படுவதாகவும் தகவல்கள் வெளியாகியுள்ளன. இதுகுறித்து மேலதிக விசாரணைகள் தொடர்கின்றன.

கைது செய்யப்பட்டவர்கள் மற்றும் மீட்கப்பட்ட குழந்தை புத்தளம் பொலிஸ் நிலையத்தில் ஒப்படைக்கப்பட்டு சட்ட நடவடிக்கைகள் மேற்கொள்ளப்பட்டு வருகின்றன.