ஹமாஸுடன் ரகசியப் பேச்சு, நெதன்யாகுவுடன் நேருக்கு நேர் - காசாவைச் சுற்றி ட்ரம்ப் ஆடும் புதிய ஆட்டம்!"

கலீல் அல்-ஹய்யா

israeli army

இதனால்தான் ஹமாஸைச் சந்தித்த மறுநாளே குஷ்னர் இஸ்ரேலுக்குச் சென்று நேதன்யாகுவைச் சந்தித்தது முக்கியத்துவம் பெறுகிறது. கெய்ரோவில் ஹமாஸின் கருத்துகளைக் கேட்ட குஷ்னர், அடுத்த நாளே அவற்றை இஸ்ரேலிய பிரதமரிடம் எடுத்துச் சென்றிருக்கிறார்.

இரு தரப்பினருக்கும் இடையே இருக்கும் நம்பிக்கையின்மையைக் குறைத்து, ஒவ்வொரு தரப்பும் மற்றொரு தரப்பிடமிருந்து எதிர்பார்க்கும் உத்தரவாதங்களை ஒரு நடைமுறை வடிவத்துக்குக் கொண்டுவருவதே குஷ்னரின் முயற்சியாகத் தெரிகிறது.

நேதன்யாகுவுடனான சந்திப்பு “மிகச் சிறந்த சந்திப்பு” என்று குஷ்னர் வர்ணித்துள்ளார். ஹமாஸின் சில ஆயுதங்களை அகற்றும் பணியில் 30 நாட்களுக்குள் முன்னேற்றம் ஏற்படலாம் என்றும் அவர் நம்பிக்கை தெரிவித்துள்ளார்.

ஆனால் அதே நேரத்தில், இரு தரப்பினரின் ஒத்துழைப்பும் இதற்கு அவசியம் என்பதை அவர் ஒப்புக்கொண்டிருக்கிறார். இதன் மூலம், அமெரிக்கா இப்போது ஒருதலைபட்சமாக எந்த ஒரு தரப்புக்கும் அழுத்தம் கொடுப்பதற்குப் பதிலாக, ஹமாஸ், இஸ்ரேல் ஆகிய இரண்டையும் ஒரே நேரத்தில் நகர்த்த முயற்சிப்பது தெரிகிறது.

இந்தத் திட்டத்தில் “நம்பிக்கை” என்பதற்குப் பதிலாக “சரிபார்ப்பு” முக்கியமானதாக இருக்கிறது என்பதையும் ம்லாடெனோவ் தெளிவுபடுத்தியிருக்கிறார். ஹமாஸ் ஆயுதங்களைக் கைவிட்டுவிட்டதாகக் கூறுவது மட்டும் போதாது; ஆயுதங்கள் உண்மையில் அகற்றப்பட்டனவா, சுரங்கப்பாதைகள் அழிக்கப்பட்டனவா, ஆயுத உற்பத்தித் தளங்கள் செயலிழக்கச் செய்யப்பட்டனவா என்பதெல்லாம் சர்வதேச கண்காணிப்பின் மூலம் உறுதிசெய்யப்பட வேண்டும்.

அந்தச் சரிபார்ப்பின் அடிப்படையில்தான் இஸ்ரேலியப் படைகளின் அடுத்த கட்ட வெளியேற்றம் நடைபெற வேண்டும் என்பதே இந்த அணுகுமுறை.

இதனால், தனது ஆயுதங்களை நேரடியாக இஸ்ரேலிடம் ஒப்படைப்பதற்குப் பதிலாக, அவற்றை ஒரு பாலஸ்தீனிய தேசிய அமைப்பின் கண்காணிப்பில் வைக்கும் இடைநிலை ஏற்பாட்டை ஏற்கும் வாய்ப்பு உருவாகியிருக்கிறது.

ஆனால், அரசியல் பேச்சுவார்த்தைகளுக்கு இணையாக காசாவின் தரையில் நடக்கும் நிலைமை வேறொரு உண்மையைச் சொல்கிறது. இரண்டு ஆண்டுகளாகப் போர் நீடிக்கும் நிலையில், பெரும்பாலான மக்கள் வீடுகளை இழந்துள்ளனர். மருத்துவமனைகள், பள்ளிகள், சாலைகள், குடிநீர், மின்சார கட்டமைப்புகள் கடுமையாகப் பாதிக்கப்பட்டுள்ளன. இடிபாடுகளை அகற்றுவது முதல் மக்களுக்கு அடிப்படை வாழ்வாதாரத்தை ஏற்படுத்துவது வரை காசாவின் மறுசீரமைப்பு மிகப்பெரிய சவாலாக இருக்கிறது.

அதனால், காசாவுக்கான அமைதி என்பது வெறும் “ஹமாஸ் ஆயுதங்களைக் கைவிடுகிறதா, இல்லையா?” என்ற கேள்வியில் முடிந்துவிடப் போவதில்லை. ஆயுதக் களைவு நடந்த பிறகு யார் காசாவை ஆட்சி செய்வார்கள்? பாலஸ்தீனிய மக்களுக்கு என்ன அரசியல் எதிர்காலம் கிடைக்கும்? இஸ்ரேலின் பாதுகாப்பை எப்படி உறுதி செய்வது? காசாவின் எல்லைகள், பாதுகாப்பு, மறுசீரமைப்பை யார் நிர்வகிப்பார்கள்? கோடிக்கணக்கான டன் இடிபாடுகளை அகற்றி, மக்களை மீண்டும் வாழ வைக்கத் தேவையான நிதியை யார் வழங்குவார்கள்? என்பனவும் அதே அளவு முக்கியமான கேள்விகளாக இருக்கின்றன.

இறுதியில், குஷ்னரின் கெய்ரோ சந்திப்பை காசா அமைதியின் தொடக்கம் என்று உடனடியாகக் கூற முடியாது. அதேபோல், இது வெறும் இன்னொரு பேச்சுவார்த்தை என்றும் புறக்கணிக்க முடியாது. ஹமாஸுடன் பேசிய குஷ்னர், மறுநாளே நெதன்யாகுவுடன் பேசியிருப்பது, ட்ரம்ப் நிர்வாகம் இரு தரப்பையும் ஒரே அமைதித் திட்டத்துக்குள் கொண்டுவரத் தீவிரமாக முயற்சி செய்கிறது என்பதற்கான அறிகுறி.

ஆனால், இந்த முயற்சியின் வெற்றி, வாஷிங்டனில் வெளியிடப்படும் அறிக்கைகளாலோ, கெய்ரோவில் நடைபெறும் பேச்சுவார்த்தைகளாலோ மட்டும் தீர்மானிக்கப்படாது. காசாவின் தரையில் அது சோதிக்கப்பட வேண்டும். ஹமாஸ் உண்மையில் ஆயுதங்களைக் கைவிடுகிறதா? 

இஸ்ரேல் உண்மையில் தனது படைகளைப் பின்வாங்குகிறதா? சர்வதேச அமைப்புகள் இந்த இரு தரப்பினரின் வாக்குறுதிகளையும் நம்பகமாகச் சரிபார்க்கின்றனவா? அதற்குப் பிறகு காசா மக்களுக்குப் பாதுகாப்பு, உணவு, வீடு, மருத்துவம், அரசியல் எதிர்காலம் கிடைக்கின்றனவா?

இந்தக் கேள்விகளுக்கான பதில்களில்தான் ட்ரம்ப்பின் காசா திட்டத்தின் எதிர்காலம் இருக்கிறது. குஷ்னர் இப்போது திறந்திருக்கும் கதவைத் தக்கவைக்க முடிந்தால், பல ஆண்டுகளாக முடியாமல் போன ஓர் அரசியல் தீர்வுக்கான பாதை உருவாகலாம். ஆனால், ஹமாஸின் ஆயுதங்களுக்கும், இஸ்ரேலின் பாதுகாப்புக் கவலைகளுக்கும் இடையிலான சமநிலையை உருவாக்க முடியாவிட்டால், இந்த முயற்சியும் முந்தைய அமைதி முயற்சிகளைப் போலவே போரின் அடுத்த இடைவெளியாக மட்டுமே முடிந்துவிடும். 

காசாவுக்கு இப்போது தேவைப்படுவது இன்னொரு தற்காலிகப் போர்நிறுத்தம் அல்ல; மீண்டும் போர் தொடங்காத அளவுக்கு உறுதியான, சரிபார்க்கக்கூடிய, பாலஸ்தீனிய மக்களின் எதிர்காலத்தையும் உள்ளடக்கிய ஒரு நிரந்தர அமைதி!