news@ilakkiyainfo.com

பிரிவுகள்

அண்ணா 1969-ம் ஆண்டு, பிப்ரவரி 3-ம் தேதி காலமானார். (தமிழக தேர்தல் வரலாறு-9 )

21 Jan, 2026
- பிற்போக்குக் கட்சியுடன் கைகோத்த தி.மு.க! பிற்போக்குக் கொள்கையுடைய  சுதந்திரா கட்சியுடன் கூட்டணியா?’ என்ற கேள்வி, தி.மு.க-வை நோக்கி எழுந்தது. ‘தி.மு.க வெற்றிபெற்றால் குலக்கல்வித் திட்டத்தைக் கொண்டுவருமா?’ என்று பெரியார் கேட்டார். கூட்டணி தொடர்பான விமர்சனங்களுக்கு, தனது பாணியிலேயே பதில் சொன்னார் அண்ணா... ``என் வீட்டில் ஒரு திருடன் புகுந்துவிட்டான். அவனை அடிக்க எந்தத் தடி அகப்பட்டாலும், அதை எடுத்து அடிப்பேன். அது சுதந்திரா தடியா, கம்யூனிஸ்ட் தடியா என்று பார்க்க மாட்டேன். எல்லாத் தடிகளையும் பயன்படுத்துவேன். காங்கிரஸை வீழ்த்த மற்ற கட்சிகளுடன் கூட்டணிவைப்பதில் தவறு கிடையாது.. வேடிக்கை… விசித்திரம்! 1967, பிப்ரவரியில் பொதுத்தேர்தல். அதற்கு இரு மாதங்களுக்கு முன்பு தி.மு.க மாநில மாநாடு சென்னை விருகம்பாக்கத்தில் நடைபெற்றது. அதில் பேசிய ராஜாஜி, “தி.மு.க கூட்டணியில் சேர்ந்திருக்கிறேன். முன் சரித்திரங்களைப் பார்த்தால், இது ஆச்சர்யமாக இருக்கும். இந்தக் கூட்டணி, சரித்திரத்தில் பதிவாகும்” என்றார். அண்ணா பேசியபோது, “அரசியலில் ராஜாஜியை நான் கண்டித்ததுபோல வேறு யாரும் கண்டித்தது இல்லை. அவர் இன்று நம்மை வாழ்த்துகிறார். நினைத்தால் வேடிக்கையாகவும் விசித்திரமாகவும் இருக்கிறது. ‘விதி வகுத்தது’ என்று சொல்வார்களே, அதுபோல் இருக்கிறது. இது ஓர் அரசியல் திருப்பம்” என்றார். இந்த முறை தமிழக சட்டமன்றத் தொகுதிகளின் எண்ணிக்கை, 206-லிருந்து 234-ஆக அதிகரித்தது. கூடவே, தி.மு.க-வுக்கான வெற்றி வாய்ப்பும் பிரகாசமாக இருந்தது. ஏனெனில், இந்தித் திணிப்புக்கு எதிரான போராட்டம் முடிவுக்கு வந்திருந்தாலும், அதனால் உருவான வெப்பம் தணியாமல் இருந்தது. அரிசிப் பஞ்சம், விலைவாசி உயர்வு போன்ற பிரச்னைகள் காங்கிரஸ் மீதான அதிருப்தியை அதிகரித்திருந்தன. வரலாறு படைத்த வெற்றி! தேசிய அளவில் செல்வாக்கு மிக்க காங்கிரஸை, பொதுத்தேர்தலில் தி.மு.க தோற்கடித்தது. மொத்தம் 173 தொகுதிகளில் போட்டியிட்ட தி.மு.க., 138 இடங்களில் வெற்றிபெற்றது. 232 தொகுதிகளில் போட்டியிட்ட காங்கிரஸ், வெறும் 51 தொகுதிகளைத்தான் பிடித்தது. முதல்வர் பக்தவத்சலமும், கக்கன் உள்ளிட்ட அமைச்சர்களும் தோற்றுப்போனார்கள். அனைத்துக்கும் மேலாக, விருதுநகரில் போட்டியிட்ட காங்கிரஸ் கட்சியின் அகில இந்தியத் தலைவர் காமராஜர் தோல்வியடைந்தது அனைவருக்கும் பேரதிர்ச்சி. இந்தித் திணிப்புக்கு எதிரான போராட்டத்துக்குத் தலைமை தாங்கிய மாணவர் தலைவர்களில் ஒருவரான பெ.சீனிவாசனிடம் காமராஜர் தோற்றிருந்தார். எழும்பூரில் ஏ.வி.பி.ஆசைத்தம்பி, ஆயிரம் விளக்கில் கே.ஏ.மதியழகன், திருவல்லிக்கேணியில் இரா.நெடுஞ்செழியன், சைதாப்பேட்டையில் மு.கருணாநிதி, பெரம்பூரில் சத்தியவாணிமுத்து, பரங்கிமலையில் எம்.ஜி.ஆர்., ஆற்காட்டில் ஆற்காடு வீராசாமி, தேனியில் பி.டி.ஆர்.பழனிவேல் ராஜன், திருப்பத்தூரில் (சிவகங்கை) செ.மாதவன், ஆலங்குளத்தில் ஆலடி அருணா ஆகியோர் வெற்றிபெற்ற தி.மு.க-வினரில் குறிப்பிடத் தக்கவர்கள். திண்டுக்கல்லில் ஏ.பாலசுப்பிரமணியம், வாசுதேவநல்லூரில் என்.வரதராஜன், மதுரை கிழக்கில் கே.பி.ஜானகியம்மாள், மதுரை மேற்கில் என்.சங்கரய்யா, திருவாரூரில் பி.எஸ்.தனுஷ்கோடி, நெல்லிக்குப்பத்தில் கோவிந்தராஜன் உட்பட சி.பி.எம் வேட்பாளர்கள் 11 பேர் வெற்றிபெற்றனர். ஃபார்வர்டு பிளாக் கட்சியின் மூக்கையா தேவர் உசிலம்பட்டியில் ஜெயித்தார். பார்க் டவுன் தொகுதியில் போட்டியிட்ட ஹெச்.வி.ஹண்டே உட்பட சுதந்திரா கட்சி வேட்பாளர்கள் 20 பேர் வென்றனர். அண்ணா, மக்களவைக்குப் போட்டியிட்டு வெற்றிபெற்றிருந்தார். எனவே, அந்தப் பதவியை ராஜினாமா செய்துவிட்டு, முதலமைச்சராகப் பொறுப்பேற்ற பிறகு, துறைமுகம் சட்டமன்றத் தொகுதியில் நின்று பெருவாரியான வாக்குகள் வித்தியாசத்தில் ஜெயித்தார். இந்தியாவிலேயே இளம் அமைச்சரவை!< தென்சென்னை மக்களவைத் தொகுதியில் போட்டியிட்ட அண்ணா, 60 சதவிகித வாக்கு களுடன் வெற்றிபெற்றார். அண்ணா உட்பட 25 தி.மு.க-வினர் நாடாளுமன்ற உறுப்பினர்களாக வெற்றிபெற்றிருந்தனர். காங்கிரஸின் மத்திய அமைச்சர்கள் சி.சுப்பிரமணியம் கோபிசெட்டி பாளையத்திலும், ஓ.வி.அழகேசன் செங்கல்பட்டிலும் தோற்றார்கள். ஆர்.வெங்கட்ராமன் தஞ்சாவூரில் தோற்றார். அண்ணாதான் முதல்வர் என்பது முடிவானது. அமைச்சரவைப் பதவியேற்புக்கு முன்பு, பெரியாரிடம் வாழ்த்து பெற திருச்சிக்குச் சென்றார் அண்ணா. அவருடன் இரா.நெடுஞ்செழியனும், மு.கருணாநிதியும், அன்பில் தர்மலிங்கமும் சென்றனர். 1957, 1962, 1967 ஆகிய மூன்று தேர்தல்களிலும் தி.மு.க-வுக்கு எதிராகப் பிரசாரம் செய்தவர் பெரியார். தி.மு.க தலைவர்களைக் கடுமையாக விமர்சனம் செய்திருந்தார். அந்தத் தலைவர்கள் தன்னைச் சந்திக்க வந்திருக்கிறார்கள் என்றதும், உணர்ச்சிப் பெருக்கால் பெரியாருக்குப் பேச வார்த்தைகள் வரவில்லை. முதல்வராக, மார்ச் 6-ம் தேதி பதவியேற்றார் அண்ணா. இரா.நெடுஞ்செழியன் (கல்வி), கே.ஏ.மதியழகன் (உணவு), மு.கருணாநிதி (பொதுப்பணி), சத்தியவாணிமுத்து (பட்டியல் சமூக நலன்), செ.மாதவன் (சட்டம்), சாதிக்பாட்சா (சுகாதாரம்), ஏ.கோவிந்தசாமி (வேளாண்மை), பாவலர் முத்துசாமி (உள்ளாட்சி) ஆகியோர் அமைச்சர்களாகப் பதவியேற்றனர். இந்தியா விலேயே இளம் அமைச்சர்களைக் கொண்ட அமைச்சரவையாக அது விளங்கியது. கேரளாவில் சி.பி.எம் தலைமையிலான ஐக்கிய முன்னணி வெற்றிபெற்றிருந்தது. முதல்வராக அண்ணா பதவியேற்ற அதேநாளில், கேரள முதல்வராக இ.எம்.எஸ் பதவியேற்றார். ஒரிசாவில், காங்கிரஸை சுதந்திரா கட்சி தோற்கடித்தது. அங்கு ராஜேந்திர நாராயண் சிங் தியோ முதல்வராகப் பதவியேற்றார். ‘தேனிலவு முடிந்தது..!’ தமிழகச் சட்டமன்றத்துக்கு, சபாநாயகர் தேர்வுசெய்யப்பட வேண்டும். ம.பொ.சிவஞானத்தின் பெயரை ராஜாஜி பரிந்துரைத்தார். அதில் அண்ணாவுக்கு விருப்பமில்லை. அண்ணாவின் தேர்வாக சி.பா.ஆதித்தனார் இருந்தார். இதனால் வருத்தமடைந்த ராஜாஜி, ‘தேனிலவு முடிந்துவிட்டது’ என்றார். அதற்கு, ‘ஆமாம். எங்கள் இருவருக்குமான தேனிலவு முடிந்துவிட்டது. நாங்கள் குடும்பம் நடத்தத் தொடங்கிவிட்டோம்’ என்று பதில் சொன்னார் அண்ணா. தி.மு.க-வின் திட்டங்களும் விருப்பங்களும் செயலுக்கு வரத் தொடங்கின. புனித ஜார்ஜ் கோட்டையில் ‘தமிழக அரசு தலைமைச் செயலகம்’ என்ற பெயர்ப் பலகையை முதல்வர் அண்ணா திறந்துவைத்தார். தமிழக அரசின் கோபுரச் சின்னத்தில் ‘கவர்ன்மென்ட் ஆஃப் மெட்ராஸ்’ என்று இருந்ததை ‘தமிழக அரசு’ என்றும், ‘சத்யமேவ ஜெயதே’ என்பதை, ‘வாய்மையே வெல்லும்’ என்றும் மாற்றினார்கள். சென்னை மாகாணம்’ என்ற பெயரை, ‘தமிழ்நாடு’ என்று மாற்றுவதற்கான மசோதா 1968-ம் ஆண்டு, ஜூலை 18-ம் தேதி சட்டமன்றத்தில் நிறைவேற்றப்பட்டது. தமிழ்நாட்டின் அனைத்துப் பள்ளிகளிலும் கல்லூரிகளிலும் தமிழ், ஆங்கிலம் ஆகிய இரு மொழிகள் மட்டுமே கற்றுக் கொடுக்கப்படும்... இந்தி கற்றுத்தரப்பட மாட்டாது’ என்ற தீர்மானம், 1968-ம் ஆண்டு, ஜனவரி 23-ம் தேதி நிறைவேற்றப்பட்டது. வடமொழி மந்திரங்கள் இல்லாமல், புரோகிதர்கள் இல்லாமல், பெரியவர்களின் வாழ்த்துகளோடு நடத்தப்படும் சுயமரியாதைத் திருமணங்களுக்கு அங்கீகாரம் வழங்குவதற்கான சட்டமும் நிறைவேற்றப்பட்டது. தனியார் வசம் இருந்த பேருந்து சேவைகள், அரசுடைமை ஆக்கப்பட்டன. அரிசித் திட்டத்தில் சிக்கல்! அண்ணா அரசு மேற்கொண்ட நடவடிக்கை களைப் பல தரப்பினரும் வரவேற்றனர். ஆனால், தொடர்ந்து அவர் முன்வைத்து வந்த ‘ரூபாய்க்கு மூன்று படி அரிசி லட்சியம்... ஒரு படி அரிசி நிச்சயம்...’ என்ற வாக்குறுதியை நிறைவேற்றுவதில் சிக்கல் எழுந்தது. அந்தத் திட்டத்தை நிறைவேற்ற வேண்டுமென்றால், நிறைய செலவாகும் என்று அதிகாரிகள் தெரிவித்தனர். அதனால், ‘லட்சியத்தை’ நிறைவேற்ற முடியாமல், ‘நிச்சயத்தை’ மட்டுமே செயல்படுத்த முடிந்தது. இந்தத் திட்டம், சென்னையிலும் கோவையிலும் தொடங்கப்பட்டது. அதுவும், 32 லட்சம் பேருக்கு மட்டுமே அமல்படுத்தப்பட்டது. இது, மொத்த மக்கள்தொகையில் வெறும் ஏழு சதவிகிதம்தான். தமிழகத்தின் மற்ற பகுதிகளுக்கும் அதை விரிவுபடுத்த முடியவில்லை. நிதி நெருக்கடி ஒருபுறம் இருந்தாலும், மத்திய அரசின் ஒத்துழைப்பு இல்லை. படி அரிசித் திட்டத்துக்கு மானியத்தை அதிகரிக்குமாறு மாநில அரசு கோரியும், அதை மத்திய அரசு ஏற்கவில்லை. மத்தியத் தொகுப்பி லிருந்து அரிசி ஒதுக்கீட்டை அதிகரிக்கவும் மத்திய காங்கிரஸ் அரசு மறுத்துவிட்டது. கீழ்வெண்மணி கொடூரம்! அண்ணா ஆட்சியில் தேசத்தையே உலுக்கிய ஒரு துயரச் சம்பவம் நிகழ்ந்தது. ஒருங்கிணைந்த தஞ்சை மாவட்டத்தில், பண்ணை அடிமை முறை இருந்தது. விவசாயக் கூலித் தொழிலாளர்களாக இருந்த பட்டியலின மக்களை சாணிப்பால் குடிக்கவைப்பது, சவுக்கால் அடிப்பது என்ற கொடுமை நீடித்தது. அங்கு சாதி ஆதிக்கத்துக்கும், பண்ணையடிமை முறைக்கும் எதிராக மார்க்சிஸ்ட் கம்யூனிஸ்ட் கட்சியும், விவசாயிகள் சங்கமும் போராடின. கூலி உயர்வு கேட்டார்கள் என்பதற்காக, கீழ்வெண்மணி கிராமத்தில் 20 பெண்கள், 19 குழந்தைகள் உட்பட 44 பேரை உயிருடன் தீவைத்துக் கொளுத்தியது பண்ணையார் கும்பல். 1968-ம் ஆண்டு, டிசம்பர் 25-ம் தேதி நிகழ்ந்த அந்தச் சம்பவம், தேசத்தையே அதிர்ச்சிக்குள்ளாக்கியது. அந்தச் செய்தியைக் கேள்விப்பட்ட முதல்வர் அண்ணா கண்ணீர் சிந்தினார். மு.கருணாநிதி உள்ளிட்ட அமைச்சர்கள் கீழ்வெண்மணிக்கு விரைந்தனர். அந்தக் கொடூர நிகழ்வை, அன்றைய தி.மு.க அரசு கையாண்டவிதம், கடும் விமர்சனத்துக்கு உள்ளானது. திருப்பங்களும் குழப்பங்களும்! 1968-ம் ஆண்டு, அண்ணாவின் 60-வது பிறந்த நாளை, மணிவிழாவாகக் கொண்டாட ஏற்பாடுகள் நடைபெற்றன. அந்தச் சமயத்தில், உணவு சாப்பிடும்போது அண்ணாவுக்குத் தொண்டையில் வலி ஏற்பட்டது. தொண்டையில் சதை வளர்ந்திருப்பதை மருத்துவர்கள் கண்டறிந்தனர். கடைசியில், அது புற்றுநோயின் அறிகுறி என்று தெரியவந்தது. அமெரிக்காவில் அறுவை சிகிச்சை செய்துகொண்டு சென்னைக்குத் திரும்பிய அண்ணா 1969-ம் ஆண்டு, பிப்ரவரி 3-ம் தேதி காலமானார். அவரது மறைவு, தமிழக அரசியலின் பேரிழப்பாகப் பார்க்கப்பட்டது. தி.மு.க-வுக்குள் குழப்பங்களும், எதிர்பாராத திருப்பங்களும் ஏற்பட்டிருந்தன. அப்படி என்ன குழப்பங்களும் திருப்பங்களும் நடந்தன? (இன்னும் அறிவோம்)

எம்.ஜி.ஆரைச் சுட்ட எம்.ஆர்.ராதா!: “‘கலவரக்காரர்களை ஆதரிக்காதீர்… தி.மு.க-வுக்கு எதிராக பெரியார் பிரசாரம்: (தமிழக தேர்தல் வரலாறு-8 )

கருத்துகள் (Comments)

இந்தச் செய்தி குறித்து உங்கள் கருத்தைப் பதிவு செய்ங்கள்!