ஆணவக் கொலை செய்யப்பட்ட காதலன்; சடலத்துடன் திருமணம் செய்த காதலி - கலங்கிய கிராமம்

மகாராஷ்டிராவின் நான்டெட் பகுதியைச் சேர்ந்த சக்ஷம் டேட் என்பவரும், அதே பகுதியைச் சேர்ந்த ஆஞ்சல் என்பவரும் கடந்த சில வருடங்களாகக் காதலித்து வந்தனர். இருவரும் வேறு வேறு சாதியைச் சேர்ந்தவர்கள் என்பதால், ஆஞ்சலின் குடும்பத்தினர் இவர்களின் காதலுக்குக் கடுமையாக எதிர்ப்பு தெரிவித்தனர். இதனால் இருவரும் பதிவுத் திருமணம் செய்துகொள்ள முடிவு செய்ததாகக் கூறப்படுகிறது. இந்த வதந்தியை நம்பிய ஆஞ்சலின் சகோதரர்களும், அவருடைய தந்தையும் சக்ஷம் டேட்டைக் கொடூரமாகத் தாக்கி, சுட்டுக் கொலை செய்து, சக்ஷம் டேட்டின் தலை அடையாளம் தெரியாதவாறு நசுக்கியிருக்கின்றனர். இந்தக் கொடூரச் செயலால் அந்தப் பகுதியில் பெரும் பரபரப்பு ஏற்பட்டது. சக்ஷம் டேட் கொலை செய்யப்பட்டதை அறிந்த ஆஞ்சல், தனது குடும்பத்தாரிடமிருந்து தப்பித்து, சக்ஷம் டேட்டின் இறுதிச் சடங்கு நடக்கும் இடத்துக்குச் சென்றிருந்தார். அங்கு, அவருடைய முகத்திலும் உடலிலும் மஞ்சள் பூசி, நெற்றியில் குங்குமம் வைத்துக்கொண்டு, சக்ஷம் டேட்டின் சடலத்துடன் திருமணம் செய்துகொண்டார். இந்த நெகிழ்ச்சியான காட்சிகள் அங்கிருந்தவர்களைச் சோகத்தில் ஆழ்த்தியது. அதனைத் தொடர்ந்து செய்தியாளர்களிடம் பேசிய ஆஞ்சல், "இந்தத் திருமணம் நடக்கக்கூடாது என்பதுதான் என் சகோதரர்களுக்கும், என் அப்பாவுக்கும் ஆசை. அவர்களின் ஆசை நடக்கவில்லை. அவர்கள் தோற்றுவிட்டார்கள், என் காதலன் வென்றுவிட்டான். அவர்கள் கொலை செய்தது என் காதலனைத்தான், என் காதலை அல்ல. அதனால்தான் நான் அவனைத் திருமணம் செய்துகொண்டேன். இனி சக்ஷமின் மனைவியாக, அவர் அப்பா அம்மாவுக்கு மருமகளாக அவர் வாழ்ந்த வீட்டிலேயே வாழ்வேன். இந்தக் கொடூரக் கொலையை அரங்கேற்றிய என் குடும்பத்தாருக்குக் கடுமையான தண்டனையை உறுதி செய்ய வேண்டும்" என்று ஆவேசத்துடன் தெரிவித்தார். காவல்துறை பல்வேறு பிரிவுகளின் கீழ் ஆறு குற்றவாளிகள் மீது வழக்குப் பதிவு செய்து, அவர்களைக் கைது செய்திருக்கிறது. இந்தச் சம்பவம் அந்தப் பகுதியில் பெரும் சோகத்தையும், அதிர்ச்சியையும் ஏற்படுத்தியிருக்கிறது.