கமலா ஹரிஸின் சிரேஷ்ட ஆலோசகர் பதவியில் இலங்கையைப் பூர்வீகமாகக்கொண்ட பெண் நியமனம்!

அமெரிக்காவின் உப ஜனாதிபதியாகத் தெரிவாகியிருக்கும் கமலா ஹரிஸின் அலுவலகப் பிரதானியும் சிரேஷ்ட ஆலோசகருமான ரோஹினி லக்ஷ்மி ரவிந்திரன் இலங்கையைப் பூர்வீகமாகக்கொண்ட ஒரு அமெரிக்கத் தமிழ்ப் பெண்ணாவார். இலங்கையிலிருந்து 1980 களின் ஆரம்பத்தில் அமெரிக்காவின் நியூஜேர்ஸிக்கு புலம்பெயர்ந்த தமிழ்த் தம்பதிகளான டாக்டர் விஜேயதேவேந்திரம் ரவீந்திரன், ஷோபனா ரவீந்திரன் ஆகியோருக்கு மகளாகப் பிறந்த ரோஹினி மூன்று பிள்ளைகளின் தாயாவார். அவர் அமெரிக்காவின் மிச்சிக்கன் பல்கலைக்கழகத்திலும் ஜோர்ஜ் வாஷிங்டன் பல்கலைக்கழகத்திலும் தனது உயர்கல்வியைப் பூர்த்திசெய்துள்ளார். மின்னஞ்சல் அலுவலக நிர்வாகியாகவே தேசிய அரசியலுக்கு அறிமுகமானார். அதனைத்தொடர்ந்து தேர்தலின் ஊடாகத் தெரிவாகிய உத்தியோகத்தர்கள் மற்றும் தேர்தலில் போட்டியிடும் வேட்பாளர்களுக்கான ஆலோசகராக சுமார் 15 வருடங்களுக்கு மேலாக பணியாற்றினார். தற்போது அமெரிக்காவின் உப ஜனாதிபதியாகத் தெரிவாகியிருக்கும் கமலா ஹரிஸின் அலுவலகப் பிரதானியாகவும் சிரேஷ்ட ஆலோசகராகவும் நியமிக்கப்பட்டுள்ளமை குறிப்பிடத்தக்கது.