பொலிஸ் கணவனுடன் தகராறு; பச்சிளம் குழந்தையுடன் கடலில் பாய்ந்த பெண்

கொழும்பு கொள்ளுப்பிட்டி கடற்கரையில் நேற்று (7) கடலில் விழுந்து ஒரு வயது மற்றும் இரண்டு மாதக் குழந்தை காணாமல் போனதாக கொள்ளுப்பிட்டி பொலிஸார் தெரிவித்தனர். சம்பவத்தில் கடலில் விழுந்த தாய் மீட்கப்பட்டு கொழும்பு தேசிய மருத்துவமனையில் அனுமதிக்கப்பட்டதாக பொலிஸார் தெரிவித்தனர். கணவருடனான தகராறில், குறித்த பெண் தனது குழந்தையுடன் வெலிமடைப் பகுதியிலிருந்து கொள்ளுப்பிட்டிக்கு வந்ததாக பொலிஸ் விசாரணைகளில் தெரியவந்துள்ளது. பெண்ணின் கணவர் நுவரெலியா பகுதியில் உள்ள ஒரு காவல் நிலையத்தில் பணிபுரியும் ஒரு காவல் அதிகாரி என்பது தெரியவந்துள்ளது. குடும்ப தகராறால் பெண், குழந்தையுடன் கடலில் குதித்து தற்கொலைக்கு முயன்றாரா என்பது தொடர்பில் பொலிஸார் மேலதிக விசாரணைகளை மேற்கொண்டு வருகின்றனர்.