வவுனியாவில் பதின்ம வயது சிறுமி பாலியல் வல்லுறவு

குற்றவாளிக்கு 10 ஆண்டுகள் கடூழிய சிறை – மேல் நீதிமன்றம் தீர்ப்பு

வவுனியா:
வவுனியா, விநாயகபுரம் பகுதியைச் சேர்ந்த 16 வயதுக்குட்பட்ட சிறுமியை கடத்திச் சென்று பாலியல் வல்லுறவு செய்த குற்றச்சாட்டில் தொடர்புடைய நபருக்கு 10 ஆண்டுகள் கடூழிய சிறைத்தண்டனை விதித்து வவுனியா மேல் நீதிமன்றம் தீர்ப்பளித்துள்ளது.

சம்பவ விவரம்

கடந்த 2020 ஆம் ஆண்டு ஜூன் மாதம் 18 ஆம் திகதி, வவுனியா விநாயகபுரம் பகுதியில் வசித்த 16 வயதுக்குட்பட்ட சிறுமியை கடத்திச் சென்று பாலியல் வன்புணர்வு செய்ததாக, அதே பகுதியைச் சேர்ந்த 33 வயதுடைய நபரை பொலிஸார் கைது செய்தனர்.

சட்ட நடவடிக்கை

இதனைத் தொடர்ந்து, சந்தேகநபர் பி அறிக்கை மூலம் வவுனியா நீதிவான் நீதிமன்றத்தில் முற்படுத்தப்பட்டு வழக்கு தொடரப்பட்டது. பின்னர், 2023 டிசம்பர் 22 ஆம் திகதி, சந்தேகநபருக்கு எதிராக சட்டமா அதிபர் திணைக்களத்தால் குற்றப் பகிர்வுப் பத்திரம் தாக்கல் செய்யப்பட்டு, வவுனியா மேல் நீதிமன்றத்தில் வழக்கு விசாரணை ஆரம்பமானது.

நீதிமன்ற தீர்ப்பு

வழக்கு விசாரணையின் போது, குறித்த 33 வயதுடைய நபருக்கு எதிரான குற்றச்சாட்டுக்கள் உறுதி செய்யப்பட்டதை அடுத்து, நேற்றைய தினம் (09) தீர்ப்பு வழங்கப்பட்டது.

இதன்போது, வவுனியா மேல் நீதிமன்ற நீதிபதி எம். எம். எம். மிஹால் திறந்த நீதிமன்றில் தீர்ப்பை வாசித்துக் காட்டினார்.

தண்டனை விவரம்

நீதிமன்ற தீர்ப்பின்படி,

• 10 ஆண்டுகள் கடூழிய சிறைத்தண்டனை

• ரூ. 10,000 தண்டப்பணம் (செலுத்தத் தவறின் 2 மாதங்கள் சாதாரண சிறை)

• பாதிக்கப்பட்ட சிறுமிக்கு ரூ. 2,00,000 இழப்பீடு (செலுத்தத் தவறின் 1 ஆண்டு சிறை)

என குறித்த குற்றவாளிக்கு தண்டனை விதிக்கப்பட்டுள்ளது.