10 வயது சிறுமி பாலியல் வன்கொடுமைக்கு பின் படுகொலை: தமிழக முதல்வர் விஜய் அதிரடி நடவடிக்கை

Tamil Nadu மாநிலத்தின் கோயம்புத்தூரை அடுத்த சூலூர் பகுதியில் 10 வயது சிறுமி ஒருவர் பாலியல் வன்கொடுமைக்கு உள்ளாக்கப்பட்டு கொடூரமாக படுகொலை செய்யப்பட்ட சம்பவம் தமிழகம் முழுவதும் பெரும் அதிர்ச்சியையும் சோகத்தையும் ஏற்படுத்தியுள்ளது.

இந்த மனிதநேயமற்ற சம்பவம் தொடர்பாக இரு சந்தேகநபர்களை பொலிஸார் கைது செய்து தீவிர விசாரணைகளை முன்னெடுத்து வருகின்றனர். சிறுமிக்கு நேர்ந்த இந்த கொடூரத்திற்கு அரசியல் தலைவர்கள், சமூக ஆர்வலர்கள் மற்றும் பொதுமக்கள் பலரும் கடும் கண்டனங்களை வெளியிட்டு வருகின்றனர்.

இந்நிலையில், ஜோசப் விஜய் வெளியிட்டுள்ள அறிக்கையில், “கோயம்புத்தூரில் 10 வயது சிறுமிக்கு நிகழ்ந்த இந்த கொடூர சம்பவம் மிகுந்த வேதனையையும் அதிர்ச்சியையும் அளிக்கிறது. இத்தகைய மன்னிக்க முடியாத குற்றங்கள் சமூகத்தில் ஒருபோதும் ஏற்றுக்கொள்ளப்பட முடியாது” என தெரிவித்துள்ளார்.

மேலும், பெண்கள் மற்றும் குழந்தைகளுக்கு எதிராக நடைபெறும் இத்தகைய அராஜக செயல்களில் ஈடுபடுவோருக்கு சட்டத்தின் கீழ் கடுமையான தண்டனை பெற்றுத்தர தமிழக அரசு உறுதியுடன் செயல்படும் என்றும், இதற்கான அனைத்து அவசர நடவடிக்கைகளும் மேற்கொள்ளப்படும் என்றும் அவர் குறிப்பிட்டுள்ளார்.

இதனைத் தொடர்ந்து, உயிரிழந்த சிறுமியின் பெற்றோருடன் முதலமைச்சர் விஜய் தொலைபேசி மூலம் தொடர்புகொண்டு ஆறுதல் தெரிவித்ததுடன், குற்றவாளிகளுக்கு கடுமையான தண்டனை வழங்க நடவடிக்கை எடுக்கப்படும் என உறுதியளித்துள்ளார்.

மேலும், அமைச்சர்கள் விஜய் தமிழன் மற்றும் சம்பத் குமார் ஆகியோர் நேரில் சென்று குடும்பத்தினரை சந்தித்து ஆறுதல் தெரிவித்ததுடன், ரூபாய் 7 இலட்சம் மதிப்பிலான நிவாரண காசோலையும் வழங்கியுள்ளனர்.

இந்த சம்பவம் குழந்தைகள் பாதுகாப்பு, பெண்கள் பாதுகாப்பு மற்றும் சமூகத்தில் அதிகரித்து வரும் பாலியல் குற்றங்கள் குறித்து மீண்டும் தீவிரமான விவாதங்களை எழுப்பியுள்ளது.