SriLankan Airlines இல் 8 கோடி ஹெக்கிங் சர்ச்சை – “பொறுப்பு எங்களுக்கில்லை” என அதிர்ச்சி அறிவிப்பு

இலங்கையின் தேசிய விமான சேவை நிறுவனமான SriLankan Airlines தொடர்பான பரிவர்த்தனையில் சுமார் 8 கோடி ரூபாய் ஹெக்கிங் செய்யப்பட்ட சம்பவம் பரபரப்பை ஏற்படுத்தியுள்ளது.

இந்த மோசடியை நிறுவனம் ஒப்புக்கொண்டிருந்தாலும், அதற்கான பொறுப்பை ஏற்க முடியாது என அதிகாரப்பூர்வமாக அறிவித்திருப்பது மேலும் சர்ச்சையை அதிகரித்துள்ளது.

தகவல்களின் படி, துபாயில் உள்ள சேவை வழங்குநர் ஒருவரின் மின்னஞ்சல் கணக்கு மூன்றாம் தரப்பினரால் ஹெக் செய்யப்பட்டதன் மூலம் இந்த பண மோசடி இடம்பெற்றுள்ளது. அந்த மின்னஞ்சல் மூலம் அனுப்பப்பட்ட போலியான அறிவுறுத்தல்கள் மற்றும் ஆவணங்களின் அடிப்படையில் இந்த கொடுப்பனவு செய்யப்பட்டதாக தெரிவிக்கப்படுகிறது.

மேலும், இந்தியாவின் Chennai நகரில் அமைந்துள்ள அலுவலகத்திலும் தனியே ஒரு பண மோசடி நடந்துள்ளதாக கூறப்படுகிறது. அங்கு நிதி பிரிவில் பணியாற்றிய சிலர் இன்வாய்ஸ் மற்றும் கையொப்பங்களை மாற்றி சுமார் 22 மில்லியன் இந்திய ரூபாய்களை கையாடல் செய்துள்ளதாக குற்றச்சாட்டு எழுந்துள்ளது.

இந்த சம்பவம் வெளிச்சத்திற்கு வந்தவுடன் சம்பந்தப்பட்ட கணக்குகளுக்கு பணம் அனுப்புவதை நிறுத்த நடவடிக்கை எடுக்கப்பட்டுள்ளதாக நிறுவனம் தெரிவித்துள்ளது.

மேலும், இந்த விவகாரம் குறித்து ஐக்கிய அரபு அமீரக அதிகாரிகளுக்கும் இலங்கை குற்றப் புலனாய்வுத் திணைக்களத்திற்கும் முறைப்பாடு செய்யப்பட்டுள்ளதாகவும், இரு நாடுகளிலும் விசாரணைகள் முன்னெடுக்கப்பட்டு வருவதாகவும் கூறப்பட்டுள்ளது.

இந்த சம்பவம், சர்வதேச பரிவர்த்தனைகளில் மின்னஞ்சல் பாதுகாப்பு குறைபாடுகள் மற்றும் நிறுவனங்களின் உள்நாட்டு கட்டுப்பாட்டு அமைப்புகள் குறித்து தீவிர கேள்விகளை எழுப்பியுள்ளது.