அனுர பிரியதர்ஷன யாப்பா மீதான வழக்கு ஒத்திவைப்பு!

இலங்கை பெற்றோலியக் கூட்டுத்தாபனத்திற்குச் சொந்தமான 61 இலட்சம் ரூபாவிற்கும் அதிக நிதியை மோசடி செய்ததாகத் தொடரப்பட்ட வழக்கில், முன்னாள் அமைச்சர் அனுர பிரியதர்ஷன யாப்பா உள்ளிட்ட 7 பேருக்கு எதிரான விசாரணையை ஜூன் மாதம் 19ஆம் திகதிக்கு ஒத்திவைப்பதாகக் கொழும்பு மேல் நீதிமன்றம் உத்தரவிட்டுள்ளது. நேற்று (13.05.2026) இவ்வழக்கு விசாரணைக்கு எடுத்துக்கொள்ளப்பட்ட போதே இந்த அறிவிப்பு வெளியானது.

கடந்த 2014 - 2015 ஆம் ஆண்டு காலப்பகுதியில், வெள்ள நிவாரணம் வழங்குவதாகக் கூறி பெற்றோலியக் கூட்டுத்தாபனத்தின் 61 இலட்சத்து 46 ஆயிரத்து 110 ரூபா நிதியைத் தவறாகப் பயன்படுத்தியதாகச் சட்டமா அதிபரால் இவர்களுக்கு எதிராகக் குற்றப்பத்திரிகை தாக்கல் செய்யப்பட்டுள்ளது.

 இந்த வழக்கில் முன்னாள் அமைச்சர் அனுர பிரியதர்ஷன யாப்பா மற்றும் அவரது மனைவி உள்ளிட்ட 7 பேர் பிரதிவாதிகளாகக் குறிப்பிடப்பட்டுள்ளனர். 

அரசாங்க நிதியைத் துஷ்பிரயோகம் செய்தமை தொடர்பான இந்த விவகாரத்தில் மேலதிக விசாரணைகளை நீதிமன்றம் அடுத்த மாதம் முன்னெடுக்கவுள்ளது.