அரசுடன் இணைகிறாரா ஹர்ஷ? - பரவும் வதந்திகளுக்கு அதிரடி முற்றுப்புள்ளி!

தான் தற்போதைய அரசாங்கத்துடன் இணையப்போவதாகத் திட்டமிட்டுப் பரப்பப்படும் வதந்திகளை ஐக்கிய மக்கள் சக்தியின் நாடாளுமன்ற உறுப்பினர் ஹர்ஷ டி சில்வா முற்றாக நிராகரித்துள்ளார். குறுகிய அரசியல் இலாபங்களுக்காகத் தான் ஒருபோதும் முடிவுகளை எடுப்பதில்லை என்றும், நாட்டைப் பொருளாதார ரீதியாக முன்னேற்ற வேண்டும் என்ற உன்னத நோக்கிலேயே பொதுவாழ்வுக்கு வந்ததாகவும் அவர் தெரிவித்துள்ளார். தன்னை எதிரணியிலிருந்து வெளியேற்றச் சில குழுக்கள் முயற்சிப்பதாகவும், அத்தகைய முயற்சிகள் ஒருபோதும் பலிக்காது என்றும் அவர் திட்டவட்டமாகக் கூறியுள்ளார்.

தற்போதைய அரசு எதிர்காலப் பொருளாதாரக் கண்ணோட்டம் இல்லாத ஒரு தோல்வியடைந்த அரசு என விமர்சித்துள்ள அவர், மூடிய கொள்கைகள் மூலம் நாட்டை ஒருபோதும் கட்டியெழுப்ப முடியாது எனச் சுட்டிக்காட்டியுள்ளார். தான் எவருடனும் பேச்சுவார்த்தை நடத்தவில்லை என்பதை உறுதிப்படுத்திய ஹர்ஷ டி சில்வா, ஐக்கிய மக்கள் சக்திக்குள் பிளவுகளை ஏற்படுத்தவே இத்தகைய பொய்யான செய்திகள் பரப்பப்படுவதாகக் குறிப்பிட்டுள்ளார். நல்ல முடிவுகளுக்கு ஆதரவளிக்கும் புதிய அரசியல் கலாசாரத்தை ஊக்குவிப்பதாகவும், அரசுக்கு எதிரான தனது போராட்டத்தை வரும் நாட்களில் மேலும் தீவிரப்படுத்த உள்ளதாகவும் அவர் தனது அறிக்கையில் தெரிவித்துள்ளார்.