ஆர்சிபி பந்துவீச்சை சிதறடித்து 192 ரன்கள் குவித்தது கொல்கத்தா!

ஐபிஎல் 2026 தொடரின் இன்றைய லீக் போட்டியில் ராயல் சேலஞ்சர்ஸ் பெங்களூரு அணிக்கு எதிராகக் கொல்கத்தா நைட் ரைடர்ஸ் அணி 192 ரன்கள் என்ற இமாலய இலக்கை நிர்ணயித்துள்ளது. மழையால் தாமதமாகத் தொடங்கிய இந்தப் போட்டியில் டாஸ் வென்ற பெங்களூரு கேப்டன் ரஜத் படிதார், முதலில் பந்துவீச்சைத் தேர்வு செய்தார். கொல்கத்தா அணியின் தொடக்க வீரர்கள் ரஹானே (19) மற்றும் பின் ஆலன் (18) சொற்ப ரன்களில் ஆட்டமிழக்க, பவர் பிளே முடிவில் அந்த அணி 48 ரன்களுக்கு 2 விக்கெட்டுகளை இழந்து சற்றுத் தடுமாறியது.

இருப்பினும், 3-வது விக்கெட்டுக்கு ஜோடி சேர்ந்த அங்கிரிஷ் ரகுவன்ஷி மற்றும் கேமரூன் கிரீன் ஜோடி ஆட்டத்தின் போக்கை மாற்றியது. நிதானமாக விளையாடிய கிரீன் 32 ரன்களுக்கு வெளியேற, மறுபுறம் நங்கூரமாக நின்ற இளம் வீரர் ரகுவன்ஷி 46 பந்துகளில் 71 ரன்கள் விளாசி அசத்தினார். இறுதி நேரத்தில் களம் புகுந்த ரிங்கு சிங், தனது வழக்கமான அதிரடியால் 29 பந்துகளில் 49 ரன்கள் குவிக்க, கொல்கத்தா அணி 20 ஓவர்கள் முடிவில் 4 விக்கெட் இழப்பிற்கு 192 ரன்களை எட்டியது. பெங்களூரு தரப்பில் புவனேஸ்வர் குமார், ஹேசில்வுட் மற்றும் ரசிக் சலாம் தலா ஒரு விக்கெட்டை வீழ்த்தினர். ஜேக்கப் டஃபி மற்றும் குருணால் பாண்டியா அதிக ரன்களை வாரி வழங்கியது அந்த அணிக்குப் பின்னடைவாக அமைந்தது.