இசையமைப்பாளர் தேவா காலமானார் - 400க்கும் மேலான படங்களில் பங்காற்றிய 'தேனிசைத் தென்றல்

அண்ணாமலை, பாட்ஷா உள்பட சுமார் 400க்கும் மேலான படங்களின் இசையமைப்பாளர் தேவா காலமானார்.


மேலும், "மருத்துவமனைக்கு அழைத்து வந்த பிறகு உடனடியாக வென்டிலேட்டர், சிபிஆர் உள்பட கொடுக்க வேண்டிய சிகிச்சைகளை வழங்கினோம். சர்வதேச தரத்திலான முதலுதவிகளை வழங்கினோம். ஆனால் அவரது உடல் ஒத்துழைக்கவில்லை. 1.5 மணிநேரம் வரை முயன்றோம். பல்துறை மருத்துவர்கள் இணைந்து சிகிச்சை அளித்தார்கள். எவ்வளவு முயன்றும் இதயத் துடிப்பை மீட்டு உயிர்ப்பிக்க முடியவில்லை" என்று தெரிவித்தனர்.

தேனிசைத் தென்றல் என ரசிகர்களால் அழைக்கப்படும் இசையமைப்பாளர் தேவா, தமிழ் திரையுலகில் தனக்கென்று தனித்த இடம் பிடித்த இசையமைப்பாளர்களில் ஒருவர்.

கடந்த 1989ஆம் ஆண்டு வெளிவந்த 'மனசுக்கேத்த மகாராசா' என்கிற படத்தின் மூலம் அறிமுகமான தேவா பல்வேறு மொழிகளில் 400க்கும் மேற்பட்ட படங்களுக்கு இசையமைத்துள்ளார்.

கடந்த 90களில் இளையராஜா ஒருபுறம், ஏ.ஆர் ரஹ்மான் மறுபுறம் ஆதிக்கம் செலுத்தி வந்த காலகட்டத்தில் தேவாவின் பாடல்களுக்குத் தனித்த ரசிகர் பட்டாளம் இருந்தது. 2022ஆம் ஆண்டு 'தேவா தேவாதான்' இசை நிகழ்ச்சியில் பேசிய நடிகர் ரஜினிகாந்த் இதை சிலாகித்துப் பேசியிருப்பார்.

கானா பாடல்களை திரையுலகில் மைய நீரோட்டப்படுத்தியதில் தேவா முக்கியமானவராக அறியப்படுகிறார். தன்னை கானா பாடல்களோடு முத்திரை குத்துவது பற்றி தேவா பல இடங்களில் பேசியிருந்தாலும் அது தனக்கு மகிழ்ச்சி தருவதாகவும் குறிப்பிட்டுள்ளார்.


தான் தனித்துத் தெரிவது குறித்து ஒரு முறை பேசியபோது, "கானாக்கள் என் சிறப்பம்சமாக ஆகிவிட்டன. எத்தனையோ இசையமைப்பாளர்கள் 'மெலடி' பாடல்களைத் தருகிறார்கள். அவர்களில் ஒருவராகிப் போயிருப்பேன். ஆனால், கானா பாடல்களைத் தந்த காரணத்தால்தான் வித்தியாசமாக நிற்கிறேன்" என்றார் இசையமைப்பாளர் தேவா.

அதோடு, "உலகமெங்கும் வசிக்கும் தமிழ் மக்கள் தங்கள் மகிழ்ச்சிக்கும் துக்கத்திற்கும் அந்த கானா பாடல்களைப் பயன்படுத்துவதைக் கேள்விப்படும்போது மிகுந்த மகிழ்ச்சியாக இருக்கிறது" என்றும் பிபிசி தமிழுக்கு அளித்த ஒரு நேர்காணலில் அவர் தெரிவித்திருந்தார்.

குறிப்பாக தனக்கு "கானா ஒரு கண் என்றால் மெலடி மற்றொரு கண்" என சமீபத்தில் நிகழ்ச்சி ஒன்றில் பேசுகையில் தேவா குறிப்பிட்டிருந்தார்.

கானா பாடல்கள், மெலடி பாடல்கள், பின்னணி இசை, ஹீரோ அறிமுகப் பாடல்கள் எனப் பல ஜானர்களில் அவர் தடம் பதித்துள்ளார். அவர் தனது திரைப்படங்கள் மட்டுமல்லாது பிற இசையமைப்பாளர்களின் இசையிலும் பாடல்களைப் பாடியுள்ளார்.

தேவா இசையமைத்த பல பாடல்கள் அவருடையதுதான் எனத் தெரியாமலே கேட்கப்படுவதுண்டு. கடந்த 2024ஆம் ஆண்டு வெளியான லப்பர் பந்து படத்திலும் ஒரு காட்சி இடம்பெற்றிருக்கும். பேருந்தில் பாடல் ஒலித்துக் கொண்டிருக்கும்போது முதியவர் ஒருவர் 'ராஜா ராஜாதான்' எனக் குறிப்பிடுகையில் இளைஞர் ஒருவர் இது தேவா பாடல் எனப் பதிலளிப்பார்.

சமீபத்தில் நிகழ்ச்சி ஒன்றில் இதைக் குறிப்பிட்டுப் பேசிய தேவா, "நான் ஒரு கச்சேரிக்காகச் சென்றபோது அதில் பாடவிருந்த பாடல்களின் பட்டியலை நிகழ்ச்சி ஒருங்கிணைப்பாளரிடம் வழங்கினேன். அதற்கு அவர் 'உங்கள் பாடல்களைப் பாடுங்கள் எனக் கூறினார்'. தொடர்ந்து புல்வெளி புல்வெளி' நீங்கள் இசையமைத்தா என என்னிடமே கேட்டார்" எனக் குறிப்பிட்டிருந்தார்.

முன்பு ஒருமுறை தேவா குறித்து பிபிசி தமிழிடம் பேசிய மேடை பாடகரான தியாகராஜன், "மேடை இசைக் கலைஞர்களுக்கு தேவா கடவுள் போன்றவர்," என்றார். கடந்த 40 ஆண்டுகளாக மேடைக் கச்சேரிகள் நடத்திய அனுபவம் கொண்ட தியாகராஜன், திருநெல்வேலி மாவட்ட மேடை இசைக் கலைஞர்கள் சங்கத்தின் துணைத் தலைவராகவும் உள்ளார். தேவாவுடன் நிகழ்ச்சிகளிலும் கலந்து கொண்டுள்ளார்.
இசையமைப்பாளர் தேவா

திரைப் பாடல்களைக் கடந்து தேவாவின் பக்திப் பாடல்களும் கச்சேரிகளில் பிரபலமானவை என அவர் குறிப்பிடுகிறார். "மூன்று மணிநேர கச்சேரி நடந்தால் அதில் சுமார் 1.5 மணி நேரம் தேவா பாடல்கள்தான் ரசிகர்கள் கேட்பார்கள்" என அவர் குறிப்பிட்டார்.

"நாட்டுப்புறப் பாடல்களை 90களின் தொடக்கத்தில் மீண்டும் பிரபலமாக்கியதில் தேவாவுக்கு முக்கியப் பங்கு உண்டு. தேவா பாடகர்களை மட்டுமல்ல பல இசைக் கலைஞர்களையும் அறிமுகம் செய்துள்ளார்" என்று தெரிவித்தார் தியாகராஜன்.

"நடிகர்கள் ரஜினி, கமலுக்கு மட்டுமல்லாது விஜய் மற்றும் அஜித்தின் தொடக்க காலத்தில் பல படங்களில் தேவா பணியாற்றி பல்வேறு ஹிட் பாடல்களைக் கொடுத்துள்ளார். 90களின் பிரபலமான நடிகர்களை எடுத்துக் கொண்டால் தேவாவுடன் ஒரு ஹிட் பாடலேனும் கொடுத்திருப்பார்கள்" என்றார் தியாகராஜன்.

இசையமைப்பாளர் தேவாவின் மறைவுக்கு திரைப் பிரபலங்களும் அரசியல் தலைவர்களும் இரங்கல் தெரிவித்து வருகின்றனர்.

தமிழ்நாடு ஆளுநர் ராஜேந்திர விஸ்வநாத் ஆர்லேகர், "தனது இனிமையான இசையமைப்பாலும், மறக்க முடியாத பாடல்களாலும் தமிழ் திரையிசை உலகில் தனித்துவமான இடத்தைப் பெற்ற தேவாவின் மறைவு, தமிழ் திரையுலகிற்கும் இசை உலகிற்கும் ஈடுசெய்ய முடியாத இழப்பு" என்று தனது இரங்கல் பதிவில் கூறியுள்ளார்.

பாஜக மாநிலத் தலைவர் நயினார் நாகேந்திரன் தனது எக்ஸ் பக்கத்தில், "தனது தனித்துவமான இசையாலும், இனிமையான மெட்டுகளாலும், மக்கள் மனங்களில் என்றும் ஒலித்துக் கொண்டிருக்கும் எண்ணற்ற பாடல்களாலும் தமிழ் இசை உலகில் அழியாத தடம் பதித்தவர் தேவா. அவரது இசை, தலைமுறைகள் பல கடந்தும் நம் நினைவுகளிலும் இதயங்களிலும் உயிர்ப்புடன் வாழும்" என்று பதிவிட்டுள்ளார்.

அதேபோல, வீ த லீடர்ஸ் அமைப்பைச் சேர்ந்த அண்ணாமலை, "தனித்துவமான இசையாலும், எண்ணற்ற இனிமையான பாடல்களாலும், தமிழ் மக்களின் இதயங்களில் நீங்கா இடம்பிடித்தவர். அவரது இசைப் பங்களிப்பு, திரையுலகில் என்றும் நிலைத்திருக்கும்" என்று தனது எக்ஸ் பதிவில் கூறியுள்ளார்.

விடுதலைச் சிறுத்தைகள் கட்சியின் துணை பொதுச் செயலாளரும் நாடாளுமன்ற உறுப்பினருமான ரவிக்குமார் எக்ஸ் பக்கத்தில், "கிராமப்புறங்களில் வாழும் விளிம்பு நிலை மக்களின் இசையை இளையராஜா பொது நீரோட்டத்துக்குக் கொண்டு வந்தது போல நகர்ப்புற விளிம்பு நிலை மக்களின் இசையைப் பொது நீரோட்டத்துக்குக் கொண்டு வந்தவர் தேவா. அவரது மறைவு தமிழ்த் திரையுலக இசைக்குப் பேரிழப்பு. அவருக்கு என் அஞ்சலி" என்று பதிவிட்டுள்ளார்.

திரைப்பட நடிகர் விஜய் சேதுபதி, "தமிழ் திரையுலகின் இசை உலகில் தனக்கென ஒரு முத்திரை பதித்த இசையமைப்பாளர் தேவாவின் மறைவு மிகுந்த வேதனை அளிக்கிறது. அவரது இசையும், பாடல்களும் என்றும் நம் நினைவுகளில் வாழும்" என்று பதிவிட்டு இரங்கல் தெரிவித்துள்ளார்.

பாமக தலைவர் அன்புமணி ராமதாஸ் வெளியிட்ட இரங்கல் பதிவில், "தமிழ்த் திரையுலகுக்கு இசையமைப்பாளர் தேவாவின் பங்களிப்பு மிகப் பெரியது. எளிய பின்னணியில் இருந்து வந்த தேவா, தமிழ்த் திரையுலகை இசைஞானி இளையராஜாவும், இசைப்புயல் ஏ.ஆர்.ரகுமானும் ஆட்சி செய்து கொண்டிருந்த நிலையில், தனக்கென ஓர் இடத்தைப் பிடித்து இசை சாம்ராஜ்யம் நடத்தியவர்" என்று கூறியுள்ளார்.

தமிழ்நாடு முதலமைச்சர் ச. ஜோசப் விஜய் வெளியிட்ட இரங்கல் பதிவில், "தமிழ், தெலுங்கு, மலையாளம், கன்னடம் ஆகிய மொழிகளில் 400க்கும் மேற்பட்ட திரைப்படங்களுக்கு இசையமைத்ததோடு, பல கானா பாடல்களை எழுதி, அவரே பாடியும் உள்ளார். கலைமாமணி உள்ளிட்ட பல்வேறு விருதுகளைப் பெற்ற தேவா அவர்களின் இசைப் பயணமும், பாடல்களும் திரையிசை வரலாற்றில் என்றும் நிலைத்திருக்கும். அவரது மறைவு தமிழ்த் திரையுலகிற்கு பேரிழப்பாகும்" என்று கூறியுள்ளார்.

திமுக தலைவர் மு.க.ஸ்டாலின் தனது இரங்கல் பதிவில், "தமிழ் வெகுசன இசை வரலாற்றை தேவா அவர்களை விடுத்துவிட்டு எவராலும் எழுத முடியாது. பல அத்தியாயங்களை அவருக்கென ஒதுக்கியாக வேண்டும். பொறாமை, வஞ்சகம், சூது வாது ஏதுமறியாத வெள்ளை மனம் கொண்டவர் தேவா. கானா வகைமைப் பாடல்களைத் திரையிசையில் பெரிய அளவில் புகுத்தி, கானா என்றாலே தேவாதான் என அறியப்பட்டவர்" எனத் தெரிவித்துள்ளார்.

"எளிமையான கிராமத்துப் பின்னணியில் இருந்து சென்னைக்கு வந்து, தென்னிந்திய திரையுலகின் முன்னணி இசையமைப்பாளராக உயர்ந்து எத்தனையோ பேருக்கு ஆதர்சமாகத் திகழ்ந்தவர்" எனப் பாராட்டிய மு.க.ஸ்டாலின், "உச்ச நட்சத்திரங்கள் அனைவரது படங்களுக்கும் இசையமைத்து, அவற்றின் வெற்றிக்கு உறுதுணையாக இருந்தவர்" என்று கூறியுள்ளார்.

"பிரபல திரைப்பட இசையமைப்பாளரும், சிறந்த பாடகருமான தேனிசைத் தென்றல் தேவா மாரடைப்பால் காலமானார்" என்ற செய்தி மிகுந்த துயரத்தையும் வேதனையையும் அளிப்பதாக அதிமுக பொதுச் செயலாளர் எடப்பாடி பழனிசாமி தனது அறிக்கையில் தெரிவித்துள்ளார்.

மேலும் "ஜெயலலிதாவின் பேரன்பைப் பெற்ற அவர், 1992இல் கலைமாமணி விருது பெற்றதுடன், தமிழ்நாடு இயல் இசை நாடக மன்றத்தின் தலைவராகவும் பணியாற்றினார். தமிழ், தெலுங்கு, கன்னடம், மலையாளம் உள்ளிட்ட மொழிகளில் 400க்கும் மேற்பட்ட படங்களுக்கு இசையமைத்து, கானா பாடல்களாலும் தனக்கென தனித்த இடத்தைப் பெற்றவர்" என்றும் கூறியுள்ளார்.

அவரது மறைவால் துயருறும் மகனும் இசையமைப்பாளருமான ஸ்ரீகாந்த் தேவா, குடும்பத்தினர், உறவினர்கள், திரைத்துறையினர் மற்றும் இசைப் பிரியர்கள் அனைவருக்கும் தனது ஆழ்ந்த இரங்கலையும் அனுதாபத்தையும் தெரிவித்துக் கொள்வதாகவும் எடப்பாடி பழனிசாமி தனது இரங்கல் அறிக்கையில் குறிப்பிட்டுள்ளார்.

அதேபோல, "தேனிசைத் தென்றல்" என்று தமிழக மக்களால் அன்போடு அழைக்கப்பட்ட புகழ்பெற்ற இசையமைப்பாளர் தேவாவின் மறைவு மிகுந்த வேதனையளிப்பதாகவும், தனது பாடல்களால் தலைமுறைகளைக் கவர்ந்த தனித்துவமான கலைஞர் அவர். அவரது மறைவு தமிழ்த் திரையுலகுக்கும் இசையுலகுக்கும் பேரிழப்பு எனக் கூறிய மாணிக்கம் தாகூர், "அவரை இழந்து வாடும் குடும்பத்தினருக்கும், ரசிகர்களுக்கும் எனது ஆழ்ந்த இரங்கலைத் தெரிவித்துக் கொள்கிறேன்" எனக் கூறியுள்ளார்.