இளைஞனின் துயரத்தில் அரசி­யலும் மத­வா­த­மும்

இஸ்லாத்தை பின்பற்றும் அதே வேளை பெரும்பான்மை முஸ்லிம் இனத்தவர்களை  கொண்ட நாடுகளில் சட்டங்கள் கடுமையானதாகவே இருக்கும் என்பது புதிய விடயமல்ல.  சவூதி அரேபியா, ஐக்கிய அரபு அமீரகம் , கட்டார். பஹ்ரேன், குவைத் , ஓமன், ஏமன், ஈராக் , ஜோர்டான், சிரியா, உள்ளிட்ட நாடுகளில் மரண தண்டனை அமுலில் உள்ளது. அதுவும் இறை நிந்தனைக்கு கட்டாயம் மரண தண்டனையே தீர்ப்பு.  

 சிவராசா அனோ

கல்முனையைச் சேர்ந்த 26 வயதான சிவராசா அனோஜனுக்கு    ஷரியா சட்டத்தின் கீழ் அவரது ஆரம்ப இணையக் குற்றத் தண்டனையை மேம் படுத்துமாறு அரசுத் தரப்பு வழக்கறிஞர்கள்   மேல் முறையீடு செய்ததைத் தொடர்ந்தே  சவூதி மேல் முறையீட்டு நீதிமன்றம் மரண தண்டனையை அமுல்படுத்தியுள்ளதாகத் தெரிகின்றது.

இஸ்லாத்தையும், முஹம்மது  நபியையும் இழிவு படுத்துவதாகக் கருதப்பட்ட ஒரு முகநூல் கருத்துக்காக,  அவர்  ஜூலை 2ஆம் திகதி  அன்று கைது செய்யப்பட்டார். ஜூலை 15 அன்று, அல்-அஹ்ஸா குற்றவியல் நீதிமன்றம், சவூதி அரேபியாவின் இணையக் குற்றத் தடுப்புச் சட்டத்தின் கீழ் அவரை ஆரம்பத்தில் குற்றவாளி எனத் தீர்ப்பளித்ததோடு , ஐந்து ஆண்டுகள் சிறைத்தண்டனையும், அச்சட்டத்தின் கீழ் வழங்கப்படும் அதிகபட்ச தண்டனையான 3 மில்லியன் சவூதி றியால் அபராதமும் விதித்தமை குறிப்பிடத்தக்கது.

தண்டனையைக் குறைக்க மேல்முறையீடு செய்யப்பட்ட நிலையில், சவூதி அரசுத் தரப்பு, இக்குற்றம் இறை நிந்தனைக்கான கடுமையான ஷரியா சட்டத்தின் கீழ் வழக்குத் தொடரத் தகுதியானது என்று வாதிட்டு ஓர் இணை மேல்முறையீட்டைத் தாக்கல் செய்தது. அதைத் தொடர்ந்து ஒரு மேல்முறையீட்டு நீதிமன்றம், ஆரம்பத்தில் விதிக்கப்பட்ட சிறைத் தண்டனையை இரத்து செய்து, மரண தண்டனை விதித்ததாகக் கூறப்படுகிறது.

சவூதி அரேபிய நீதிமன்றங்களால் மரண தண்டனை விதிக்கப்பட்ட ஏழாவது இலங்கையர் அனோஜன் ஆவார். இதற்கு முன்பதாக இலங்கையர்கள் பலருக்கு அந்நாட்டில் மரண தண்டனை விதிக்கப்பட்டதாயினும் அனோஜனின் மீது சுமத்தப்பட்ட குற்றம் அவற்றில் வேறுபட்டதாகும்.

  2005-ஆம் ஆண்டு  பங்களாதேஷ் பிரஜை ஒருவரை  வழிப்பறி செய்த குற்றத்துக்காக  ரஞ்சித் டி சில்வா, விக்டர் கொரியா, சனத் புஷ்பகுமாரா மற்றும் சர்மில சங்கீத் குமார ஆகிய நான்கு இலங்கை இளைஞர்கள் 2007-ஆம் ஆண்டில் அந்நாட்டு சட்டத்தின் படி  தலை துண்டிக்கப்பட்டு மரண தண்டனைக்குள்ளானார்கள்.

ரிஷானா நஃபீக்

அனோஜனின் விவகாரம்  நான்காவது சம்பவமாகும்.   நான்கு வழக்குகளும் நான்கு வெவ்வேறு குற்றச்சாட்டுகளின் கீழ் தாக்கல் செய்யப்பட்டிருந்ததை இங்கு அவதானிக்க வேண்டும்.   நான்கு இளைஞர்கள் மீதும் கொள்ளைக் குற்றமும், ரிஷானா மீது கொலைக் குற்றமும் சுமத்தப்பட்டது.   அடையாளம் வெளியிடப்படாத 45 வயதுப் பெண்ணுக்கு பாலியல்  குற்றத்திற்காகத் தண்டனை விதிக்கப்பட்டிருந்தது.   அனோஜனுக்கு இறைநிந்தனைக் குற்றத்திற்காக மரண தண்டனை விதிக்கப்பட்டுள்ளது.

அனோஜனுக்கு விதிக்கப்பட்ட தண்டனை இன்றைய காலங்களில் சமூக ஊடகங்களைத் தவறாகக் கையாள்பவர்களுக்கு சிறந்த உதாரணமாக உள்ளது.   இச்சம்பவத்திற்கு வழிவகுத்த நிகழ்வுகளைப் பற்றி புதிதாக ஒன்றும் கூறத்தேவையில்லை. ஆனால், அதற்குப்பிறகு சமூக ஊடகங்களில் இது தமிழ் –முஸ்லிம் இனங்களுக்கிடையிலான மத ரீதியான வார்த்தைப் போராக உருவெடுத்தது.

  இழிவான பதிவுகளின் பரிமாற்றத்தை யார் தொடங்கினார்கள்  என்பதைக் கண்டறிவது கடினமாக இருந்தாலும், இறுதியில் அதன் மிக மோசமான விளைவுகளைச் சந்தித்தவர் அனோஜன் என்ற இளைஞர் தான். இப்போது இந்த இளைஞனின் விடுதலைக்காக மனிதாபிமான ரீதியில் முயற்சிகளை முன்னெடுத்திருக்கும் குழுக்கள், தனி மனிதர்கள் மற்றும் அரசியல் பிரமுகர்கள் ஒரு பக்கம் இருந்தாலும், அனோஜன் மற்றும் அவரது குடும்பத்தின் துயரங்களில் அரசியல் ஆதாயம் தேடும் முயற்சிகளில் சிலர் ஈடுபட ஆரம்பித்துள்ளார்களா என்ற சந்தேகமும் நிலவுகின்றது.


 இதேவேளை, இலங்கையிலிருந்து பணிப்பெண்களாக சவூதி அரேபியாவுக்கு சென்ற பெண்கள் அங்கு வீட்டு உரிமையாளர்களால் கொலை செய்யப்பட்ட சம்பவங்களும் அதற்கு அங்கு அவர்களுக்கு மரண தண்டனை விதிக்கப்பட்டு பின்பு இலங்கையிலுள்ள கொலையான பெண்களின் குடும்பங்கள் அவர்களுக்கு மன்னிப்பு வழங்கியமை தொடர்பிலும் தற்போது பேசப்பட்டு வருகின்றது. அவ்வாறு இடம்பெற்ற சம்பவங்கள் தொடர்பான தகவல்களும் தற்போது சமூக ஊடகங்களில் பகிரப்பட்டு வருகின்றன.

 இப்படியும் சம்பவங்கள் இடம்பெற்றுள்ளன என்பதை வெளிப்படுத்தி இலங்கை தமிழ்க் குடும்பங்கள் தமது குடும்ப உறுப்பினர்களை இழந்தும் அதற்குக் காரணமானவர்களுக்கு மன்னிப்பு வழங்கி அவர்களை தண்டனைகளிலிருந்து காப்பாற்றியது போன்று ஏன் அனோஜனுக்கு சவூதி அரசாங்கம் மன்னிப்பு வழங்கக் கூடாது என்ற கோரிக்கைகள் முன்வைக்கப்பட்டு வருகின்றன.

இவை அனைத்துமே ஏதாவதொரு வழியில் அனோஜனுக்கான தண்டனையை குறைத்தல் அல்லது முழுமையாக அவருக்கு பொது மன்னிப்பு கிடைக்கச்செய்தல் என்பவற்றை முன் வைத்து முன்னெடுக்கப்படும் முயற்சிகளாகும்.

-சிவலிங்கம் சிவகுமாரன்-