இஸ்ரேலிய சிறைகளில் பாலஸ்தீன கைதிகள் மீது: நாய்களை பயன்படுத்தித் சித்திரவதை

இஸ்ரேலிய சிறைகளில் அடைக்கப்பட்டுள்ள பாலஸ்தீன கைதிகள், தொடர்ச்சியான பாலியல் வன்புணர்வு மற்றும் சித்திரவதைகளுக்கு ஆளாக்கப்பட்டு வருவதாக அதிர்ச்சியூட்டும் புதிய தகவல்கள் வெளியாகியுள்ளன. தடுத்து வைக்கப்பட்டுள்ள முகாம்களில் காவலர்களின் கட்டளைகளுக்குப் பணியும் மோப்ப நாய்களைப் பயன்படுத்தி, இந்த கொடூரங்கள் நிகழ்த்தப்படுவதாகக் குற்றம் சாட்டப்பட்டுள்ளது.

சிறையிலிருந்து விடுவிக்கப்பட்ட முன்னாள் கைதி ஒருவர் தனது அனுபவத்தைப் பகிர்ந்துகொள்கையில், "கைதிகளின் பெயர்கள் நீக்கப்பட்டு, அவர்களுக்குப் பதிலாக எண்கள் வழங்கப்படுகின்றன. கைதிகள் தங்களை அந்த எண்களைக் கொண்டே அடையாளப்படுத்த வேண்டும் என வற்புறுத்தப்படுகிறார்கள். அவ்வாறு அழைக்க மறுக்கும் கைதிகள் மீது சிறைக் காவலர்கள் கொடூரமான தாக்குதல்களையும், பாலியல் வன்முறைகளையும் கட்டவிழ்த்து விடுகின்றனர்," என்று குறிப்பிட்டுள்ளார்.

மேலும் அவர் கூறுகையில், "கைதிகள் கைகால்கள் விலங்கிடப்பட்ட நிலையில் குப்புறப் படுக்க வைக்கப்படுகிறார்கள். அதன் பின்னர், அவர்களின் உடல்களின் மீது மோப்ப நாய்களை ஏவி நடக்க விடுகின்றனர்," எனத் தெரிவித்துள்ளார்.

காசாவைச் சேர்ந்த ஒரு தொழிலாளி, தனக்கு நேர்ந்த இதேபோன்றதொரு கொடூரமான சித்திரவதையை விவரித்துள்ளார். காவற்படை நாய்களின் உதவியுடன் அவர் பாலியல் வன்புணர்வுக்கு ஆளாக்கப்பட்டதோடு, பெண் அதிகாரிகளாலும் செயற்கைப் பொருட்களைக் கொண்டு பாலியல் ரீதியாகத் துன்புறுத்தப்பட்டுள்ளார்.

இதுகுறித்து அவர் பேசுகையில், "அவர்கள் எனது கைகளைப் பின்புறமாகக் கட்டி இரும்பு விலங்குகளைப் பூட்டினர். பின்னர் கால்களில் இருந்த விலங்குகளை அவிழ்த்துவிட்டு, மேலும் சில விலங்குகளைப் போட்டனர். அதன் பிறகு எனது ஆடைகளை முழுமையாக உரிந்தனர்," என்று கூறியுள்ளார். அந்தத் தொழிலாளி தரையில் அமுக்கிப் பிடிக்கப்பட்டு, அவரது முதுகு மற்றும் கழுத்துப் பகுதியில் பூட்ஸ் கால்களால் மிதித்துத் துன்புறுத்தப்பட்டபோது, சுற்றியிருந்த இஸ்ரேலிய வீரர்கள் அதனைக் கைதட்டி மகிழ்ந்ததோடு, காணொளியாகவும் (Video) பதிவு செய்துள்ளனர்.

2023 அக்டோபரில் நடந்த ஹமாஸ் அமைப்பின் தாக்குதல்கள் குறித்துத் தனக்கு எதுவும் தெரியாது என்று அதிகாரிகளிடம் பலமுறை கூறியபோதிலும், அவர் தொடர்ச்சியாக மிதிக்கப்பட்டு, சித்திரவதைக்கு உள்ளாக்கப்பட்டுள்ளார். "நீங்கள் எங்கள் இஸ்ரேலிய நிலப்பரப்பிற்குள் நுழைந்து ஆக்கிரமிப்பு செய்தீர்கள்; வன்புணர்வுகளில் ஈடுபட்டீர்கள்," என்று இஸ்ரேலிய காவலர்கள் தம்மைக் குற்றம் சாட்டியதாக அந்தப் பாலஸ்தீனக் கைதி தெரிவித்துள்ளார்.

கடந்த 2024-ஆம் ஆண்டில், தெற்கு இஸ்ரேலில் உள்ள தடுப்பு முகாம் ஒன்றில் பாலஸ்தீனக் கைதி ஒருவர் பாலியல் வன்புணர்வுக்கு உள்ளாக்கப்படும் காணொளி காட்சி வெளியாகிப் பெரும் அதிர்வலைகளை ஏற்படுத்தியதாக 'அல் ஜசீரா' (Al Jazeera) ஊடகம் குறிப்பிட்டிருந்தது. அந்தத் தாக்குதலுக்கு உள்ளான நபர், தீவிர சிகிச்சைக்குப் பின்னரும் நடக்க முடியாத நிலைக்குத் தள்ளப்பட்டார்.

இந்தக் காணொளி கசிந்ததைத் தொடர்ந்து, இஸ்ரேலிய பாதுகாப்புப் படையைச் (IDF) சேர்ந்த சிலர் கைது செய்யப்பட்டனர். எனினும், அமைச்சர்கள் உட்படப் பல தீவிர வலதுசாரி தேசியவாதிகள் அந்த வீரர்களுக்கு ஆதரவாக நின்றனர். இஸ்ரேலிய பிரதமர் பெஞ்சமின் நெதன்யாகுவின் கட்சியைச் சேர்ந்த நாடாளுமன்ற உறுப்பினர் ஹனோக் மில்விட்ஸ்கியிடம் (Hanoch Milwidsky), 'ஒரு கைதியின் மலக்குடலில் பொருட்களைத் திணிப்பது சட்டப்பூர்வமானதா?' என்று கேள்வி எழுப்பப்பட்டபோது, "அவர் ஒரு ஹமாஸ் போராளி (Nukhba) என்றால், அவருக்கு எதைச் செய்வதும் சட்டப்பூர்வமானதுதான்! எதையும் செய்யலாம்!" எனப் பதிலளித்திருந்தார்.

இதேபோல், இஸ்ரேலின் தேசிய பாதுகாப்பு அமைச்சர் இதாமர் பென் கிவீரும் (Itamar Ben Gvir) அந்த வீரர்களுக்குத் தனது ஆதரவைத் தெரிவித்திருந்தார். 'தி டைம்ஸ் ஆஃப் இஸ்ரேல்' (Times of Israel) அறிக்கையின்படி, "இஸ்ரேல் சிறைச்சாலைகளாக இருந்தாலும் சரி, பாதுகாப்புப் படையாக இருந்தாலும் சரி, நமது வீரர்களுக்கு முழுமையான ஆதரவு வழங்கப்பட வேண்டும்," என்று அவர் குறிப்பிட்டிருந்தார்.