ஏமனில் ஹூதி கிளர்ச்சியாளர்கள் தாக்குதலில் குறைந்தது 58 வீரர்கள் உயிரிழப்பு

ஏமனில் செயல்படும் ஹூதி கிளர்ச்சியாளர்கள் வியாழக்கிழமை அரசு படைகளின் மீது தாக்குதல் நடத்தினர். 

இதில் குறைந்தது 58 வீரர்கள் உயிரிழந்தனர். அதே நேரத்தில், அவர்கள் சவுதி அரேபியாவிலும் சில இடங்களைத் தாக்கினர். இதையடுத்து சவுதி ஆதரவு பெற்ற தரப்புகள் பதிலடி கொடுப்பதாக எச்சரித்துள்ளன.

ஈரானின் ஆதரவு பெற்ற ஹூதிகள், சவுதி அரேபியாவின் உதவியுடன் ஏமன் அரசு தனது படைகளை சமீபத்தில் அதிகரித்ததற்குப் பதிலாகவே இந்தத் தாக்குதலை நடத்தியதாக தெரிவித்துள்ளனர்.

ஒரு ராணுவ அதிகாரி கூறுகையில், இந்தத் தாக்குதலில் 58 பேர் உயிரிழந்ததுடன், பலர் காயமடைந்துள்ளனர். 2022-ஆம் ஆண்டு போர் நிறுத்த ஒப்பந்தம் ஏற்பட்ட பிறகு நடந்த மிகக் கடுமையான தாக்குதல் இதுவாகும் என்றும் அவர் கூறினார்.

இந்தத் தாக்குதல்கள், மத்திய ஏமனில் உள்ள மாரிப் மாகாணத்தில் இருக்கும் ஒரு ராணுவ முகாமையும், சவுதி அரேபியா எல்லைக்கு அருகிலுள்ள ஹத்ரமவுத் மாகாணத்தில் இருக்கும் மற்ற ராணுவ முகாம்களையும் குறிவைத்து நடத்தப்பட்டன. இந்தத் தாக்குதலுக்கு ஹூதிகள் பொறுப்பேற்றுள்ளனர்.

சர்வதேச அங்கீகாரம் பெற்ற ஏமன் அரசின் பாதுகாப்பு அமைச்சகம், "இந்தத் தாக்குதலுக்கு சரியான நேரத்திலும் சரியான இடத்திலும் பதிலடி கொடுக்கப்படும்" என்று தெரிவித்துள்ளது.

இதற்கிடையில், சவுதி அரேபியா தலைமையிலான கூட்டணி, ஹூதிகள் நஜ்ரான் எல்லைப் பகுதியில் பொதுமக்கள் வசிக்கும் இடங்களைத் தாக்கியதாக குற்றம்சாட்டியுள்ளது.

இந்தத் தாக்குதலில் 4 வயது குழந்தை உட்பட 11 பேர் காயமடைந்தனர். காயமடைந்தவர்களில் 2 எகிப்தியர்கள், 1 ஏமனியர் மற்றும் 1 பாகிஸ்தான் நாட்டவரும் உள்ளனர். 

போர் நிறுத்த ஒப்பந்தம் முடிந்த பிறகு சவுதி அரேபியாவில் ஏற்பட்ட மிகப் பெரிய தாக்குதல் இதுவாகக் கூறப்படுகிறது.

பொதுமக்களை பாதுகாக்க தேவையான அனைத்து நடவடிக்கைகளும் எடுக்கப்படும் என்று சவுதி கூட்டணியின் செய்தித் தொடர்பாளர் ஜெனரல் துர்கி அல்-மால்கி தெரிவித்துள்ளார்.

ஏமனில் 2014-ஆம் ஆண்டு தொடங்கிய உள்நாட்டுப் போரில் இலட்சக்கணக்கான மக்கள் உயிரிழந்துள்ளனர். இதனால் அந்த நாடு கடுமையான மனிதாபிமான நெருக்கடியை எதிர்கொண்டுள்ளது.

2014-ல் ஹூதிகள் வடக்கு ஏமனில் உள்ள சஅதா பகுதியில் இருந்து தாக்குதலைத் தொடங்கி, தலைநகர் சனாவையும் சேர்த்து நாட்டின் பல பகுதிகளை தங்கள் கட்டுப்பாட்டுக்குள் கொண்டு வந்தனர்.

இதையடுத்து, பலவீனமடைந்த ஏமன் அரசுக்கு 2015-ஆம் ஆண்டு சவுதி அரேபியா தலைமையிலான ராணுவ கூட்டணி உதவியது. 

2022 முதல் ஐ.நா. நடத்திய போர் நிறுத்தம் அமலில் இருந்தாலும், கடந்த மாதம் முதல் ஹூதிகளுக்கும் சவுதி அரேபியாவுக்கும் இடையே மீண்டும் மோதல்கள் தொடங்கியுள்ளன. 

இந்தப் பதற்றம் அமெரிக்கா மற்றும் ஈரான் இடையேயான மோதலின் பின்னணியிலும் அதிகரித்துள்ளது.