ஒற்றுக் கொடுத்தவரின் வாயை அறுத்த விபரீதம்

தமக்கு எதிராகக் காவல்துறையினருக்கு ஒற்றுக் கொடுத்ததாகக் கூறி, கறுவாத் தொழிலாளி ஒருவரின் வாயைத் கூர்மையான ஆயுதத்தால் அறுத்து காயப்படுத்திய சந்தேகநபர் ஒருவரை, திங்கட்கிழமை (15) பிற்பகல் கரந்தெனிய காவல்துறையினர் கைது செய்துள்ளனர்.

இந்தச் சம்பவம் கரந்தெனிய, எகொடவெல பிரதான வீதியில் இடம்பெற்றுள்ளதாக காவல்துறையினர் தெரிவிக்கின்றனர். குறித்த கறுவாத் தொழிலாளி, போதைப்பொருள் தொடர்பான தகவல்களைத் தமக்கு வழங்கியதாலேயே ஆத்திரமடைந்த சந்தேகநபர், கத்தியால் அவரது வாயை அறுத்துள்ளார்.

போதைப்பொருள் குற்றச்சாட்டு ஒன்றிற்காகக் காவல்துறையினரால் கைது செய்யப்பட்டுச் சிறை சென்றதற்கு, குறித்த தொழிலாளியே காரணம் என சந்தேகநபர் ஆத்திரத்துடன் இருந்துள்ளார் என்று விசாரணைகளில் தெரியவந்துள்ளது.

சந்தேகநபர் போதைப்பொருள் வைத்திருந்த குற்றச்சாட்டின் பேரில் விளக்கமறியலில் வைக்கப்பட்டு, அண்மையில் பிணையில் விடுதலையாகி கிராமத்திற்குத் திரும்பியிருந்த நிலையிலேயே இந்தத் தாக்குதலை மேற்கொண்டுள்ளார் என காவல்துறையினர் மேலும் தெரிவித்தனர்.