கபில சந்திரசேனவின் மர்ம மரணம்: நள்ளிரவில் சமையலறையில் நடந்தது என்ன?

ஸ்ரீலங்கன் எயார்லைன்ஸ் நிறுவனத்தின் முன்னாள் பிரதம நிறைவேற்று அதிகாரி (CEO) கபில சந்திரசேன கொள்ளுப்பிட்டியவில் உள்ள வீட்டில் மர்மமான முறையில் உயிரிழந்த சம்பவம் தொடர்பிலான பொலிஸ் விசாரணைகள் தீவிரமடைந்துள்ளன.

எயார்பஸ் விமானங்களைக் கொள்வனவு செய்யும் போது 2 மில்லியன் அமெரிக்க டொலர்களை இலஞ்சமாகப் பெற்றார் என்ற குற்றச்சாட்டின் கீழ் இவருக்கு எதிராக விசாரணைகள் இடம்பெற்று வந்த நிலையில், கடந்த 8ஆம் திகதி இவர் சடலமாக மீட்கப்பட்டிருந்தார்.

நீதிமன்றில் விசாரணை

கபில சந்திரசேனவின் மரணம் தொடர்பான நீதவான் விசாரணை, கொழும்பு கோட்டை நீதவான் பசன் அமரசேன முன்னிலையில் நேற்று (19) இடம்பெற்றது. இதன்போது, முன்னாள் கிரிக்கெட் வீரர் அரவிந்த டி சில்வாவின் வீட்டில் பணிபுரியும் பணியாளர் 10 வது சாட்சியாக நீதிமன்றத்தில் ஆஜராகி பரபரப்பு வாக்குமூலம் அளித்துள்ளார்.

பணியாளர் நீதிமன்றில் அளித்த சாட்சியம் இதோ

• மே 6ஆம் திகதி: "அன்று மாலை 3 மணியளவில் கபில சேர் (உயிரிழந்தவர்) எங்கள் வீட்டிற்கு வந்தார். அவருக்கு உணவைச் சூடாக்கிக் கொடுத்தோம். பின்னர் மாலை 5 மணியளவில் அவர் கிளம்பிச் சென்றார்."

• மே 7ஆம் திகதி (மரணத்திற்கு முந்தைய நாள்): "மதியம் 12.30 மணியளவில் அவர் மீண்டும் தனியாக எங்கள் வீட்டிற்கு வந்தார். யாருடனும் பேசாமல் முதல் மாடியில் உள்ள அறைக்குச் சென்றார். இரவு உணவை நாங்கள் கொண்டு சென்றபோதும் அவர் சாப்பிட மறுத்துவிட்டார்."

• நள்ளிரவில் நடந்த விசித்திர சம்பவம்: "இரவு 12:10 மணிக்கு எங்கள் முதலாளியிடம் (அரவிந்த டி சில்வா) பேசிய பிறகு அவர் உறங்கச் சென்றார். நான் 12:15 மணிக்கு அவருக்குத் தேநீர் கொடுத்துவிட்டு தூங்கச் சென்றேன். பின்னர் அதிகாலை 1:30 மணியளவில் கழிவறைக்குச் செல்வதற்காக நான் எழுந்தபோது, சமையலறையில் விளக்கு எரிவதைக் கண்டேன்."

• கையில் இருந்த பிளாஸ்டிக் போத்தல்: "நான் ஜன்னல் வழியாகப் பார்த்தபோது, கபில சேர் கையில் ஒரு வெள்ளை நிற பிளாஸ்டிக் போத்தலை வைத்தபடி நின்று கொண்டிருந்தார். நான் கதவைத் திறந்து எதுவும் வேண்டுமா எனக் கேட்டதற்கு, தண்ணீர் எடுக்க வந்ததாகக் கூறினார். அவரது அறையிலேயே தண்ணீர் இருப்பதாக நான் கூறியதும், அவர் பரவாயில்லை எனக் கூறிவிட்டு மீண்டும் மாடி அறைக்குச் சென்றுவிட்டார்."

பொலிஸாரின் குறுக்கு விசாரணை: இதன்போது, 'கபில சந்திரசேன சமையலறைக்கு வந்து வீட்டின் பிரதான கதவைத் திறந்ததை நீங்கள் பார்த்தீர்களா?' என பொலிஸார் கேள்வி எழுப்பினர். அதற்குப் பதிலளித்த சாட்சி, "இல்லை, வீட்டின் கதவுகளை நாங்கள் மட்டும்தான் திறப்போம், வேறு யாரும் திறப்பதில்லை. அந்த நள்ளிரவு நேரத்தில் வேறு யாரும் எழுந்திருந்ததையும் நான் பார்க்கவில்லை" எனத் தெரிவித்தார்.

கபில சந்திரசேனவின் இந்த மர்ம மரணம் கொழும்பு அரசியல் மற்றும் வர்த்தக வட்டாரங்களில் பெரும் அதிர்ச்சியை ஏற்படுத்தியுள்ள நிலையில், மரண விசாரணை தொடர்ந்து நடைபெற்று வருகின்றது.