காபி மீட்டுக்கு ரூ.499, மூவி டேட்டுக்கு ரூ.1,249': இளம் பெண்களை குறிவைக்கும் வாடகை காதலன் மோசடி

'வாடகைக் காதலன் சேவை' தொடர்பான விளம்பரங்கள் குறித்து ஹைதராபாத் காவல்துறை எச்சரிக்கை விடுத்துள்ளது


"உங்களுக்கு ஒரு காதலன் வேண்டுமா? நாங்கள் ஒருவரை வாடகைக்கு ஏற்பாடு செய்து தருகிறோம். அவர் செய்ய வேண்டிய வேலை, எவ்வளவு நேரத்தை உங்களுடன் செலவிட வேண்டும் என்பவனவற்றைப் பொறுத்து செலவிடும் நேரத்தைப் பொறுத்து கட்டணம் நிர்ணயிக்கப்படும்" என்ற விளம்பரங்கள் தற்போது சமூக ஊடகங்களில் பரவி வருகின்றன.

இந்த விளம்பரங்கள் பெண்களை ஏமாற்றுவதற்காக உருவாக்கப்பட்டவை என்று ஹைதராபாத் போலீசார் கூறுகின்றனர்.

"குறிப்பாக பெண்கள் மற்றும் இளம் பெண்களை இலக்காகக் கொண்டு இணைய மோசடியில் ஈடுபடுவோர் உருவாக்கியுள்ள புதிய டேட்டிங் வலை" என்று ஹைதராபாத் காவல் ஆணையர் வி.சி. சஜ்ஜனார் எச்சரித்தார்.

"நீங்கள் தனிமையால் அவதிப்படுகிறீர்களா? உங்களுடன் காபி குடிக்கவோ அல்லது திரைப்படத்துக்குச் செல்லவோ அழகான இளைஞர் வேண்டுமா? அதுவும் 50% தள்ளுபடியில்" என்ற வரிகளுடன், சமூக ஊடகங்களில் தோன்றும் வண்ணமயமான விளம்பர போஸ்டர்களின் பின்னணியில் இணைய மோசடி இருப்பதாக அவர் தெரிவித்தார்.

ஆனால், ஹைதராபாத்தை சேர்ந்த உளவியல் நிபுணர் அனிதா ஆரே, இளம் பருவத்தினரின் ஈர்ப்புகளையும் உணர்வுகளையும் பயன்படுத்தி சிலர் மோசடியில் ஈடுபடுவதாக பிபிசியிடம் தெரிவித்தார்.

சமூக ஊடக கணக்குகளில் இத்தகைய விளம்பரங்கள் அதிகரித்து வருவதைத் தங்கள் கண்காணிப்பில் கண்டறிந்துள்ளதாக சஜ்ஜனார் தெரிவித்தார்.

இது தொடர்பாக தாங்கள் கண்ட சில விளம்பரங்களின் விவரங்களை சஜ்ஜனார் தனது எக்ஸ் பக்கத்தில் பகிர்ந்திருந்தார். இந்த விளம்பரங்களைப் பார்த்தால், இரண்டு முக்கிய அம்சங்களை கவனிக்க முடிகிறது. அவை,


ஒவ்வொரு சேவைக்கும் தனித்தனியாக கட்டணம் நிர்ணயிக்கப்பட்டு இருப்பதாக அந்த விளம்பரங்களில் குறிப்பிடப்பட்டிருப்பதாக போலீசார் தெரிவித்தனர்.


இதுகுறித்துப் பேசிய ஹைதராபாத் காவல் ஆணையர் வி.சி. சஜ்ஜனார், "ஒரு மணிநேரம் காபி அருந்தி உரையாடுவதற்கு ரூ.499, திரைப்பட டேட்டிங்குக்கு ரூ.1,249, உடன் சேர்ந்து ஷாப்பிங் செல்வதற்கு ரூ.1,499, மேலும் நிகழ்ச்சிகள் அல்லது திருமணங்களுக்குத் துணையாக வர ரூ.1,999 என்ற அளவுகளில் கட்டணம் வசூலிக்கப்படுவதாக விளம்பரங்களில் கூறப்பட்டுள்ளதாக" தெரிவித்தார்.


காதலனை அனுப்பும் சேவையைக் கோரும் பெண்களின் விவரங்கள் யாருக்கும் தெரியாமல் ரகசியமாகப் பாதுகாக்கப்படும் என்று கூறி, நேரடியாக குறுஞ்செய்தி அனுப்புமாறும் இந்த விளம்பரங்கள் வலியுறுத்துகின்றன.

இந்த விளம்பரங்களில் காட்டப்படும் இளைஞர்கள் உண்மையானவர்கள் அல்ல என்றும், அவற்றில் பயன்படுத்தப்பட்டுள்ள புகைப்படங்கள் செயற்கை நுண்ணறிவு மூலம் உருவாக்கப்பட்டவை போலத் தோன்றுவதாகவும் விசாரணையில் தெரிய வந்ததாக சஜ்ஜனார் கூறினார்.