கைதான அன்பில் மகேஷூக்கு விளக்கமறியல்

அன்பில் மகேஷ் பொய்யாமொழியை எதிர்வரும் 6ம் திகதி வரை விளக்கமறியலில் வைக்க நீதிமன்றம் உத்தரவிட்டுள்ளது.

கடந்த திமுக ஆட்சியில் பள்ளிக்கல்வித்துறை அமைச்சராக இருந்தவர் அன்பில் மகேஷ் பொய்யாமொழி.

இதனிடையே, கடந்த திமுக ஆட்சியில் தமிழகத்தில் உள்ள ஆயிரத்துக்கும் மேற்பட்ட தனியார் பள்ளிகளுக்கு நிரந்தர அங்கீகாரம், பள்ளிகள் தரம் உயர்த்துதல் மற்றும் இதர அரசு அனுமதிகளைப் பெற்றுத் தருவதாக கூறி ரூ. 100 கோடிக்கும் மேல் முறைகேடாக பணம் வசூலிக்கப்பட்டதாக குற்றச்சாட்டு எழுந்தது.

இந்த ஊழல் குற்றச்சாட்டு முறைப்பாடு தொடர்பாக முன்னாள் பள்ளிக்கல்வித்துறை அமைச்சர் அன்பில் மகேஷ் பொய்யாமொழிக்கு எதிராக சென்னை மத்திய குற்றப்பிரிவு பொலிஸார் வழக்குப்பதிவு செய்தனர்.

இந்த வழக்கு தொடர்பாக கடந்த செப்டம்பர் 16-ஆம் திகதி அன்பில் மகேசுக்கு சொந்தமான இடங்களில் மத்திய குற்றப்பிரிவு பொலிஸார் அதிரடி சோதனை நடத்தினர்.

இதனிடையே, ரூ. 100 கோடி ஊழல் வழக்கில் முன்பிணை கோரி அன்பில் மகேஷ் தாக்கல் செய்த மனுவை சென்னை ஐகோர்ட்டு நேற்று தள்ளுபடி செய்தது.

முன்பிணை மனு தள்ளுபடி செய்யப்பட்ட நிலையில் முன்னாள் அமைச்சர் அன்பில் மகேசை சென்னை அமைந்தகரையில் உள்ள அடுக்குமாடி குடியிருப்பில் வைத்து பொலிஸார் நேற்று கைது செய்தனர்.

 பின்னர், அவர் சென்னை பொலிஸ் கமிஷனர் அலுவலகத்திற்கு அழைத்து வரப்பட்டார்.

அங்கு அவரிடம் விசாரணை நடத்தப்பட்டது. இதனை தொடர்ந்து மருத்துவ பரிசோதனைக்காக அன்பில் மகேஷ் சென்னை ராஜீவ் காந்தி அரசு மருத்துவமனைக்கு அழைத்து செல்லப்பட்டார். அங்கு அவருக்கு மருத்துவ பரிசோதனை மேற்கொள்ளப்பட்டது.

இதையடுத்து, மருத்துவ பரிசோதனைக்குப்பின் முன்னாள் அமைச்சர் அன்பில் மகேஷ் பொய்யாமொழி ஊழல் தடுப்பு விசேட நீதிமன்றத்தில் ஆஜர்படுத்தப்பட்டார்.

விசேட நீதிமன்ற நீதிபதி எல். எஸ். சத்யமூர்த்தி முன் ஆஜர்படுத்தப்பட்ட அன்பில் மகேசை விசாரணைக்கு எடுக்க அனுமதிக்குமாறு பொலிஸார் தரப்பில் வாதிடப்பட்டது.

இந்நிலையில், இரு தரப்பு வாதங்களையும் கேட்ட நீதிபதி, கைது செய்யப்பட்ட முன்னாள் அமைச்சர் அன்பில் மகேஷ் பொய்யாமொழியை பொலிஸார் நீதிமன்ற காவலில் எடுத்து விசாரிக்க அனுமதி அளித்தார்.

அதன்படி, அன்பில் மகேஷ் பொய்யாமொழியை எதிர்வரும் 6ம் திகதி வரை (10 நாட்கள்) விளக்கமறியலில் வைக்க நீதிபதி உத்தரவிட்டார்.