சர்க்கரை நோயாளிகள் ஆரஞ்சு சாப்பிடலாமா? மருத்துவர்கள் கூறும் முக்கிய தகவல்

சர்க்கரை நோயாளிகள் ஆரஞ்சு பழத்தை அளவோடு சாப்பிடலாம் என மருத்துவ நிபுணர்கள் தெரிவிக்கின்றனர். நார்ச்சத்து, வைட்டமின் சி மற்றும் ஆன்டிஆக்ஸிடன்ட்கள் நிறைந்துள்ள ஆரஞ்சு பழம், உடல்நலத்திற்கு பல நன்மைகளை வழங்கக்கூடிய ஆரோக்கியமான உணவாக கருதப்படுகிறது. குறிப்பாக இதில் உள்ள நார்ச்சத்து, செரிமானத்தை மெதுவாக்கி இரத்த சர்க்கரை அளவை கட்டுப்படுத்த உதவுகிறது. மேலும், ஆரஞ்சு பழத்திற்கு குறைந்த கிளைசெமிக் குறியீடு (GI) இருப்பதால், இரத்த சர்க்கரை அளவு திடீரென அதிகரிக்கும் அபாயம் குறைகிறது. இதில் உள்ள வைட்டமின் சி மற்றும் ஆன்டிஆக்ஸிடன்ட்கள் நோய் எதிர்ப்பு சக்தியை அதிகரிப்பதுடன் இதய ஆரோக்கியத்தையும் மேம்படுத்த உதவுகின்றன. அதேபோல், பொட்டாசியம் நிறைந்துள்ளதால் இரத்த அழுத்தத்தை கட்டுப்படுத்தவும் உதவுகிறது. சர்க்கரை நோயாளிகள் ஒரு நாளுக்கு 1 முதல் 2 ஆரஞ்சு பழங்கள் வரை சாப்பிடலாம் என்றும், பழச்சாறாக குடிப்பதை விட முழு பழமாக சாப்பிடுவது சிறந்தது என்றும் நிபுணர்கள் கூறுகின்றனர். எனினும், சிலருக்கு ஆரஞ்சு பழம் இரத்த சர்க்கரை அளவில் மாற்றத்தை ஏற்படுத்தக்கூடும் என்பதால், தங்களின் உடல் நிலையை கவனமாக கண்காணிக்க வேண்டும். குறிப்பாக மருந்துகள் உட்கொள்பவர்கள், ஆரஞ்சு பழத்தை உணவில் சேர்ப்பதற்கு முன் மருத்துவரின் ஆலோசனையை பெறுவது நல்லது.