சவுதி மீது ஹவுத்திகள் மீண்டும் தாக்குதல்: ஹவுத்திகளின் நடவடிக்கைகளில் ஈரானுக்கு தொடர்பில்லை என தெஹ்ரான் திட்டவட்டம்

ரியாத்: ஈரான் ஆதரவு பெற்ற யேமன் நாட்டின் ஹவுத்தி கிளர்ச்சியாளர்கள், சவுதி அரேபியாவில் உள்ள இராணுவ இலக்குகளை மீண்டும் தாக்கியுள்ளனர். இதற்கிடையே, ஹவுத்திகளின் நடவடிக்கைகளில் தங்களுக்கு எந்தத் தொடர்பும் இல்லை என்று ஈரான் திட்டவட்டமாக மறுத்துள்ளது.

மத்திய கிழக்கில் ஏற்கனவே நீடித்து வரும் போருக்கு மத்தியில், ஹவுத்திகளுக்கும் சவுதி அரேபியாவுக்கும் இடையிலான மோதல் தற்போது புதிய பரிமாணத்தை எட்டியுள்ளது.

யேமன் அரசுப் படைகளுக்கும் அவற்றுக்கு ஆதரவளிக்கும் சவுதி அரேபியப் படைகளுக்கும் எதிராக கடந்த சில நாள்களாக ஹவுத்திகள் மேற்கொண்ட அதிரடி தாக்குதல்கள் அவர்களுக்கு குறிப்பிடத்தக்க வெற்றிகளைத் தேடித்தந்துள்ளன. 

குறிப்பாக, ஐரோப்பாவையும் ஆசியாவையும் இணைக்கும் முக்கிய கடல்வழியான பாப் அல்-மண்டெப் நீரிணை பகுதியில் தங்களது ஆதிக்கத்தை ஹவுத்திகள் மேலும் அதிகரித்துள்ளனர்.

மேலும், உலகின் மிகப்பெரிய கச்சா எண்ணெய் ஏற்றுமதி நாடான சவுதி அரேபியாவின் எண்ணெய் உள்கட்டமைப்புகளையும் ஹவுத்திகள் குறிவைத்துள்ளனர். இதன் தாக்கமாக சர்வதேச சந்தையில் கச்சா எண்ணெயின் விலை 100 அமெரிக்க டாலரைத் தாண்டியது.

8 வீரர்கள் உயிரிழப்பு

மேற்கு யேமனில் திங்கள்கிழமை ஹவுத்திகள் நடத்திய தாக்குதலில் அரசுப் படையைச் சேர்ந்த 8 வீரர்கள் உயிரிழந்ததாக இராணுவ வட்டாரங்கள் தெரிவித்தன.

இதனிடையே, தெற்கு சவுதி அரேபியாவில் உள்ள கமீஸ் முஷைத் நகரின் கிங் காலித் விமானத் தளத்தை குறிவைத்து, டஜன் கணக்கான பாலிஸ்டிக் ஏவுகணைகள் மற்றும் ட்ரோன்கள் மூலம் மிகப்பெரிய தாக்குதலை நடத்தியதாக ஹவுத்திகள் தெரிவித்தனர்.

இதற்குப் பதிலடியாக சவுதி அரேபியப் படைகள் சுமார் 50 வான்வழித் தாக்குதல்களை நடத்தியதாகவும் ஹவுத்திகள் குற்றம்சாட்டியுள்ளனர்.

சவுதி அரேபியாவின் நடைமுறை ஆட்சியாளரான பட்டத்து இளவரசர் முகமது பின் சல்மான், திங்கள்கிழமை ஜித்தாவில் அமெரிக்க மத்திய கட்டளைப் படையின் தளபதி அட்மிரல் பிராட் கூப்பரைச் சந்தித்தார். பிராந்தியத்தின் சமீபத்திய நிலவரங்கள் குறித்து இருவரும் ஆலோசித்ததாக சவுதி அரசு தெரிவித்துள்ளது.

முகமது பின் சல்மான் செவ்வாய்க்கிழமை எகிப்துக்குச் சென்று அந்நாட்டு அதிபர் அப்தெல் ஃபத்தாஹ் அல்-சிசியைச் சந்திக்க உள்ளார். இந்தச் சந்திப்பின்போது பிராந்திய பாதுகாப்பு மற்றும் தற்போதைய மோதல்கள் குறித்து ஆலோசிக்கப்பட உள்ளன.

ஈரான் திட்டவட்ட மறுப்பு

இந்த பதற்றமான சூழலில், ஈரானுடன் நடைபெறவிருந்த முக்கியமான சந்திப்பை சவுதி அரேபியா ஒத்திவைக்கக் கோரியுள்ளது. வளைகுடா நாடுகளைச் சேர்ந்த பிரதிநிதிகள் பங்கேற்க இருந்த இந்தக் கூட்டம் ஓமானில் நடைபெறுவதாக இருந்தது.

ஆனால், இதற்கு பதிலளித்த ஈரான் வெளியுறவு அமைச்சக செய்தித் தொடர்பாளர் இஸ்மாயில் பகாயி, யேமன் விவகாரத்தை காரணம் காட்டி கூட்டத்தை ஒத்திவைப்பது “பொய்யான சாக்குப்போக்கு” என்று கூறினார்.

“யேமனின் உள்நாட்டு விவகாரங்களில் ஈரான் தலையிடுவதில்லை. ஹவுத்திகள் சுதந்திரமாகச் செயல்படும் தரப்பினர். அவர்கள் தங்களது சொந்த நலன்களின் அடிப்படையிலேயே முடிவுகளை எடுக்கின்றனர்,” என்றும் அவர் தெரிவித்தார்.

இந்தக் கூட்டத்தில், உலகளாவிய எண்ணெய் வர்த்தகத்திற்கு மிக முக்கியமான ஹோர்முஸ் நீரிணையின் எதிர்காலம் குறித்தும் ஆலோசிக்க திட்டமிடப்பட்டிருந்தது.

சவுதிக்கு அதிகரிக்கும் அழுத்தம்

ஹவுத்திகளின் தாக்குதல்கள் மட்டுமின்றி, ஹோர்முஸ் மற்றும் பாப் அல்-மண்டெப் என சவுதி அரேபியாவின் இருபுறங்களிலும் உள்ள முக்கிய கடல்வழிகள் அச்சுறுத்தலுக்கு உள்ளாகியிருப்பது அந்நாட்டுக்கு பெரும் சிக்கலை ஏற்படுத்தியுள்ளது.

ஹோர்முஸ் நீரிணை வழியாக எண்ணெய் ஏற்றுமதி பாதிக்கப்பட்டால் அதற்கு மாற்று வழியாகப் பயன்படுத்தப்படும் சவுதியின் கிழக்கு–மேற்கு எண்ணெய்க் குழாயும் தற்போது செயல்படவில்லை. ஈராக்கிலிருந்து நடத்தப்பட்ட ட்ரோன் தாக்குதல்களே இதற்குக் காரணம் என்று சவுதி அரேபியா தெரிவித்துள்ளது.

“ஹோர்முஸ் நீரிணை பாதிக்கப்பட்டுள்ள நிலையில், பாப் அல்-மண்டெப் நீரிணையும் தொடர்ந்து ஆபத்துக்குள்ளாகி வருகிறது. இதனால் வளைகுடா நாடுகள் எதிர்கொள்ளும் நெருக்கடி மேலும் மோசமடைந்துள்ளது. பதற்றத்தைத் தணிப்பது பொருளாதார ரீதியாக இப்போது அவசியமாகியுள்ளது,” என்று International Crisis Group ஆய்வு அமைப்பைச் சேர்ந்த அலி வாஸ் தெரிவித்துள்ளார்.

86,000 பேர் இடம்பெயர்வு

பல ஆண்டுகளாக ஒப்பீட்டளவில் அமைதியாக இருந்த யேமன், பிப்ரவரி இறுதியில் அமெரிக்கா–இஸ்ரேல் மற்றும் ஈரான் இடையே உருவான பிராந்திய மோதலைத் தொடர்ந்து மீண்டும் போரின் முக்கியக் களமாக மாறியுள்ளது.

மேற்கு யேமனில் கடந்த சில வாரங்களாக நடைபெற்றுவரும் மோதல்களில் நூற்றுக்கணக்கானோர் உயிரிழந்துள்ளனர். சுமார் 86,000 பேர் தங்கள் வீடுகளை விட்டு இடம்பெயர்ந்துள்ளதாக சர்வதேச இடம்பெயர்வு அமைப்பு (IOM) தெரிவித்துள்ளது.

இதற்கிடையே, அமெரிக்கா மற்றும் ஈரான் இடையிலான பேச்சுவார்த்தைகள் முட்டுக்கட்டையைச் சந்தித்துள்ள போதிலும், மீண்டும் பேச்சுவார்த்தை நடத்தத் தயாராக இருப்பதாக அமெரிக்க அதிபர் டொனால்ட் டிரம்ப் தெரிவித்துள்ளார்.

“ஈரான் விரைவாகவும் மிகுந்த அவசரத்துடனும் ஓர் உடன்பாட்டை எட்ட விரும்புகிறது. அதற்கு அமெரிக்கா பதிலளிக்க வேண்டுமா என்பதை நான் முடிவு செய்வேன். இருப்பினும், பேச்சுவார்த்தைக்கான வாய்ப்பை நாங்கள் திறந்தே வைத்திருக்கிறோம்,” என்று டிரம்ப் தனது சமூக வலைதளப் பதிவில் தெரிவித்துள்ளார்.