"சீனிவாசன் இருந்திருந்தால் தோனி இப்படி செய்திருப்பாரா?" சிஎஸ்கே உடைமாற்றும் அறையில் தோனி இல்லாதது குறித்து அஸ்வின் கேள்வி!

ஐபிஎல் 2026 (IPL 2026) தொடரில் சென்னை சூப்பர் கிங்ஸ் அணியின் டிரஸிங் ரூம்மில் (உடைமாற்றும் அறை) எம்.எஸ். தோனி இல்லாதது குறித்து இந்திய அணியின் நட்சத்திர சுழற்பந்து வீச்சாளர் ரவிச்சந்திரன் அஸ்வின் கேள்வியெழுப்பியுள்ளார். அத்துடன் சிஎஸ்கே அணியின் முக்கிய நிர்வாகியான என். சீனிவாசனின் செல்வாக்கு குறித்தும் அவர் சில கருத்துக்களைப் பகிர்ந்துள்ளார்.

காயமும் தோனியின் விலகலும்: ஐபிஎல் 2026 சீசனுக்கு முன்னதாக, தோனிக்கு காலில் தசைநார் காயம் ஏற்பட்டது. அவர் குணமடைவதில் ஏற்பட்ட தாமதம் காரணமாக, சிஎஸ்கே அணியின் முதல் பாதி ஆட்டங்களில் அவரால் களமிறங்க முடியாமல் போனது. எனினும், அவர் வெளியூர் போட்டிகளுக்குச் செல்லவில்லை என்பதுடன், சொந்த மைதானப் போட்டிகளிலும் பங்கேற்கவில்லை. தன்மீது எந்தவித கவனமும் திசைதிரும்ப வேண்டாம் என்று தோனி விரும்பியதாக அணி நிர்வாகம் தரப்பில் விளக்கமளிக்கப்பட்டிருந்தது.

சென்னையில் சன்ரைசர்ஸ் ஹைதராபாத் அணிக்கு எதிரானப் போட்டியில் தோனி களமிறங்குவார் என எதிர்பார்க்கப்பட்ட போதும், அவரது பெருவிரலில் ஏற்பட்ட காயம் காரணமாக கடைசி நிமிடத்தில் திட்டங்கள் மாறின. இந்தப் போட்டியில் தோனி மைதானத்தில் இருந்து, அணியுடன் புகைப்படம் எடுத்துக்கொண்டார். ஆட்ட நேர முடிவில் மைதானத்தில் வலம் வந்தாரே தவிர, மற்றபடி அனைவரிடமிருந்தும் விலகியே இருந்தார்.

அஸ்வின் தனது யூடியூப் சேனலில் வெளியிட்ட கருத்துக்கள்

"எம்.எஸ். தோனி இத்தனை ஆண்டுகளாக இந்தப் பகுதியின் ஒரு முக்கிய அங்கம். ஒவ்வொரு போட்டியிலும் உடைமாற்றும் அறையில் அவர் இருந்தார். அவர் விளையாடவில்லை என்றாலும்கூட, மைதானத்துக்கு வந்திருக்கலாம். அவர் ஏன் ஒரு முறைகூட மைதானத்துக்கு வரவில்லை என்று என் மனம் கேள்வி கேட்கிறது. நெட் பயிற்சியில் நாம் அவரைப் பார்த்தோம்.

தான் அங்கே போனால் அனைவரின் கவனமும் தன் மீது விழும், அது அணிக்கு இடையூறாக இருக்கும் என்று அவர் நினைத்திருக்கலாம். ஆனால், அப்படி செய்வதால் ரசிகர்களுக்கு கிடைக்க வேண்டிய அந்த அனுபவத்தை நாம் தடை செய்கிறோம். இது விளையாட்டின் ஒரு பகுதி."

என். சீனிவாசன் குறித்த கேள்வி

சமீபத்திய கொண்டாட்டத்தின்போதும்கூட தோனி எந்த உணர்ச்சியுமின்றி அமர்ந்திருந்ததாக அஷ்வின் சுட்டிக்காட்டியுள்ளார்.

"அவரது முகத்தில் சிரிப்போ, எந்த உணர்ச்சியோ இல்லை. அவரது குடும்பத்தினர் சாக்‌ஷி அங்கே இருந்தார்; அவர் சிறிது உணர்ச்சிவசப்பட்டதாக நான் நினைக்கிறேன். எனக்கு கவலை ஏற்பட்டது. என் மனதில் இன்றும் ஒரு கேள்வி இருக்கிறது: சிஎஸ்கே-வின் பிரதான நிர்வாகி என். சீனிவாசன் அங்கே இருந்திருந்தால், தோனி மைதானத்தில் இல்லாமல் இருந்திருப்பாரா?"

தோனியின் எதிர்காலம் குறித்த விவாதங்கள் அவருக்கும், சிஎஸ்கே உரிமையாளர்களுக்கும் மட்டுமே தெரியும் என்பதால், ஊகிப்பது நியாயமற்றது என்றும் அஷ்வின் தனது பேச்சில் முடித்தார். எனினும், தோனி விளையாடுவதை நிறுத்திக் கொண்டாலும்கூட, அவரது வழிகாட்டுதல் மற்றும் ஆலோசனை இளம் வீரர்களுக்குப் பெரிதும் உதவும் என்பதால், அவர் உடைமாற்றும் அறையில் இருப்பது அணிக்கு நன்மையளிக்கும் என்றும் அஷ்வின் மேலும் தெரிவித்துள்ளார்.