news@ilakkiyainfo.com

பிரிவுகள்

ஞானசாரவுக்கான 4 வருட சிறைத்தண்டனையை உறுதிசெய்தது மேன்முறையீட்டு நீதிமன்றம்

18 Nov, 2026

இஸ்லாம் மதத்திற்கு அவதூறு விளைவித்த குற்றச்சாட்டில் கலகொட அத்தே ஞானசார தேரருக்குக் கொழும்பு மேல்நீதிமன்றத்தால் விதிக்கப்பட்ட 4 வருட கடூழியச் சிறைத்தண்டனையை மேன்முறையீட்டு நீதிமன்றம் உறுதி செய்துள்ளது.

 

குறித்த தண்டனையிலிருந்து தன்னை விடுவிக்குமாறு கோரி ஞானசார தேரரால் சமர்ப்பிக்கப்பட்ட மேன்முறையீட்டைத் தள்ளுபடி செய்தே நீதியரசர்கள் குழாம் இந்த உத்தரவைப் பிறப்பித்துள்ளதாக 'அததெரண' செய்தியாளர் தெரிவித்தார்.

 

கடந்த 2016 மார்ச் 30 ஆம் திகதி கொழும்பு - கிருலப்பனை பகுதியில் நடைபெற்ற ஊடகவியலாளர் சந்திப்பில் வெளியிடப்பட்ட கருத்துக்கள், இஸ்லாம் மதத்திற்கு அவதூறு சேர்த்ததுடன் இனங்களுக்கிடையேயான நல்லிணக்கத்துக்குப் பங்கம் விளைவிக்கும் வகையில் அமைந்துள்ளதாகத் இலங்கைத் தண்டனைச் சட்டக்கோவையின் 291 ஆவது பிரிவின் கீழ் சட்டமா அதிபரால் இந்த வழக்குத் தாக்கல் செய்யப்பட்டிருந்தது.

 

இந்தக் குற்றச்சாட்டுக்களில் குற்றவாளியாகக் காணப்பட்ட ஞானசார தேரருக்குக் கொழும்பு மேல்நீதிமன்றத்தினால் கடந்த 2024 ஆம் ஆண்டில் 4 வருட பாரிய கடூழிய சிறைத்தண்டனை விதிக்கப்பட்டது. 

 

அந்தத் தண்டனைக்கு எதிராகவே ஞானசார தேரரால் இந்த மேன்முறையீடு தாக்கல் செய்யப்பட்டிருந்தது.

இராஜாங்கனை சத்தாரத்ன கைது!





அநுராதபுரம் புனித நகரப் பகுதியில் முன்னெடுக்கப்பட்ட சத்தியாக்கிரகப் போராட்டத்தின் போது அமைதியற்ற முறையில் நடந்துகொண்டமை மற்றும் மோதலில் ஈடுபட்டமை தொடர்பான குற்றச்சாட்டுகளின் பேரில், பிக்கு நிலையிலிருந்து விலக்கப்பட்டுள்ள இராஜாங்கனை சத்தாரத்ன இன்று (18) புதன்கிழமை பொலிஸாரால் கைது செய்யப்பட்டுள்ளார்.


குறித்த சம்பவம் தொடர்பில் வாக்குமூலம் வழங்குவதற்காக இன்றைய தினம் அநுராதபுரம் பொலிஸ் நிலையத்திற்கு அழைக்கப்பட்டிருந்த இராஜாங்கனை சத்தாரத்னவிடம் பொலிஸார் விசாரணைகளை முன்னெடுத்த பின்னர் அவரைக் கைது செய்துள்ளனர்.


கடந்த 12 ஆம் திகதி அநுராதபுரம் புனித நகரிலுள்ள ருவன்வெலிசாய அருகே, பலாங்கொடை கஸ்ஸப்ப தேரர் தலைமையிலான குழுவினர் சாகும்வரையிலான உண்ணாவிரதப் போராட்டத்தில் ஈடுபட்டிருந்தனர்.


குறித்த இடத்திற்கு இராஜாங்கனை சத்தாரத்ன தலைமையிலான குழுவினர் வருகை தந்த போது இரு தரப்பினருக்கும் இடையே ஏற்பட்ட வாய்த்தர்க்கம் கைகலப்பாக மாறியது. இந்த மோதலில் தலையில் காயமடைந்த இராஜாங்கனை சத்தாரத்ன தேரர் வைத்தியசாலையில் அனுமதிக்கப்பட்டிருந்தார்.


இந்தச் சம்பவம் தொடர்பில் முன்னதாகத் தலையிட்ட பொலிஸார், பலாங்கொடை கஸ்ஸப்ப தேரர் உட்பட பலரைக் கைது செய்து சட்ட நடவடிக்கை எடுத்திருந்த நிலையில், இன்று இராஜாங்கனை சத்தாரத்னவும் கைது செய்யப்பட்டுள்ளார்.

கருத்துகள் (Comments)

இந்தச் செய்தி குறித்து உங்கள் கருத்தைப் பதிவு செய்ங்கள்!