டிரம்ப்: ஒரே ஒரு கையொப்பத்தில் சுவிட்சர்லாந்தை தண்டிக்க முடியும் என்று மிரட்டல்

அமெரிக்க அதிபர் டொனால்ட் டிரம்ப், "ஒரே ஒரு பேனா கையொப்பத்தின் மூலம் சுவிட்சர்லாந்து இனி ஒரு 'உயர்தர நாடாக' இருக்க முடியாதபடி செய்ய முடியும்" என்று தெரிவித்துள்ளார்.

டொனால்ட் டிரம்ப் மீண்டும் ஒருமுறை "பணக்கார" சுவிட்சர்லாந்தை கடுமையாக விமர்சித்துள்ளார். அமெரிக்க அதிபர், "ஒரே ஒரு கையொப்பத்தில் சுவிட்சர்லாந்து இனி ஒரு 'உயர்தர (Elite) நாடாக' இருக்காது" என்று கூறினார்.

Tages-Anzeiger நாளிதழ் சுட்டிக்காட்டியபடி, இந்தக் கருத்துகளை டிரம்ப், வாஷிங்டனில் உள்ள Punchbowl News ஊடகத்திற்கு அளித்த பேட்டியில் தெரிவித்தார். வர்த்தகத் தகராறுகளில் அமெரிக்காவுக்கு உள்ள அதிகாரத்தை வெளிப்படுத்தும் நோக்கில் அவர் இவ்வாறு பேசியதாக குறிப்பிடப்பட்டுள்ளது.

டிரம்பின் கூற்றுப்படி, சுவிட்சர்லாந்து போன்ற ஒரு "உயர்தர நாடு" காரணமாக அமெரிக்காவுக்கு 39 பில்லியன் அமெரிக்க டாலர் வர்த்தக பற்றாக்குறை ஏற்பட்டுள்ளது.அவர் கூறியதாவது:

 "ஒரே ஒரு பேனா கையொப்பத்தில் அந்த வர்த்தக பற்றாக்குறையை நான் நீக்கிவிட முடியும். அப்போது அவர்கள் இனி ஒரு உயர்தர நாடாக இருக்க மாட்டார்கள். 

அவர்கள் தற்போது வெறும் 1% வட்டி விகிதத்தில்தான் கடன் பெறுகிறார்கள். நான் 'உங்களுடைய கடிகாரங்களோ, வேறு எந்தப் பொருட்களோ எனக்கு வேண்டாம்' என்று சொன்னாலே போதும். அப்படிச் செய்தால் நாங்கள் 39 பில்லியன் டாலரைச் சேமித்துவிடுவோம். 

ஆனால் அவர்களுக்கு மிகப் பெரிய பொருளாதார சிக்கல்கள் உருவாகும்; அவர்கள் இனி ஒரு உயர்தர நாடாக இருக்க மாட்டார்கள்."

அதன் பின்னர், டிரம்ப் தாம் அப்படிச் செய்வது சாத்தியமில்லை என்றும் கூறினார்:

"அதிர்ஷ்டவசமாக, நான் ஒரு நல்ல மனிதன்" ("I'm a nice person").

எனினும், கடந்த காலங்களில் டிரம்ப் பலமுறை சுவிட்சர்லாந்தை இவ்வாறான எச்சரிக்கைகளால் மிரட்டியுள்ளார். 

இவை பெரும்பாலும் பேச்சுவார்த்தை நடத்தும் ஒரு உத்தியாகக் கருதப்பட்டாலும், சில சந்தர்ப்பங்களில் அவர் தனது மிரட்டல்களை நடைமுறையிலும் செயல்படுத்தியிருக்கிறார்.