"திட்டமிட்ட தற்கொலையா?" - கபில சந்திரசேன மரணத்தில் புதிய திருப்பம்: விசாரணையில் திடுக்கிடும் தகவல்கள்!
ஸ்ரீலங்கன் ஏர்லைன்ஸ் முன்னாள் சி.இ.ஓ கபில சந்திரசேன, கொள்ளுப்பிட்டியிலுள்ள அவரது இல்லத்தில் சடலமாக மீட்கப்பட்ட சம்பவம் இலங்கையில் பெரும் பரபரப்பை ஏற்படுத்தியுள்ளது. எயார்பஸ் (Airbus) ஊழல் வழக்கில் குற்றம் சாட்டப்பட்டிருந்த இவருக்கு எதிராக, பிணை நிபந்தனைகளை மீறியதாகக் கூறி கடந்த மே 7-ம் தேதி நீதிமன்றம் மீண்டும் பிடியாணை பிறப்பித்தது. பிடியாணை பிறப்பிக்கப்பட்ட சில மணி நேரங்களிலேயே அவர் தூக்கிட்ட நிலையில் சடலமாக மீட்கப்பட்டது பலத்த சந்தேகங்களை எழுப்பியுள்ளது. குறிப்பாக, அவர் தற்கொலைக்கு பயன்படுத்தியதாகக் கூறப்படும் 'பட்டி' (Belt), பான்ஸ் பிளேஸ் இல்லத்திலிருந்து பணியாளர் ஒருவரின் மூலம் தருவிக்கப்பட்டதாகப் பொலிஸ் விசாரணையில் தெரியவந்துள்ளது. ஆடைகளுடன் சேர்த்து இந்தப் பட்டியையும் எடுத்து வருமாறு சந்திரசேன கேட்டதாகப் பணியாளர் வாக்குமூலம் அளித்துள்ளார். இது அவர் ஏற்கனவே திட்டமிட்டு உயிரை மாய்த்துக் கொண்டாரா என்ற சந்தேகத்தை வலுப்படுத்தியுள்ளது. அவர் உயிரிழப்பதற்கு முன்னர் யாருடன் பேசினார் என்பது குறித்து அவரது தொலைபேசி அழைப்பு விபரங்களை (CDR) பொலிஸார் ஆய்வு செய்து வருகின்றனர். கபில சந்திரசேனவின் உடல் பாகங்கள் மேலதிக இரசாயனப் பரிசோதனைக்காக அனுப்பப்பட்டுள்ளன. எயார்பஸ் ஊழலில் முக்கியப் புள்ளிகளுக்குத் தொடர்பு இருப்பதாக அவர் ஏற்கனவே அளித்த வாக்குமூலங்கள், இந்த மரணத்தைச் சுற்றியுள்ள மர்மத்தை அதிகரித்துள்ளன. தற்போது கொழும்பு குற்றத்தடுப்புப் பிரிவினர் (CCD) இந்த வழக்கு தொடர்பான தீவிர விசாரணைகளை முன்னெடுத்து வருகின்றனர்.

கருத்துகள் (Comments)
உங்கள் கருத்தைத் தெரிவிக்கவும் (Leave a Reply)
இந்தச் செய்தி குறித்து உங்கள் கருத்தைப் பதிவு செய்ங்கள்!