தொடர் காயங்களால் சிதைந்த பிளே ஆஃப் கனவு

ஐபிஎல் 2026 (IPL 2026) சீசனில் சென்னை சூப்பர் கிங்ஸ் (CSK) அணி, குஜராத் அணிக்கு எதிரான தனது கடைசி லீக் ஆட்டத்தில் 89 ரன்கள் வித்தியாசத்தில் மிகப்பெரிய தோல்வியைச் சந்தித்து, பிளே ஆஃப் சுற்றுக்குத் தகுதி பெறும் வாய்ப்பை இழந்து தொடரிலிருந்து வெளியேறியுள்ளது. 

இதன் மூலம் சிஎஸ்கே அணி தொடர்ந்து மூன்றாவது முறையாக பிளே ஆஃப் சுற்றுக்குத் தகுதி பெற முடியாமல் ரசிகர்களுக்குப் பெரும் ஏமாற்றத்தை அளித்துள்ளதுடன், இந்த சீசனில் விளையாடிய 14 போட்டிகளில் 6 வெற்றி, 8 தோல்விகளுடன் 12 புள்ளிகளைப் பெற்று புள்ளிப்பட்டியலில் 7-வது இடத்தைப் பிடித்துள்ளது. இத்தொடரின் ஆரம்பத்தில் தடுமாறினாலும், பின்னர் பழைய திறமையை வெளிப்படுத்தித் தொடர் வெற்றிகளைக் குவித்த சிஎஸ்கே அணி இம்முறை கண்டிப்பாகப் பிளே ஆஃப் செல்லும் என எதிர்பார்க்கப்பட்ட நிலையில், முக்கிய கட்டத்தில் நட்சத்திர வீரர்கள் காயம் காரணமாக வெளியேறியதே அணியின் வீழ்ச்சிக்கு முக்கிய காரணமாகப் பார்க்கப்படுகிறது.

அணியின் பந்துவீச்சுக்கு வலு சேர்ப்பார் என நம்பப்பட்ட ஆஸ்திரேலிய வேகப்பந்துவீச்சாளர் நாதன் எல்லிஸ் மற்றும் அனுபவ வீரரான முன்னாள் கேப்டன் எம்.எஸ்.தோனி ஆகிய இருவருமே காயம் காரணமாக இந்த சீசனில் ஒரு போட்டியில் கூட விளையாடாமல் வெளியேறியது அணிக்குப் பெரும் பின்னடைவாக அமைந்தது. இவர்களைத் தொடர்ந்து, யாக்கர்களைச் சிறப்பாக வீசி விக்கெட்டுகளை வீழ்த்தி வந்த நட்சத்திர வேகப்பந்துவீச்சாளர் கலீல் அஹமத் மற்றும் பேட்டிங்கில் அதிரடி காட்டிய இளம் வீரர் ஆயுஷ் மாத்ரே ஆகியோரும் பாதியிலேயே காயமடைந்து வெளியேறினர். 

இத்தகைய இக்கட்டான சூழ்நிலையிலும் உர்வில் பட்டேல், சஞ்சு சாம்சன் மற்றும் பந்துவீச்சில் அணியின் முதுகெலும்பாக விளங்கிய ஜெமி ஓவர்டன் போன்ற வீரர்கள் சிஎஸ்கே அணியை மீட்கப் போராடிய போதிலும், ஜெமி ஓவர்டனுக்கும் காயம் ஏற்பட்டு வெளியேறியது பந்துவீச்சை முற்றிலும் பலவீனப்படுத்தியது. 

இறுதி கட்டத்தில் விளையாடிய கடைசி மூன்று போட்டிகளில் ஒன்றிரண்டில் வெற்றி பெற்றிருந்தால் கூட பிளே ஆஃப் சுற்றுக்குச் சென்றிருக்கலாம் என்ற நிலையில், வீரர்களின் தொடர் காயங்களே சிஎஸ்கே அணியின் இம்முறை தோல்விக்குத் தீர்மானிக்கும் காரணியாக அமைந்துவிட்டது.