பனிப்போரின் உலகளாவிய வரலாற்றுப் பாடம் : இன்றைய அணுஆயுத ஆபத்துகளை எதிர்கொள்வதற்கான ஒரு மூலோபாய வரைபடம்

இந்தச் சந்திப்பின் பின்னணியில் நல்ல நோக்கங்கள் இருக்கலாம் அல்லது மோசமான கணக்கீடுகள் இருக்கலாம். மிக மோசமான சூழ்நிலையைக் கருதினால், டிரம்பும் ஷி ஜின்பிங்கும் புடினின் உக்ரைன் ஆக்கிரமிப்பை அல்லது அடிமைப்படுத்தலை அங்கீகரிக்கக்கூடும்.

ஒரு புதிய ஆயுதப் போட்டி தொடங்கியுள்ளது. டிரம்ப் இதைப் பற்றிப் பேச ஷி ஜின்பிங்கையும் புடினையும் தொடர்ந்து அழைத்த போதிலும், சீனா இதில் பங்கேற்க மறுத்துவிட்டது. இந்தக் கட்டத்தில் சீனா இத்தகைய முத்தரப்பு அணுஆயுதக் குறைப்புப் பேச்சுவார்த்தையில் சேருவது நியாயமானதோ, பகுத்தறிவானதோ அல்லது யதார்த்தமானதோ அல்ல என்று சீனாவின் வெளியுறவு அமைச்சு  தெரிவித்துள்ளது. 

இந்த முட்டுக்கட்டையானது வொஷிங்டனில் உள்ள அனுபவமிக்க கொள்கை வகுப்பாளர்களை மாற்று வழிகளை யோசிக்க வைத்துள்ளது. அவர்களில் ஒருவர் ஜோயல் விட் ஆவார். அமெரிக்க வெளியுறவுத்துறையின் மூத்த அதிகாரியான இவர், 1990கள் முதல் வடகொரியாவின் அணுஆயுதத் திட்டத்தைத் தடுப்பதற்காக அந்நாட்டுடன் பேச்சுவார்த்தை நடத்திய அனுபவம் கொண்டவர். 

சீனாவைக் குறிவைத்து தந்திரோபாய அணுஆயுதங்களை நாம் மீண்டும் களமிறக்குவது தவிர்க்க முடியாதது போலத் தெரிகிறது என்று விட் குறிப்பிடுகிறார். தனிப்பட்ட முறையில் இத்தகைய நடவடிக்கை பேரழிவை அழைப்பதாகும், ஏனெனில் இந்த ஆயுதங்கள் மிகவும் ஆபத்தானவை. ஆனால், நாம் இதனை ஒரு அணுஆயுதக் கட்டுப்பாட்டு முன்மொழிவோடு இணைத்தால் இத்திட்டம் வெற்றிபெற வாய்ப்புள்ளது என்கிறார் அவர்.

1979இன் இரட்டைப் பாதை மூலோபாயமும் 

டிரம்ப் முன் உள்ள பாதையும்

இன்று ஆசியாவில் சீனா தந்திரோபாய அணுஆயுதங்களை அதிகளவில் பயன்படுத்துவது போல, 1970களில் சோவியத் ஒன்றியம் ஐரோப்பாவை அச்சுறுத்தும் வகையில் நடுத்தர வரம்பு ஏவுகணைகளை நிறுத்தியது. இது ஐரோப்பிய நாடுகளுக்கு அமெரிக்கா மீதிருந்த நம்பிக்கையில் பெரும் அச்சுறுத்தலை ஏற்படுத்தியது.