பிலிப்பைன்ஸை நிலநடுக்கம்: 16 பேர் பலி, 200க்கும் மேற்பட்டோர் காயம்

பிலிப்பைன்ஸின் சில கடலோரப் பகுதிகளில் 3 அடி உயரத்திற்குச் சுனாமி அலைகள் தாக்கியுள்ளதால், குடியிருப்புவாசிகளை உடனடியாக உயரமான இடங்களுக்குச் செல்லுமாறு பிலிப்பைன்ஸ் மற்றும் இந்தோனேசிய அதிகாரிகள் அறிவுறுத்தியுள்ளனர்.

பிலிப்பைன்ஸின் தெற்கு நகரமான ஜெனரல் சாண்டோஸ் (General Santos) பகுதியை, திங்கட்கிழமை உலுக்கிய 7.8 ரிக்டர் அளவிலான சக்திவாய்ந்த நிலநடுக்கத்தில் சிக்கி குறைந்தது 16 பேர் உயிரிழந்துள்ளதுடன், 200க்கும் மேற்பட்டோர் காயமடைந்துள்ளதாக ‘ஏபி’ (AP) செய்தி நிறுவனம் தெரிவித்துள்ளது. இந்த நிலநடுக்கத்தால் கட்டடங்கள் இடிந்து விழுந்ததுடன், பிராந்தியம் முழுவதும் சுனாமி எச்சரிக்கையும் விடுக்கப்பட்டுள்ளது.

அமெரிக்கப் புவியியல் ஆய்வு மையத்தின் (USGS) தகவல்படி, முதலாவது நிலநடுக்கம் ஏற்பட்டு சுமார் இரண்டு மணி நேரத்திற்குப் பிறகு, அதே பகுதியில் 6.1 ரிக்டர் அளவில் இரண்டாவது நிலநடுக்கமும் பதிவாகியுள்ளது.

பாதிப்புகளின் அளவை அதிகாரிகள் களத்தில் மதிப்பிட்டு வருவதால், உயிரிழந்தவர்களின் விவரங்கள் இன்னும் சரிபார்க்கப்பட்டு வருவதாக ஜெனரல் சாண்டோஸ் நகரின் பேரிடர் மேலாண்மைத் தலைவர் அக்ரிபினோ டசெரா (Agripino Dacera) தெரிவித்துள்ளார். பிலிப்பைன்ஸ் கடலோரப் பகுதியின் சில இடங்களில் 3 அடி உயரத்திற்குச் சுனாமி அலைகள் தாக்கியதை அடுத்து, பிலிப்பைன்ஸ் மற்றும் இந்தோனேசிய அதிகாரிகள் கடலோர மக்களை உடனடியாக உயரமான இடங்களுக்குச் செல்லுமாறு வலியுறுத்தியுள்ளனர்.

இதற்கிடையில், மிண்டனாவோ (Mindanao) பிராந்தியத்தில் நிலநடுக்கத்தால் பாதிக்கப்பட்ட பகுதிகளில் பள்ளி வகுப்புகளை ரத்து செய்துள்ள பிலிப்பைன்ஸ் அதிபர் பெர்டினாண்ட் மார்கோஸ் ஜூனியர், கடலோரப் பகுதி மக்கள் உடனடியாக வெளியேற வேண்டும் என்று அழைப்பு விடுத்துள்ளதாக ‘ஏஎஃப்பி’ (AFP) செய்தி நிறுவனம் குறிப்பிட்டுள்ளது. இதுகுறித்து அவர் பேசுகையில், “இப்போதே உயரமான இடங்களுக்குச் செல்லுங்கள்; தாமதிக்க வேண்டாம். நீங்கள் விட்டுச் செல்லும் எதையும் விட உங்கள் உயிரே மிகவும் முக்கியமானது!” என்று உருக்கமாகக் கேட்டுக்கொண்டுள்ளார்.

பாதிக்கப்பட்ட பகுதிகளில் மூன்று மீட்டர் வரையிலான அலைகள் தாக்கக்கூடும் என எச்சரித்துள்ள இந்தோனேசியாவின் தேசிய வானிலை நிறுவனம், கலிமந்தன் (Kalimantan) மற்றும் சுலவேசி (Sulawesi) ஆகிய பகுதிகளுக்குச் சுனாமி எச்சரிக்கையை விடுத்துள்ளதாக ‘ஏஎஃப்பி’ செய்தி வெளியிட்டுள்ளது. சுனாமி அச்சம் அதிகரித்துள்ளதால், மனடோ (Manado), கோரண்டலோ (Gorontalo) மற்றும் சாங்கிஹே தீவுகள் (Sangihe Islands) ஆகியவற்றின் அதிகாரிகளை, மக்களைப் பாதுகாப்பாக உயரமான இடங்களுக்கு வெளியேற்றும் பணிகளைத் தொடங்குமாறு இந்தோனேசிய பேரிடர் மேலாண்மை முகமை உத்தரவிட்டுள்ளது.

பிலிப்பைன்ஸ் எரிமலையியல் மற்றும் நிலநடுக்கவியல் நிறுவனம் (PHIVOLCS), ஆறு கண்காணிப்பு நிலையங்களில் வெவ்வேறு உயரங்களில் சுனாமி அலைகள் பதிவாகியுள்ளதாகக் குறிப்பிட்டுள்ளது. மேலும், பதிவான மிக உயர்ந்த சுனாமி அலையின் அளவு 1.4 மீட்டர் என்றும் அந்த நிறுவனம் சேர்த்துக் கூறியுள்ளது.

இது ஒருபுறமிருக்க, ஜப்பானும் தனது பசிபிக் கடலோரப் பகுதியின் பெரும் பகுதிகளுக்குச் சுனாமி ஆலோசனைகளை வழங்கியுள்ளது. உள்ளூர் நேரப்படி காலை 11:30 மணி முதல் (02:30 GMT) பாதிக்கப்பட்ட பகுதிகளை ஒரு மீட்டர் வரையிலான அலைகள் தாக்கக்கூடும் என எச்சரித்துள்ளது. சுனாமி எச்சரிக்கை விடுக்கப்பட்டுள்ள இந்தோனேசியா மற்றும் மலேசியாவின் சில பகுதிகளிலும் ஒரு மீட்டர் வரை அலைகள் எழும்பலாம் என எதிர்பார்க்கப்படுகிறது. எனினும், தாய்லாந்து அல்லது சான் பிரான்சிஸ்கோ ஆகிய பகுதிகளில் இதுவரை சுனாமி அச்சுறுத்தல் எதுவும் பதிவாகவில்லை.

நிலநடுக்கத்தைத் தொடர்ந்து கட்டடங்கள் இடிந்து தரைமட்டமாகும் காட்சிகள் வெளியாகியுள்ளன. ஜெனரல் சாண்டோஸ் நகரில் உள்ள ‘ஜோலிபி’ (Jollibee) விரைவு உணவு உணவகத்தைக் கொண்ட வணிக வளாகம் ஒன்று இடிபாடுகளாக மாறியதை ஒரு வீடியோ காட்டியது. அதே நேரத்தில், மற்றொரு பகுதியில் மக்கள் யாரும் இல்லாத பள்ளி ஆவணக் காப்பகக் கட்டடம் ஒன்று அப்படியே சரிந்து விழுந்ததாக அதிகாரிகள் தெரிவித்துள்ளதாக ‘ஏஎஃப்பி’ செய்தி நிறுவனம் குறிப்பிட்டுள்ளது.