பொலிஸ் மாஅதிபரிலிருந்து மரண தண்டனை கைதியாக மாறிய பூஜித் ஜயசுந்தர

2019 ஆம் ஆண்டு இடம்பெற்ற உயிர்த்த ஞாயிறு பயங்கரவாதத் தாக்குதலுக்கு முன்னதாகக் கிடைத்த உளவுத்துறை எச்சரிக்கைகளுக்கு அமைய உரிய நடவடிக்கை எடுக்கத் தவறிய குற்றச்சாட்டில், முன்னாள் பொலிஸ் மாஅதிபர் பூஜித் ஜயசுந்தரவுக்கு கொழும்பு மேல் நீதிமன்றத்தின் மூன்று நீதிபதிகள் கொண்ட அமர்வு இன்று (31) மரண தண்டனை விதித்துத் தீர்ப்பளித்துள்ளது.

திட்டமிடப்பட்ட தாக்குதல்கள் குறித்த துல்லியமான உளவுத் தகவல்கள் கிடைத்திருந்தபோதிலும், அவர் முன்னெச்சரிக்கை நடவடிக்கைகளை எடுக்கத் தவறியதால், உத்தியோகபூர்வ கடமைகளைச் செய்யத் தவறியது மற்றும் கடுமையான குற்றவியல் அலட்சியம் ஆகியவை குற்றச்சாட்டுகளின் மையமாக இருந்தன.

1960 இல் பிறந்து 1985 இல் தகுதிகாண் உதவி பொலிஸ் அத்தியட்சகராக (ASP) இணைந்த பூஜித் ஜயசுந்தர, 2016 ஏப்ரலில் நாட்டின் 34 ஆவது பொலிஸ் மாஅதிபராக நியமிக்கப்பட்டார்.

2019 ஆம் ஆண்டு ஏப்ரல் 21 ஆம் திகதி நடைபெற்ற உயிர்த்த ஞாயிறு பயங்கரவாதத் தாக்குதலில் 260 இற்கும் மேற்பட்டோர் உயிரிழந்ததுடன், நூற்றுக்கணக்கானோர் காயமடைந்தனர். இந்தத் தாக்குதலுக்கு முன்னரே கிடைத்த புலனாய்வு எச்சரிக்கைகளைப் பொருட்படுத்தி நடவடிக்கை எடுக்காதமை தொடர்பில் சிரேஷ்ட பாதுகாப்பு அதிகாரிகள் மீது விசாரணைகள் முன்னெடுக்கப்பட்டன.

தாக்குதலுக்கு சில நாட்களுக்குப் பின்னர், அப்போதைய ஜனாதிபதி மைத்திரிபால சிறிசேன அவரை பதவி விலகுமாறு அறிவுறுத்திய நிலையில், அவர் மறுத்ததைத் தொடர்ந்து கட்டாய விடுப்பில் அனுப்பப்பட்டார். பின்னர் சி.டி. விக்ரமரத்ன பதில் பொலிஸ்மா அதிபராக நியமிக்கப்பட்டார்.

இதனையடுத்து, முன்னாள் பாதுகாப்புச் செயலாளர் ஹேமசிறி பெனாண்டோவுடன் இணைந்து பூஜித் ஜயசுந்தர மீது வழக்குத் தாக்கல் செய்யப்பட்டது. 2022 ஆம் ஆண்டு இருவரும் விடுவிக்கப்பட்ட போதிலும், சட்டமா அதிபர் தாக்கல் செய்த மேன்முறையீட்டை பரிசீலித்த உயர்நீதிமன்றம் அந்தத் தீர்ப்பு சட்டரீதியாக பிழையானது எனக் கூறி வழக்கை மீண்டும் விசாரிக்க உத்தரவிட்டது.

மீள விசாரணை நடத்தப்பட்ட இந்த வழக்கில், 855 குற்றச்சாட்டுகளில் 854 குற்றச்சாட்டுகளில் பூஜித் ஜயசுந்தர குற்றவாளி என பெரும்பான்மை நீதிபதிகள் தீர்மானித்தனர். புலனாய்வுத் தகவல்களின் அடிப்படையில் நடவடிக்கை எடுக்கத் தவறியதன் மூலம் கடமையைப் புறக்கணித்தமை, குற்றவியல் அலட்சியம் மற்றும் உயிரிழப்புகளுக்கு உடந்தையாக இருந்தமை ஆகிய குற்றச்சாட்டுகளில் அவர் குற்றவாளி எனக் காணப்பட்டதைத் தொடர்ந்து மரண தண்டனை விதிக்கப்பட்டது.

தாக்குதல்களைத் தடுக்கத் தவறியதன் மூலம் அடிப்படை உரிமைகளை மீறியதாக பாதிக்கப்பட்டவர்களுக்கு ரூ. 75 மில்லியன் இழப்பீடு வழங்குமாறு 2023 ஜனவரியில் உயர் நீதிமன்றம் அவருக்கு உத்தரவிட்ட நிலையில், அவர் அத்தொகையை முழுமையாகச் செலுத்தி முடித்திருந்தார் என்பது குறிப்பிடத்தக்கது.

இலங்கை குற்றவியல் நீதித் துறையில் உயர் மட்டப் பொலிஸ் அதிகாரி ஒருவருக்கு இத்தகைய தீவிர குற்றச்சாட்டுகளுக்காக மரண தண்டனை விதிக்கப்பட்டமை வரலாற்றில் முதன்மை பெற்ற ஒரு முக்கியத் தீர்ப்பாகப் பார்க்கப்படுகிறது.