முல்லைத்தீவு விபத்தில் மூளைச்சாவடைந்த தாயின் சிறுநீரகங்கள் தானம்! ; இருவருக்கு மறுவாழ்வு!

வவுனியா வைத்தியசாலையில் இடம்பெற்ற இந்த உறுப்பு தானத்தின் மூலம் இரண்டு நோயாளிகளுக்கு சிறுநீரகங்கள் பொருத்தப்பட்டு மறுவாழ்வு அளிக்கப்பட்டுள்ளது.

முல்லைத்தீவு, உடுப்புக்குளம் நான்காம் கட்டைப் பகுதியைச் சேர்ந்த 53 வயதுடைய தாய், கடந்த 15ஆம் திகதி தனது மகனுடன் மோட்டார் சைக்கிளில் மாஞ்சோலை பகுதியில் பயணித்துக்கொண்டிருந்தபோது, எதிர்பாராத விதமாக தவறி விழுந்து விபத்துக்குள்ளானார்.

அந்த விபத்தின்போது தலையில் பலத்த காயமடைந்து சுயநினைவை இழந்த அவர், உடனடியாக அருகில் இருந்த வைத்தியசாலையில் அனுமதிக்கப்பட்ட நிலையில், மேலதிக தீவிர சிகிச்சைக்காக யாழ்ப்பாணம் போதனா வைத்தியசாலைக்கு மாற்றப்பட்டார். அங்கு அளிக்கப்பட்ட தீவிர சிகிச்சைகளும் பலனளிக்காத நிலையில், அவர் வவுனியா வைத்தியசாலைக்கு மாற்றப்பட்டார்.

இந்த நிலையில், குடும்பத்தினரின் சம்மதத்துடன், அவரது இரண்டு சிறுநீரகங்களும் வவுனியா வைத்தியசாலையில் வைத்து தானமாக அளிக்கப்பட்டன.

.

இதன் மூலம் உயிருக்கு ஆபத்தான நிலையில் இருந்த 2 நோயாளிகளுக்கும் அந்தத் தாயின் சிறுநீரகங்கள் பொருத்தப்பட்டு, மறுவாழ்வுக்கான வாய்ப்பு அளிக்கப்பட்டது. 

ஒரு குடும்பத்துக்கு ஈடுசெய்ய முடியாத இழப்பை ஏற்படுத்திய இந்த விபத்து, மற்றொரு புறத்தில் இரண்டு உயிர்களுக்கு புதிய நம்பிக்கையை வழங்கியுள்ளது. 

மோட்டார் சைக்கிளில் பயணிப்பவர்கள் கட்டாயம் தலைக்கவசம் அணிந்து, வீதி விதிகளை மதித்து, அவதானத்துடன் வாகனங்களைச் செலுத்தவேண்டும். அத்தோடு, உயிரிழக்கும் தருணத்திலும் இரண்டு பேருக்கு மறுவாழ்வு கிடைக்க வழிவகுத்த அந்தத் தாயின் உறுப்புதானம், மனிதநேயத்தின் உயரிய அடையாளமாகப் பார்க்கப்படுகிறது. உடலுறுப்பு தானம் தொடர்பான விழிப்புணர்வை சமூகத்தில் ஏற்படுத்த வேண்டியதன் அவசியத்தையும் இந்தச் சம்பவம் உணர்த்துவதாக பல தரப்பினர் கருத்து தெரிவித்து வருகின்றனர்.