கண்ணுக்குத் தெரியாத சர்வாதிகார உலகம் : ஜனநாயகத்தைக் கையகப்படுத்தும் தொழில்நுட்ப முதலாளித்துவம்
07 Nov, 2026
யேமனின் ஹூதி முஸ்லிம்களின் தாக்குதல்களிலிருந்து தப்பிக்க அமெரிக்கா, இஸ்ரேலிடம் பாதுகாப்பு கோரி மன்றாடும் சவூதி!
தமது பிராந்தியத்தில் வெளிநாட்டுச் செல்வாக்கை கடுமையாக எதிர்க்கும் யேமனின் அன்சார்அல்லா என்றும் ஹூதிகள், என்றும் அழைக்கப்படும் முஸ்லிம் போராளிகள், தமது தாய் நாட்டில் தங்களது அரசியல் மற்றும் சமய மேலாதிக்கத்தை நிலைநாட்ட, கடந்த பல தசாப்தங்களாக கடுமையாகப் போராடி வருகின்றனர்.
சவூதி ஆதரவுடன் செயற்படும் இன்றைய யேமன் அரசை தூக்கியெறிந்து முழு நாட்டையும் ஆட்சி செய்வதே அவர்களின் முக்கிய குறிக்கோளாக இருந்து வருகின்றது. அவர்கள் இப்போது வடமேற்கு யேமனின் பெரும் பகுதியான தலைநகர் சனா உட்பட மேலும் பல முக்கிய மூலோபாய பகுதிகளை தமது கட்டுப்பாட்டில் வைத்துள்ளார்கள். எஞ்சியுள்ள பகுதிகளையும் கைப்பற்ற தரை வழியாகவும் ஏவுகணைகளைப் பாவித்தும் தீவிர போராட்டத்தில் ஈடுபட்டுள்ளனர்.
சவூதி முடிக்குரிய இளவரசர் சல்மான், அமெரிக்க அதிபர் டொனால்ட் ட்ரம்போடு இரண்டு தடவைகள் தொலைபேசியில் தொடர்பு கொண்டு ஹூதிகளின் இராணுவத் தாக்குதல்களைத் தடுக்கவும், அவர்களின் முன்னேறத்தை தடுக்கவும் உதவி கோரினார்.
இஸ்லாம் மற்றும் முஸ்லிம்களுக்கு எதிராக அமெரிக்கா எண்ணற்ற குற்றங்களைப் புரிந்துள்ள போதிலும், இஸ்லாத்தின் தேசமான சவூதியின் சர்வாதிகார மற்றும் ஒடுக்குமுறை ஆட்சி, தனது பாதுகாவலராகக் கருதுவது அமெரிக்காவைதான் என்பதையே இது புலப்படுத்துகின்றது. அதன் சுய இருப்புக்காகவும் அமெரிக்காவையே அது நம்பியுள்ளது. அதற்கு ஈடாக அந்தப் பிராந்தியத்தை ஸ்திரமின்மைக்கு உட்படுத்தவும் அரங்கேற்றப்படும் அமெரிக்க--இஸ்ரேலிய கூட்டு நாசகார சதித்திட்டங்களுக்கு சவூதி அரேபிய ஆட்சி தாராளமாக உதவி வருகின்றது.
அதன் பிறகு செய்தியாளர்களிடம் பேசிய ட்ரம்ப், “ஹூதிகள் எங்ளோடு தொடர்பு கொண்டார்கள். அவர்கள் எங்களுடன் மோதிக் கொள்ள விரும்பவில்லை என்று கூறினார்கள். நாங்கள் அவர்களைப் பின் தொடர்வதை அவர்கள் விரும்பவில்லை. அமெரிக்க படைகளுடன் மோதலைத் தவிர்த்துக் கொள்வற்கான விருப்பத்தை ஹூதிகள் எமக்கு சமிக்ஞைகள் மூலம் தெரிவிதுள்ளார்கள். இருப்பினும் அவர்கள் சவூதி அரசுக்கு விரோதமான போக்கிலேயே உள்ளனர். பெரும்பாலான வணிகக் கப்பல்களை, இப்பகுதி வழியாக பாதுகாப்பாக செல்ல ஹூதிகள் அனுமதித்துள்ளனர்” என்றும் ட்ரம்ப் கூறினார்.
அதனைத் தொடர்ந்து நம்பிக்கையற்ற நிலைக்குத் தள்ளப்பட்ட சல்மான், இஸ்ரேலுடன் ஏற்கெனவே நெருங்கிய இரகசிய உறவுகளை பேணி வந்த நிலையில், பலஸ்தீனர்களை இஸ்ரேல் இனப்படுகொலை செய்வதற்கும், காஸாவை அழிப்பதற்கும் கூட தாராளமாக உதவி வந்த பின்னணியில், ஹூதிகளின் முன்னேற்றத்தை தடுக்க இஸ்ரேலிடமும் உதவிகளை கோரினார் என்றும் செய்திகள் வெளியாகின.
சவூதி அரேபியா மீது ஈரானில் இருந்தும், ஹூதிகள் மற்றும் ஈராக்கிய போராளிக் குழுக்கள் மத்தியில் இருந்தும் சமகாலத்தில் பிரயோகிக்கப்படும் அழுத்தம், "அமைதியான முறையில் இஸ்ரேலிய- சவூதி பாதுகாப்பு ஒத்துழைப்புக்கு வழியமைக்க கூடும்” என்று தேசிய பாதுகாப்பு ஆய்வுகள் நிறுவனத்தின் ஆராய்ச்சியாளர் யோயல் குசான்ஸ்கி சுட்டிக் காட்டி உள்ளார். இந்த ஒத்துழைப்பு உளவுத் தகவல்கள், ஆரம்ப கட்ட எச்சரிக்கைகள் மற்றும் ஏவுகணைகள் மற்றும் ட்ரோன்களுக்கு எதிரான பாதுகாப்பு என்பனவற்றை உள்ளடக்கியதாக இருக்கலாம் என்றும் அவர் குறிப்பிட்டுள்ளார்.
இந் நிலையில் ஹூதிகளுக்கு எதிரான செயற்பாடுகளில் சவூதி அரேபியாவுக்கு, தனது இராணுவ ஆதரவை பிரிட்டன் அறிவித்துள்ளது. இதன் மூலம் ஏற்கெனவே பல முஸ்லிம் நாடுகளை அழித்துள்ள, இஸ்ரேல் பிரிட்டன் கூட்டணிக்கு, சவூதிக்கு உதவுவது என்ற போர்வையில் வளைகுடா பிராந்தியத்தை அழிக்க மற்றொரு வாய்ப்பை சவூதி வழங்கியுள்ளது.
உலகெங்கிலும் உள்ள தங்கள் சொந்த மக்களையும், இஸ்லாம் மற்றும் முஸ்லிம்களையும் கைவிட்டு விட்டு, தங்கள் சுய இருப்புக்காக அமெரிக்காவை நம்பியிருந்த சவூதி மற்றும் பிற ஒடுக்குமுறை அரபு சர்வாதிகார நாடுகள், முஸ்லிம் மத்திய கிழக்குக்கு பெற்றுத் தந்துள்ள வெட்கக் கேடான நிலைமை இதுதான்.
பிரிட்டனும் பிரான்ஸும் மத்திய கிழக்கைப் பிரித்து, தங்களுக்கு சேவை செய்ய பொம்மை அரசுகளை நிறுவிய முதலாவது உலகப் போர் காலம் முதல், இந்த நிலை தொடர்ந்து நீடித்து வருகின்றது.
இன்று மத்திய கிழக்கில் உள்ள சர்வாதிகாரிகள் அனைவரும் முஸ்லிம் மத்திய கிழக்கு மற்றும் அதற்கு அப்பால் உள்ள அமெரிக்க,-பிரித்தானிய, ஐரோப்பிய மற்றும் இஸ்ரேலிய சதித் திட்டங்களுக்கு சேவை செய்வதற்காக தங்கள் சொந்த மக்களையும் இஸ்லாத்தையும் காட்டிக் கொடுத்துள்ளனர்.
இன்று சவூதி அரேபியா பெரும் அழுத்தத்தை எதிர் கொண்டுள்ளது. ஹூதிகளின் ஏவுகணை மற்றும் ட்ரோன் தாக்குதல்கள் காரணமாக தனது மிகப் பெரிய எண்ணெய் விநியோக மார்க்கமான சவுதி - கிழக்கு - மேற்கு எண்ணெய் குழாய் விநியோகத் திட்டத்தை மூட வேண்டிய கட்டாய நிலைக்கு அது தள்ளப்பட்டுள்ளது.
இதனால் சர்வதேச மட்டத்தில் மசகு எண்ணெய் விலை கணிசமாக அதிகரித்துள்ளது. அதேவேளை, சவூதி தலைமையிலான “மக்கா ஒப்பந்தத்தின்" கீழ் உள்ள பிராந்திய நட்பு நாடுகளும் (பாகிஸ்தான் மற்றும் துருக்கி ) இந்த விடயத்தில் இராணுவ ரீதியாக தலையிட மறுத்துவிட்டன. தங்களது ஒப்பந்தம் தாக்குதல் நோக்கு கொண்டதல்ல மாறாக அது தற்காப்பு நோக்கம் கொண்டது என்று அவை முத்திரை குத்தியுள்ளன. இந்த வகையில் உண்மையில் ஹூதி தாக்குதல்கள், மக்கா ஒப்பந்தத்தை ஒரு காகிதப் புலியாகவே மாற்றியுள்ளது.
2014முதல், ஹூதிகள், யேமன் அரசை ஆதரிக்கும் சவுதி அரேபியா தலைமையிலான கூட்டணியை எதிர்த்துப் போராடி வருகின்றனர். இது 2022ஆம் ஆண்டில் ஐ. நா. மத்தியஸ்தம் மூலமான போர் நிறுத்த ஏற்பாட்டின் மூலம் சற்று அமைதியானது. அதன்பிறகு காஸாவில், இஸ்ரேலின் இராணுவ நடவடிக்கைகளுக்கு எதிர்ப்புத் தெரிவித்து செங்கடல் வழியாக பயணிக்கும் கப்பல்கள் மீது ஹூதிகள் தமது தாக்குதல்களை ஆரம்பித்தனர். இதற்கு அமெரிக்கா பதிலடி கொடுத்தது. இது பிராந்திய மோதலில் யேமனின் சிக்கலான நிலையை மேலும் ஆழமாக்கியது.
செங்கடல் கரையோர பகுதிகளில் ஹூதி போராளிகளின் துரித முன்னேற்றம், பாப் எல்-மண்டெப் நீரிணையின் முக்கிய பகுதிகளில் கப்பல் போக்குவரத்தை கட்டுப்படுத்துவதற்கு வசதியான ஒரு கேந்திர முக்கியம் மிக்க நிலையில் அவர்களை வைத்துள்ளது. அதே நேரத்தில் அமெரிக்காவிற்கு எதிராக ஈரானின் கரங்களையும் அது வலுப்படுத்தி உள்ளது.
ஹூதிகள் மேலும் வலுவடைந்து, செங்கடலின் மத்தியில், எரித்திரியாவுக்கு குறுக்கே அமைந்துள்ள ஹனிஷ் தீவுகளிலும் தமது துருப்புக்களை நிலை கொள்ள செய்துள்ளனர். யேமனின் மோச்சா மீனவர்களின் நகரம் தற்போது போராளிகளின் நகரமாக மாறி உள்ளது. இதற்கிடையில், ஹூதி படைகள் தெற்கே பாப் எல்-மண்டேப் நீரிணையை கடந்து ‘பெரிம்’ என்ற தீவு நோக்கி தொடர்ந்து முன்னேறி உள்ளன.
1962 ஆம் ஆண்டில், இடம்பெற்ற ஒரு புரட்சி, வட யேமனில் சைதி இமாம் சாதாவின் 1,000 ஆண்டுகளுக்கும் மேலான ஆட்சியை முடிவுக்குக் கொண்டு வந்தது. மேலும் அவர்கள் அதிகாரத்திலிருந்து வீழ்ச்சியடைந்ததில் இருந்து இப்பகுதி பெரும்பாலும் பொருளாதார ரீதியாக புறக்கணிக்கப்பட்டது மற்றும் வளர்ச்சியடையாமல் உள்ளது. யேமன் அரசாங்கத்திற்கு இந்தப் பிரதேசத்தில் போதிய அதிகாரங்கள் இல்லை.
ஹூதிகள் "சகல யேமனியர்களும் விரும்பும் விடயங்களுக்காக போராடுகின்றார்கள் அரசாங்கப் பொறுப்புக்கூறல், ஊழலுக்கு முற்றுப்புள்ளி, வழக்கமான பயன்பாடுகள், நியாயமான எரிபொருள் விலைகள், சாதாரண யேமனியர்களுக்கான வேலை வாய்ப்புகள் மற்றும் மேற்கத்திய செல்வாக்கின் முடிவு என்பன இதில் அடங்கும்” என்று, 2015 பெப்ரவரியில் வெளியான நியூஸ்வீக் அறிக்கை ஒன்றில் தெரிவிக்கப்பட்டுள்ளது.
ஹூதிகளின் விருப்பத்துக்குரிய அரசியல் அமைப்பு, பெண்களும் அரசியல் பதவிகளை வகிக்கக்கூடிய தேர்தல் முறையைக் கொண்ட ஒரு குடியரசாக உள்ளது என்று, யேமன் டைம்ஸிற்கு அளித்த பேட்டியில், ஹவுத்தி உளவாளியான ஹுசைன் அல்-புகாரி என்பவர் கூறி உள்ளார்.
இதற்கிடையில், ஈராக்கிலிருந்து ஏவப்பட்டதாகக் கூறப்படும் ட்ரோன்கள் தனது கிழக்கு-மேற்கு எண்ணெய் விநியோக குழாய்த் திட்டத்தைத் தாக்கியதைத் தொடர்ந்து, சவூதி அரேபியா தனது கிழக்கு-மேற்கு விநியோகக் குழாயின் செயற்பாட்டை தற்காலிகமாக நிறுத்த வேண்டிய நிலை ஏற்பட்டுள்ளது. இருந்தாலும் பாக்தாத்தின் கோரிக்கையைத் தொடர்ந்து, இப்போதைக்கு அதற்கு பதிலடி கொடுக்கப் போவதில்லை என்று சவூதி அரசு கூறி உள்ளது.
யேமனில் ஏற்பட்ட மோதல்களை அடுத்து கிட்டத்தட்ட 86,000 பேர் தமது சொந்த இடங்களில் இருந்து வெளியேறி உள்ளதாக ஐக்கிய நாடுகள் சபையின் வட்டாரங்கள் தெரிவித்துள்ளன.
ஹூதிகள் பல்வேறு கஷ்டங்களுக்கு மத்தியில், தங்கள் இராணுவ மற்றும் போர் தந்திரங்களை முன்னேற்றுவதற்காக பல ஆண்டுகளை செலவிட்டுள்ளனர்.
காஸாவில் பலஸ்தீனர்கள் இனப்படுகொலை செய்யப்பட்டதைத் தொடர்ந்து, மிகவும் துணிச்சலோடு அவர்கள் இஸ்ரேலைத் தாக்கிய பின்னர், இந்த குழு மத்திய கிழக்கின் பல பகுதிகளில் மிகவும் பிரபலமடைந்தது. ஹவுத்திகளின் கட்டுப்பாட்டில் உள்ள அவர்களின் அரசு செய்தி நிறுவனமான சபாவின் தலைவர் நஸ்ர் அல்-தின் அமீர், "கடந்த 12 ஆண்டுகளாக சவூதி அரேபியா தங்கள் மீது திணித்துள்ள நியாயமற்ற முற்றுகையை தகர்க்கும் வரை அவர்கள் மீது நாம் அழுத்தங்களைப் பிரயோகிப்போம்" என்று எச்சரித்துள்ளார். இதன் மூலம் தமது விரிவாக்க பயணத்தில் தொடர்ந்தும் முன்னேறுவதற்கான தெளிவான நோக்கத்தை அவர் சுட்டிக்காட்டி உள்ளார்.
சவூதி அரேபியா இப்போதாவது இராஜதந்திரத்துக்கு திரும்ப வாய்ப்புள்ளது என்று அமெரிக்க வெளியுறவுத் துறையின் கிழக்கு விவகாரங்களுக்கான முன்னாள் உதவி வெளியுறவுத்துறை செயலாளர் பார்பரா லீஃப் கூறுகின்றார்.
“பல ஆண்டுகளாக சவூதி, அமெரிக்க மற்றும் இஸ்ரேலிய குண்டுவீச்சு செயற்பாடுகள் ஹூதிகளுக்கு எதிராக இருந்தபோதிலும், அவர்களைக் கையாள்வதற்கு "யாரும் நேரடியான இராணுவ தீர்வை தெரிவு செய்யவும் இல்லை, அமுல் செய்யவும் இல்லை” என்று அவர் மேலும் கூறி உள்ளார். சவூதி அரேபியா தனது அண்டை நாடுகளுடனும், நட்பு நாடுகளுடனும் இணைந்து, ஈரானுடனான போரை முடிவுக்குக் கொண்டு வருவதற்கான "அசிங்கமான ஏற்பாடுகளை" செய்யவும் வாய்ப்பு உண்டு, என்றும் அவர் எச்சரித்துள்ளார்.
லத்தீப் பாரூக்
கருத்துகள் (Comments)
உங்கள் கருத்தைத் தெரிவிக்கவும் (Leave a Reply)
இந்தச் செய்தி குறித்து உங்கள் கருத்தைப் பதிவு செய்ங்கள்!