விபத்தில் குடும்பஸ்தர் பலி; ’போதை’ சாரதி கைது

மட்டக்களப்பு - ஏறாவூர், புன்னக்குடா வீதியில் தளவாய் பகுதியில் இடம்பெற்ற வாகன விபத்தில், 31 வயதுடைய இளம் குடும்பஸ்தர் ஒருவர் பரிதாபகரமாக உயிரிழந்துள்ளார். ஞாயிற்றுக்கிழமை (ஜூலை 19) அதிகாலை 12.30 மணியளவில் இந்த விபத்து இடம்பெற்றுள்ளதாக ஏறாவூர் பொலிஸார் தெரிவித்தனர்.

தனியார் ஆடை தொழிற்சாலையில் பணிபுரியும் ஒரு குழுவினர், மது அருந்திவிட்டு வாகனத்தில் கடற்கரைக்கு சென்றுகொண்டிருந்த வேளையில், அதே பாதையில் துவிச்சக்கர வண்டியில் பயணித்த நபர் மீது மோதியுள்ளனர். விபத்தில் சிக்கிய துவிச்சக்கர வண்டி முழுமையாக சேதமடைந்துள்ளதுடன், அதில் பயணித்த நபர் அருகிலுள்ள காட்டிற்குள் தூக்கி வீசப்பட்டார். அவரது தலையின் பின்புறத்தில் பலத்த காயம் ஏற்பட்டுள்ளதாக மருத்துவ அறிக்கையில் தெரிவிக்கப்பட்டுள்ளது.

உயிரிழந்தவர், ஏறாவூர் - தளவாய் பிரதேசத்தைச் சேர்ந்தவரும், ஒரு குழந்தையின் தந்தையுமான சித்திரவேல் சதுர்ஷன் என அடையாளம் காணப்பட்டுள்ளார். இவர் ஒரு மீன்பிடி உதவியாளர் ஆவார்.


சம்பவ இடத்திற்கு நேரில் வருகை தந்த கிரான் பிரதேச திடீர் மரண விசாரணை அதிகாரி கே. பவளகேசன், முதற்கட்ட விசாரணைகளை மேற்கொண்டார். இது தொடர்பான மேலதிக விசாரணைகளை ஏறாவூர் பொலிஸார் முன்னெடுத்து வருகின்றனர். வாகனத்தில் பயணித்த அனைவரிடமும் பொலிஸார் வாக்குமூலங்களை பதிவு செய்துள்ளனர்.