ஹார்முஸ் நீரிணையை "அமெரிக்காவின் பிரதேசமாக" மாற்ற டிரம்ப் விரும்புகிறார்.

அமெரிக்க அதிபர் டொனால்ட் டிரம்ப், ஈரான் தோற்கடிக்கப்பட்ட பின்னர், மிகவும் முக்கியத்துவம் வாய்ந்த ஹோர்முஸ் நீரிணையை அமெரிக்காவின் “பிரதேசமாக” அறிவிப்பேன் என்று வெள்ளிக்கிழமை கூறினார். ஆனால், அவர் இதைச் சொன்ன விதம், அவர் நகைச்சுவையாகக் கூறியிருக்கலாம் என்ற எண்ணத்தை ஏற்படுத்தியது.

ஈரான் அணு ஆயுதம் உருவாக்குவதைத் தடுப்பதற்காகவே போரில் ஈடுபட முடிவு செய்ததாகவும், இதனால் அமெரிக்கர்கள் எரிபொருளுக்கு அதிக விலை கொடுக்க வேண்டிய நிலை ஏற்பட்டாலும், அதற்காக தான் “ஒருபோதும் மன்னிப்பு கேட்கப் போவதில்லை” என்றும் அவர் தெரிவித்தார்.

“ஈரானைத் தோற்கடித்து முடித்தவுடன், விரைவில் ஹோர்முஸ் நீரிணையை அமெரிக்காவின் பிரதேசமாக அறிவிப்பேன்” என்று நியூயார்க் அருகிலுள்ள கார்டன் சிட்டியில் நடைபெற்ற கூட்டத்தில் சிறிய புன்னகையுடன் டிரம்ப் கூறினார்.

ஹோர்முஸ் நீரிணையின் மீது அமெரிக்காவுக்கு “கட்டுப்பாடு” இருப்பதாக டொனால்ட் டிரம்ப் தொடர்ந்து கூறி வருகிறார். இதை தெஹ்ரான் “பொய்” என்று விமர்சித்துள்ளது. 

உண்மையில், உலகளாவிய எண்ணெய் வர்த்தகத்திற்கு மிகவும் முக்கியமான இந்த நீரிணை, போர் தொடங்கியதிலிருந்து ஈரானால் முடக்கப்பட்டுள்ளது. 

அதே நேரத்தில், அமெரிக்கா ஈரானிய துறைமுகங்களுக்கு முற்றுகை விதித்துள்ளது.

Wall Street Journal பத்திரிகையின் செய்தியாளர் பிரையன் ஸ்வார்ட்ஸ், வெள்ளை மாளிகையின் உயரதிகாரி ஒருவரை மேற்கோள் காட்டி X தளத்தில், ஹோர்முஸ் “அமெரிக்கப் பிரதேசமாக” மாறும் என்று டிரம்ப் கூறியது ஒரு “நகைச்சுவை” என்று தெரிவித்தார்.

சனிக்கிழமை காலை, ஈரானின் துணை வெளியுறவு அமைச்சர் காசெம் கரீபாபாதி, டிரம்பின் கருத்துக்கு X தளத்தில் பதிலளித்தார். ஹோர்முஸ் நீரிணை “ஈரானுக்கே சொந்தமானதாக இருக்கும்” என்று அவர் உறுதியாகக் கூறினார்.

“ஹோர்முஸ் நீரிணை ஈரானுக்குச் சொந்தமானதாக இருந்தது, இப்போதும் ஈரானுக்குச் சொந்தமானது, இனியும் ஈரானுக்கே சொந்தமானதாக இருக்கும். 

இந்த நீரிணை எப்போது திறக்கப்பட வேண்டும், எப்போது மூடப்பட வேண்டும் என்பதை ஈரானே தீர்மானிக்கும். நீங்கள் தோல்வியடைந்த உண்மையை ஏற்க மறுத்து, தொடர்ந்து மாயையில் வாழும் வரை, ஈரான் முற்றுகையைத் தொடர்ந்து அமல்படுத்தும்” என்று கரீபாபாதி கூறினார்.

“ஒரு ட்வீட் மூலமாகவோ, விமானம் தாங்கிக் கப்பல் மூலமாகவோ, அதிபரின் உத்தரவு மூலமாகவோ அல்லது தேர்தல் பிரச்சார உரை மூலமாகவோ ஹோர்முஸ் நீரிணையை கைப்பற்ற முடியாது” என்றும் அவர் கடுமையாகத் தெரிவித்தார்.

ஈரான் “ஒருபோதும் அணு ஆயுதத்தைப் பெறாது” என்றும் டொனால்ட் டிரம்ப் கூறினார். “பெட்ரோலுக்கு நீங்கள் கொஞ்சம் அதிகமாக பணம் செலுத்த வேண்டியிருந்தாலும் பரவாயில்லை. (...) நான் ஒருபோதும் மன்னிப்பு கேட்கப் போவதில்லை. நான் சரியான முடிவைத்தான் எடுத்தேன்” என்று அவர் தெரிவித்தார்.

போர் தொடங்குவதற்கு முன் இருந்த விலையுடன் ஒப்பிடுகையில், வெள்ளிக்கிழமை அமெரிக்காவில் பெட்ரோல் விலை 35 சதவீதத்திற்கும் அதிகமாக உயர்ந்திருந்தது. 

இந்தப் போர் மக்கள் மத்தியில் பிரபலமற்றதாக உள்ளது. வாழ்க்கைச் செலவு அதிகரிப்பால் குடும்பங்களில் ஏற்பட்டுள்ள அதிருப்தி, டொனால்ட் டிரம்பின் மக்கள் ஆதரவு மதிப்பீட்டிலும் குறிப்பிடத்தக்க வீழ்ச்சியை ஏற்படுத்தியுள்ளது.

ஈரான் மீதான போரின் நோக்கங்கள் குறித்து டிரம்பின் துணை அதிபர் ஜே.டி. வான்ஸ் இதற்கு சற்று மாறுபட்ட கருத்தை முன்வைத்தது 

“எண்ணெய் விலை குறைந்துள்ளது. போரின் தொடக்கத்தில் இருந்த உச்ச விலையை விட இப்போது மிகவும் குறைவாக உள்ளது. எனவே, அமெரிக்கர்களுக்கு எண்ணெய் மற்றும் பெட்ரோல் விலை மலிவாக இருப்பதை உறுதி செய்வதே முதல் நோக்கம்” என்று அவர் Fox News தொலைக்காட்சியில் கூறினார்.